Atuun 21

Pɔɔl gítì Jeerusaleem

1 Timbi nì bi dāa cúu yākatì tɔbinee, ní timbi kɔ́ meela ki túĺ dicancaal ki búntì Kɔɔsi, ní ku wúntèe ti dūu bàn̄ Roodi. Niinee ní ti cāatì Patara. 2 Ní ki ká meela un cá Feenisiiyee, ní ti kɔ́ úǹ ki búntì. 3 Ti tin gbīitì Siipiri tiŋki kin nnyim māntì ki túee ní ki dū-kì ki fá ŋŋaŋgan pú, ní ki dūu dī Siirii watil pú, ní ki tin bàn̄ Tiir, laakin meela làá tàkatī u-wantee. 4 Niin ní ti ká Kriisitoo yab biba, ní ti kāl̀ iwiin iluli bi-cee. Circir Fam yāntì bi béè ki tùkū Pɔɔl yii ú taa jɔ̄m̀ Jeerusaleem. 5 Ti nín kāl̀ iwiin gbanti dóò ti làá yīkìńee, bi nì bi-nimpoobi nì bi-biyaamu kɔkɔ céeǹní-ti áli ki nyántì kitiŋ kpaanceetiŋu. Niinee ní ti gbāaǹ dimɔɔgbandi ki mēē. 6 Ti mēē ki dóòyee, ní ki kāaǹ tɔb, ní timbi búntì kí cùú kɔ́ meela, ní bi mun nín fàtī bi-dumpui. 7 Ní ti yíkì Tiir ki cūtì Tooleemayiisi, ki cūtìi jáam̀ nnabiyaamu, ki kāl̀ bi-cee ŋwiin ŋubɔ. Niin ní ti kúntì dimɔɔl pu saŋkindi. 8 Kutaa wúntèe ní ti yíkì niin ki bàn̄ Seesaaree, ní ki kɔ́ Fiiliipi dumpu. U sá un sòoǹ Yeesu bɔmɔntiiti ki sá binib biluli bin bi nìn lēē bí nīn yàkatī tijinee kansikin ubɔee ní. 9 U nìn cáá bisapɔmbi binaa bin kaa nyí uninjee, bi nìn sá Unimbɔti bɔnaatiliibi. 10 Ti nìn kāl̀ u-cee ki yúntì fiii, ní Unimbɔti bɔnaatiliu ubɔ, bi yíì-u Agabusi, nyánní Juudee ki dɔ́miń ti-cee. 11 Kijapaayee yōoǹ Pɔɔl dambalau ní ki dūu bóob́ u-taaŋi nì u-ŋalii, ní ki bí yii: «Pīlifìmaan Circir Fam nín lī puee! Uninja un di yaa yì dambala neeyee, Juuda yab làá bóob́ udaan míǹ ní Jeerusaleem, ní kí dū-u kí tīī bin kaa sá Juuda yabee.» 12 Ti gbìl̄ mimmee, ní timbi nì laakin ti kóòyee yab bíi gbàam̄ Pɔɔl yii ú taa cù Jeerusaleem. 13 Ní Pɔɔl bí-ti yii: «Ba ŋá ní ni sūǹ ki bíiĺ m-pɔbil míǹ? Báà bi yaa làá bóob́-mi kí kpɔ̀-mi gba Jeerusaleem niin ti-Dindaan Yeesu puɔɔɔ, maa mɔ́tí!» 14 Ti lī-u tikɔkɔ kaa ŋúń-uee, ní ti cāntì-u, ní ki bí-u yii: «Too, ti-Dindaan yaa là miŋyee, án ŋá míǹ!»

15 Iwiin gbanti boonee, ní ti bɔ́ntì ki nín jɔ́ḿ Jeerusaleem. 16 Kriisitoo yab bin bí Seesaareeyee biba céeǹní-ti ki cáa cūnnì kijapaai kin bi yíì Minaasɔnee dumpu. U nìn sá Siipiri, ki nìn fōō ki kíí dooooyee. Úǹ cee ní bi nìn kɔ́ǹ-ti.

Pɔɔl cūtìi māntì Yakubu pu

17 Ti bàn̄ Jeerusaleemee, ní nnabiyaamu fōō-ti nì dipɔɔpindi. 18 Kutaa wúntèe ní ti nì Pɔɔl búntì Yakubu cee. Niin ní bikpilib kɔkɔ nìn kpáfì. 19 U jáam̀-bi ki dóòyee, ní ki bíi sòoǹ ki bɔ́bití-bi Unimbɔti nín dī u-pu ki túń ditundi din bin kaa sá Juuda yabee kansikinee. 20 Bi gbìl̄ mimmee, ní ki nyɔ́ŋkì Unimbɔti. Ní bi bí-u yii: «Ti-nabiki, a ká Juuda yab kansikin binib kutukub tikpil nín kpántì Kriisitoo yab, bi-kɔkɔ ŋúb́ Mooyiisi marab tiŋan pueeyaa! 21 Di sá bi tùkū-bi yii a dàkà Juuda yab bin kóò binicambi kansikinee yii bí fá Mooyiisi marab kí taa ti nín̄ gífí bi-biyaamu akpancan, kí fá ti-naanjab koobiliŋ mun. 22 Báà an ŋá pu bi-kɔkɔ làá béé yii a dɔ́miń. Mimmee, ti làá ŋá mana kɔŋkɔnnee? 23 Míǹ puee, ti làá tùkù-si a nín làá ŋá puee. Bininjab binaa biba bí ti-kansikin doo ki pōoǹ ipoon. 24 Yòon̄-bi kí cù si nì bi kɔkɔ ń ŋá saraabi kí kòotī-bi, kí pà animbil bí kòol̀-bi. Niinee ní báà ŋma làá béé yii tin ní bi sòoǹ a-puee kaa sá ibaamɔn, ní kí ká yii sisi aba bí kii bin dī marabee nín bí puee. 25 An yaa kíǹ bin kaa sá Juuda yab ki fōō Yeesu ki kííyee, ti nìn ŋmàn̄ kugbɔŋu ki tùkū-bi yii timbi kpēē yii an ŋān̄ bí taa ti ŋmɔ́ tiwaatootinan, kí taa ŋmɔ́ fatiku nì tiwan tin baa lāntì fatiku nyáńee, kí taa ŋá tilaakpaal mun.»

