Room 3

1 A yaa sá Juuda yɔuee, a gíti cáá diyimɔɔl dibaaa? Àá digiil sá tiwammɔntiilaaa? 2 Tiŋman, bi-yimɔɔl jítiǹ bin béeyee yal kpataaa. Diyimɔɔpeepeekaal di sá Unimbɔti nín dū u-bɔti ki ŋúbiǹ Juuda yabee. 3 Ama bi-kansikin biba kaa ŋúń ki yúl̀ deedee. Mimmee, bi nín kaa yúl̀ deedeeyee puee di làá yàntī Unimbɔti deedeeu ń ŋá fámaaa? 4 Aayee, kpataaa! Unimbɔti di làá nīn pée sá deedeedaan, ní binib kɔkɔ ń nīn sá binyimɔndambi, kii Unimbɔti gbɔŋku nín lī puee yii:

«Binib máaǹ kí ká a nín sá deedee puee tin a sòoǹee poon,

ní bi yaa sòon̄ a-bɔtee, bí ká yii a cáá ibaamɔn^a.»

5 Ti nín ŋáań ikpiti iŋyee yaa dàkà yii Unimbɔti sá umɔntee, mimmee u nín dátí ti-tafal ti-kpitii puee, waa bí deedee deeyaa! (M sòoǹ nniyaamin ní). 6 Aayee kpataaa! Unimbɔti yaa kaa bàà bí deedee, waan ŋūǹ kí sòoǹ duulinya bɔti.

7 Mimmee, m-nyimɔŋyi yaa ŋūǹ kí yàntī Unimbɔti baamɔŋyi ń nyā mpaampiin pu bí wāl̀ kí tīī-u tinyoolee, ba pu ní bi làá gíti sòoǹ kí kpɔ̀ m-bɔti yii m sá unikpiti? 8 Míǹ puee, tí lì yii: «Tí nīn ŋáań ikpiti, án dāá kpántí tiŋanaa!» Míǹ ní bin mɔ́ntí nnyimɔn ki tūntí ti-puee lì. Bin sòoǹ ti-pu mimmee máaǹ ditafadaaldi.

Ubɔ kaa bí ki bí deedee

9 Mimmee, timbi Juuda yab jítiǹ binib bin kíǹeeee? Aayee, kpataaa! Kii m nín bàà pée lī puee, Juuda yab nì bin kaa sá Juuda yabee kɔkɔ bí ikpitin. 10 Kii Unimbɔti gbɔŋku nín lī puee, yii:

«Unil báà ubɔ kaa bí ki bí deedee,

báà ubaanti, an kpá.

11 Ubɔ kaa bí ki cáá iciin.

Ubɔ kaa bí ki nyàab̀ Unimbɔti.

12 Bi-kɔkɔ yīntiǹ-u ki wáŋkì,

báà ubɔ kaa bí ki ŋáań tiŋan,

báà uniseen, an kpá.

13 Dikaakul din wāā ki núùyee nín bí puee,

míǹ ní tibɔti tin bí bi-neeŋyinee bí.

Bi cáá bi-limbiliŋ ki kíiĺ binib,

bi-nyunculiŋ nín tábití ki sòoǹ tiŋyee sá tilool kii ukoowaati lootee ní.

14 Bi-nyɔmmu poon gbí mbusu nì ntuntun.

15 Bi yáb̀ nnikpaakoon pu.

16 Laakin kamaa bi yaa cūtèe, see bí cáá bi-timbiilii nì falaa niin.

17 Baa nyí ŋgbansɔŋfi saŋŋu.

18 Baa fàŋkí Unimbɔti báà fiii^b.»

19 Ti nyí yii marab nín sòoǹ tiŋyee kɔkɔee, bi sòoǹ ki tìì bin bin Unimbɔti nìn tīī u-marabee ní. Míǹ puee, ubɔ kaa dāa cáá kinyɔkɔ kí wàan̄ kí tīī nnaakpal. Kitiŋ pu yab kɔkɔ dāa béetí yii bi sá binikpitib Unimbɔti nimbiin. 20 Di sá yii unil nín ŋúb̀ marab mmɔntiimin puee kaa ŋūǹ kí yàntī ú nīn bí deedee Unimbɔti nimbiin^c, kun puee marab tundi di pée sá bí dàkà binib kun di sá ikpitee.

Min ní Unimbɔti dì kí fīī unilee

21 Ama kɔŋkɔnnee, Unimbɔti dàkā min ní unil ŋūǹ kí dī kí kpántí deedeedaan u-nimbiin kí taa dī marab puee: Mooyiisi gbɔnti nì Unimbɔti bɔnaatiliibi mun nìn sòon̄ an bɔti pu. 22 An sá ti nín fōō Yeesu Kriisitoo ki kííyee pu ní Unimbɔti kpántì-ti deedeedambi u-nimbiin. Unimbɔti kaa gàntī binib, an sá ki tīī bin kɔkɔ fōō Yeesu ki kííyee, 23 kun puee báà ŋma ŋá ikpiti ki dátiǹ Unimbɔti nyooti. 24 Unimbɔti ŋáań-ti tiŋan ki yàntī ti kpántí deedee nib u-nimbiin faalaa, Yeesu Kriisitoo nín dū u-ba ki fīī-ti ki líìyee pu. 25 Úǹ ní Unimbɔti yōoǹ ki lēē-ti saraa, u-fatikuu ń pítí bin kɔkɔwoooo fōō-u ki kííyee kpitii, bi nì Unimbɔti kansikin ń ŋāŋkì. Unimbɔti ŋá míǹ kí dàkà u nín sá deedeedaan puee ní. Di sá yii dooooyee, u nìn jíń kimɔtii kaa nìn dátí binikpitib tafal bi-kpitii pu. 26 Ama kɔŋkɔnnee, u dàkā binib u-deedeeu: u-deedeeuee di sá u dū Yeesu ki pàn̄ ti-kpitii pɔndi, ní ki yíì bin kɔkɔ fòol̄ Yeesu ki kíikée deedeedambi.

27 Mimmee, unil cáá nsan kí dàkà u-baaa? Aayee, nsan kaa bí báà fiii. Ba pu ní a ká difiil? A nín nóó Mooyiisi marabee puɔɔɔ? Aayee, an sá a nín fōō ki kííyee pu. 28 Ti nyí yii unil un fōō Yeesu ki kííyee di kpántí deedeedaan Unimbɔti nimbiin, an kaa sá marab bin u nóóyee pu. 29 An yaan sá marab puee, mimmee, Unimbɔti bàà sá Juuda yab ŋmaniŋma Nimbɔtiu naa! Waa bàà sá bin kaa sá Juuda yabee mun Nimbɔtiu. Ama u sá báà ŋma Nimbɔtiu ní. 30 Di sá yii u pée sá Unimbɔtibaanti ní^d, ki làá yàntī Juuda yab bin gíí dikpancandi ki fōō Yeesu ki kííyee nì bin kaa sá Juuda yab, kaa gíí, ki mun fōō Yeesu ki kííyee kɔkɔ ń kpántí deedeedambi u-nimbiin. 31 Mimmee, an dàkà yii ti yaa fōō Yeesu ki kííyee, taa ti dù marab kí yíiń tiba deeyaaa? Aayee, an kaa sá míǹ. Ŋyunti gbanti ní ti nín tìì marab mpɔn.