1 Kɔranti 2

Tibɔti tin Pɔɔl sòoǹee: Kriisitoo dɔpuntikaaŋu

1 Nnabiyaamu, m nín nìn dɔ́miń ni-cee ki sòon̄ nì ni Unimbɔti bɔti tin bí dibalinee, maa nìn dū anyɔɔbuŋkpaanaaa, kaa nìn tí dū binib ciiŋyi ní ki sòon̄ nì ni. 2 M lēē yii maa làá sòoǹ ni-kansikin báà tiba nì tiba, an yaa kaa sá Yeesu Kriisitoo un bi kpáá ndɔpuntikaa puee bɔti. 3 An pu ní m kāl̀ ni-kansikin kii uwɔfee nì tifaandi yɔ́kɔ́ yɔkɔ^a. 4 Unimbɔti bɔti tin m nìn cáań-nee nì min min m nìn dàkā-ni tibɔti gbantee kaa nìn nyánní binib ciiŋyi dàkatamin, ama an nìn sá Unimbɔti Fam pɔŋŋu tundi ní. 5 Mimmee ni-fookiiu kaa cɔ́ binib ciiŋyi pu, ama Unimbɔti pɔŋŋu pu ní an cɔ́.

Unimbɔti ciiŋŋu

6 An puee bin béè nnimbɔtisan mmɔntiiminee, iciin ní ti dàkā-bi. An kaa nìn sá duulinya yab ciiŋyi, kaa tí sá ipɔŋkpiti in jíń abee duulinyan ki làá dāá kúntée ciiŋyi. 7 Timbee, Unimbɔti ciiŋyi in nìn bí dibalinee pu ní ti sòoǹ. Unimbɔti nìn pée lēē-i ki yóoǹ-ti án nīn sá ti-nyooti ki wāatì ní ki nín náań duulinya. 8 Duulinya bɔtiibi báà ubɔ kaa ŋúń ki béè Unimbɔti ciiŋyi gbanti. Bi yaa bàà nìn béè-i, baa bàà nìn kpáà ti-Dindaan tinyooldaan ndɔpuntikaa pu. 9 An bí kii Unimbɔti gbɔŋku poon nín ŋmàn̄ puee yii:

«Tin unil nimbil kaa kée,

nì tin u-tafal kaa gbìl̄ee,

nì tin unil kaa dākafì ki kée,

tíǹ ní Unimbɔti bɔ́ntì ki yóoǹ bin néeń-uee^b.»

10 Di sá yii timbi ní Unimbɔti dī u-Fam pu ki dàkā-ti abɔɔn gbanti. Di sá yii Unimbɔti Fam gbanti di ŋūǹ kí béé tin Unimbɔti cááyee, ki kpáaǹ tin bí dibalin poon poon kábuee. 11 Ulanil ni-kansikin di ŋūǹ kí béé u-juti landɔkɔŋu? See úǹ u-ba fam min bí u-nee di ŋūǹ kí béé kun u sée. Míǹ mbaantiim ní ubɔ kaa ŋūǹ kí béé Unimbɔti landɔkɔŋu, see Unimbɔti Fam di ŋūǹ kí béé u-landɔkɔŋu. 12 Timbee, an kaa sá duulinya Fam ní ti fōō, an sá Unimbɔti di tīī-ti u-Fam, án nín làá ŋá pu tí béé tiŋan tin kɔkɔ Unimbɔti ŋá-tee. 13 An puee, anyɔɔbun ŋin ti cáa sòoǹee kaa sá binib nín dàkà iciin iŋyee nyɔɔbuŋŋi, ama an sá anyɔɔbun ŋin Unimbɔti Fam tīī-tee ní ti cáa sòoǹ ki bɔ́bití ibaamɔn in nyēeń Unimbɔti Fam nee ki tùkù bin cáá Unimbɔti Famee.

14 Unil un dàkafī nniyaamin ŋmaniŋmee kaa ŋūǹ kí fōō ibaamɔn in Unimbɔti Fam sòoǹee. Úǹ ceeyee, an sá tiwaatibɔti ní. Waa ŋūǹ kí fōō-tì, kun puee Unimbɔti Fam baba di yàntī unil ń ŋmā kí béé kí gàntī. 15 Unil un cáá Unimbɔti Famee di ŋūǹ kí nīn nyí tikɔkɔ ki gàntī, ama ubɔ kaa gbìl̀ úǹ bɔti taapu kí gàntī. 16 Kii Unimbɔti gbɔŋku poon nín lī puee yii:

«Ŋma di nyí ti-Dindaan landɔkɔŋu?

Ŋma di ŋūǹ kí sāŋkì-u^c?»

Ama timbee, ti cáá Kriisitoo landɔkɔŋu ti-ni.