26 Kutaa wúntèe ní Pɔɔl yōoǹ bininjabee, ní u nì bi cūtì ki ŋá saraabi, ní ki kɔ́ kunimbɔtidiin. Niin ní Pɔɔl yóoǹ ŋwiin ŋun bi làá kòotēe nì báà ŋma nín làá dāá cáań saraabi bin biŋyee^a.

Bi cúú Pɔɔl kunimbɔtidiin

27 Ŋwinluluútee cá dikúntilee, ní Juuda yab biba bin nyánní Asiiyee ká Pɔɔl kunimbɔtidiin. Niinee ní bi fíiǹ báà ŋma landɔkɔŋu ŋá mbaanti, ní bi cúú Pɔɔl. 28 Bi cúú-uee, ní ki kíǹ ki bíi tátí yii: «Isirayeel yab, jòoḿmaan-ti! Kpèèmaan, uninjee dee un cá an kɔkɔ ki sòoǹ báà ŋma cee ki bíiĺ Isirayeel yab yindi nì Mooyiisi marab nì kunimbɔtidiiyee. Áli gba, u yāntì bin kaa sá Juuda yabee kɔ́ kunimbɔtidiin, ki bíil̀ circir kɔŋkooŋŋu gbanti!» 29 Kun yì-tèe di sá, bi nìn ká u nì Troofiim un sá Eefeesee kitiŋin, ní bi dākafì yii Pɔɔl nìn cáá-u ki kɔ́ǹ kunimbɔtidiin^b.

30 Niin ní kitimmɔŋee fōō ki píĺ dàii, ní binib nyánní ajan kɔkɔ pu ki dɔ́miń ki cúú Pɔɔl ki dáaĺ-u ki nyántì kunimbɔtidiin, ní ki dū mpunyɔmu ki pīiǹ dicilpu niin. 31 Bi nín nìn pée nyàab̀ kí kpɔ̀-uee puee, an pūtì kpáàa pée bàn̄ Room yab soojakpikpaaŋwu, yii fìkil fikil ubɔ kóoń Jeerusaleem tiŋki kɔkɔn. 32 Dicilpu niinee, kijapaayee yōoǹ soojab ki kpáaǹ bi-kpilib biba ki sáń ki nín cá samaayee cee. Bi dāa ká usoojakpilee nì u-yab páaǹnée, ní bi gbēeǹ, kaa ti bíi gbáà Pɔɔl. 33 Niinee ní Room yab soojakpikpaaŋwu dāatìi cúú Pɔɔl, ní ki bí yii bí dū ikusaka ili kí bóob́-u, ní u bālifì-bi un Pɔɔl sée nì tin u ŋée. 34 Kunipaau kansikinee, biba tátí ki lì tiba, ní bin kíǹee mun cáá tiba, an di nìn yì-tì waa nìn ŋúń ki béè mbaamɔn, ní u bí yii bí cáá-u kí cùnnì soojab dumpu. 35 Ŋyunti ŋun bi bāań akɔl puee, samaayee kɔkɔ nín páb́ Pɔɔl mpɔn puee ní soojab yōoǹ-u ki túǹ, kí mɔ̄tì u-pu. 36 Kun puee binib nìn wīikí tikpil ki pá u-boon ki tátí yii bí kpɔ̀-u.

Pɔɔl bíi sòoǹ tin u cááyee samaa nimbiin

37 Bi tóob́ kí kɔ́ soojab dumpuee, ní Pɔɔl bālifì usoojakpikpaan yii: «A kíikí ḿ sòoǹ nì si tibaaa?» Ní ukpilee fātìi bālifì-u yii: «A gbìl̀ Greeki yab sooŋyaaa? 38 Sii di kaa sá Ueejipitija un là kí bīil̀ kitiŋ yaadal nee, ki yíkìi yōoǹ digaŋgandambi kutukub binaa ki cūnnì kuteeuneeee?» 39 Ní Pɔɔl kíí-u yii: «Man sá Ujuudaja ní, ní bi màl̄-mi Taarsi, Siilisii tiŋkpaaŋkin. M baasii sá kitiŋkpaaŋŋi tindambiki ní. M gbāam̀-si, pɔ̄-mi nsan ḿ sòoǹ nì samaa!» 40 Niinee ní usoojakpikpaanee pú-u mpaan. Ní Pɔɔl yúl̀ akɔl pu ki yōoǹ u-ŋal ki téefì samaa. Niinee ní báà ŋma ŋmíl̀ fɔ́ŋfɔŋ. Ní u yōoǹ dinyɔɔbundi ki bíi sòoǹ nì samaa nì eebru sooŋyin, yii: