Atuun 3

Ufaliŋfaan ubɔ ká dicáaǹdi

1 Dalba ní Peetroo nì Yoowaneesi nìn nóó ki jɔ́ḿ kunimbɔtidiin tikúti tita wimmeem yuntiŋu. 2 Kunimbɔtidiiyee nìn cáá kipunyɔkɔ kin bi nìn yíì yii Kipunyɔkɔnyaaŋŋee. Uninja ubɔ, u nìn sá ufaliŋfaan doooo u-biyatin, ní bi nìn cāabìń-u ki kàantí kutaa sá kamaa Kipunyɔkɔnyaaŋŋee nyɔkɔpu, ú nīn mèé bin jītí ki kóò kunimbɔtidiinee animbil. 3 Uninjee ká Peetroo nì Yoowaneesi cá kí kɔ́ee, ní u bíi mèé-bi animbil. 4 Ní bi dū bi-nimbikpeeŋu ki báaǹ u-pu, ní Peetroo bí yii: «Kpèè doo!» 5 Niinee ní u bíi kpèé-bi címmm, ki bàà cí kí fōō tiba bi-cee. 6 Ní Peetroo bí-u yii: «Maa cáá animbil kaa cáá sindaariya, ama tin m cááyee, m làá tīī-si kudɔŋu. Nì Yeesu Kriisitoo Naasaareeti yɔu yindi puee, yīkìí còom̀!» 7 Ní Peetroo cúú u-ŋaŋgiil ki dúkutì-u yilpu. Dicilpu niinee, u-taaŋi ŋin fàl̄ee tāntì ki ŋáŋkì, 8 ní u yùkū ki yúl̀, ní ki kíǹ ki bíi còom̄. U nì bi kɔkɔ táá ki kɔ́ kunimbɔtidiin, ní u còom̄ ki yùkufī ki tìintí ki nyɔ́ŋkí Unimbɔti. 9 Kunipaau kɔkɔ nín ká u còomìń ki nyɔ́ŋkí Unimbɔtee, 10 bi béè-u yii úǹ di nìn kàal̀ kunimbɔtidii punyɔkɔnyaaŋkee nyɔkɔpu ki mèé animbilee. Ní an ŋá-bi maamaaci, bi bākatì kijapaayee nín ká dicáaǹdi puee.

Peetroo sòon̄ kunimbɔtidiin

11 Uninjee gbíntìi ŋúb́ Peetiroosi nì Yoowaneesi ki nóó-bee, binib kɔkɔ bākatì ki sáǹní ki dɔ́miń bi-cee kadantiku un bi yíì Saaloomɔn kadantikuuee taapu^a. 12 Peetroo ká mimmee, ní ki bí samaayee yii: «Nimbi Isirayeel yab, ba ŋá ní tin bí nee ŋá-ni maamaaci? Ba ŋá ní ni dū ni-nimbikpeeŋu ki báaǹ ti-pu míǹ, a lì kii timbi ti-ba pɔŋŋu àá ti-deedeeu Unimbɔti nimbiin di yāntì uninja nee ká dicáaǹdee? 13 Di sá Abraam nì Isaaki nì Jaakɔb Nimbɔtiu, ti-naanjab Nimbɔtiuee^b di ŋá míǹ kí tīī u-tɔntɔnliu Yeesu tinyool. Úǹ ní ni cúú ki tīī Piilati yii naa là-u, bí kpɔ̀-u, ŋyunti ŋun Piilati u-ba bàà nìn là kí gíiǹ-u kí lííyee. 14 Ni yíì yii naa là Yeesu un sá circir ki bí deedeeyee, ama ní ki gbāam̀ yii ú gíiǹ unikpɔl kí tīī-ni^c, 15 ní ki kūū dimaŋfal Dindaan. Ama Unimbɔti fīkitì-u ditaŋkpiilin, timbi kɔkɔwoooo nìn ká ki sá biseeradambi. 16 Uninja un ni wāĺ ki nyí nee, Yeesu un ti fōō ki kííyee yindi pu ní kijapaai nee ká dicáaǹdi. Ti nín fōō-u ki kííyee di yì-tì ní uninja nee pɔ́ɔkì tiŋan ni-kɔkɔ nimbiin nee.

17 «Kɔŋkɔnnee, m-nabiyaamu, m nyí yii naa nìn nyí ní ki ŋáaǹ tin bí nee, ki kpáaǹ ni-yidambi mun. 18 Ama Unimbɔti nín nìn dī u-bɔnaatiliibi kɔkɔ nyɔmmu pu ki sòon̄ puee, yii Meesiya làá dāá jī falaayee, an lafun ŋá míǹ^d. 19 Míǹ puee, fámaan ni-kpitii kí gítímaan Unimbɔti cee kí wàatī ní ú kpìtī ni-kpitii kɔkɔ. 20 Niinee, ti-Dindaan làá tīiń-ni diŋuŋfil yuntiŋu, kí tɔ̄ń Yeesu un u lēē yii ú nīn sá Meesiya ki tīī-nee. 21 Kun puee u dáá kā Unimbɔti cee kí nīn cí ŋyunti ŋun Unimbɔti làá dāá kpántí tikɔkɔ mpɔm, kii u nín nìn yāntì u-circir bɔnaatiliibi sòon̄ dooooyee puee. 22 Mooyiisi nìn lī yii: <Ti-Dindaan ni-Nimbɔtiu làá dāá lēē ni-nabiyaamu kansikin ubɔ, ú nīn sá Unimbɔti bɔnaatiliu kii mamee. Ní dāá pīlifì tin kɔkɔwoooo u làá sòoǹ nì nee. 23 Un sá kamaa yaa kaa dāa pílifiǹ Unimbɔti bɔnaatiliu gbantee, bi làá dāá nyāntí-u Unimbɔti samaau kansikin kí kpɔ̀-u^e.>» 24 Ní Peetroo nìkī ki bí yii: «Unimbɔti bɔnaatiliibi kɔkɔ, bin nìn sòon̄ doooo Samiyeel yuntiŋu ki kpáaǹ bin dāa páaǹní u-boonee, báà ŋma nìn nāatì tibɔti gbanti wiiŋyi pu. 25 Nimbi di sá bin jíń tin Unimbɔti nìn pōoǹ ki tīī u-bɔnaatiliibee, ki fōō u nín nìn pūtì ki pōoǹ tin kí ŋá kí tīī ti-naanjabee mun. Dipoondi gbanti poon ní u lī Abraam yii: <A-dicaŋku pu ní m làá dāá dī kí bìin̄ duulinya timbuliŋ kɔkɔ pu^f.> 26 Nimbi pu ní Unimbɔti fīkitì u-tɔntɔnliu Yeesu. U dū-u ki túnní ni-cee mpeepeekaam, ú dāan̄ kí ŋá-ni tiŋan kí nyāntí báà ŋma u-tuŋkpitiŋ poon.»