1 Kɔranti 15

Kriisitoo fìkititam

1 Nnabiyaamu, m téetí-ni Tibɔmɔntiil tin m nìn sòon̄ nì ni, ni fōō ki kíí ki sí ti-puee bɔti. 2 Tibɔmɔntiil gbanti pu ní Unimbɔti fīī-ni. An puee ní nīn gbíntì ki ŋúb́-tì kii m nín nìn sòon̄ nì ni puee. Yaa sá fám, ni fōō ki kíí fám dee.

3 Tin bi dàkā-mee, tíǹ ní m cáań ki dàkā-ni. Tibɔti gbanti poonee, tin páb́ tikpilee di sá yii Kriisitoo kpíì timbi kpitii pu ní, kii Unimbɔti gbɔŋku nín lī puee. 4 Bi síb́-u ní iwiin ita dalee, Unimbɔti fīkitì-u, kii an nín ŋmàn̄ pu Unimbɔti gbɔŋku poonee. 5 U lēē u-ba ki dàkā Peetroo nì u-kpambaliŋ saalaa nì alee^a. 6 Boonee u-boonnooliibi alaataa aŋmoo mun ká-u dicilpu. Bi-kansikin tikpil dáá bí kaa kpíì, ama biba mun kpíì. 7 Boonee ní u lēē u-ba ki dàkā Yakubu, nì akpambal kɔkɔ.

8 Bíǹ kɔkɔ boon kpataaayee, ní u lēē u-ba ki dàkā ma mun, man un bí kii m-ŋmalii kaa bàn̄ ní bi màl̄-mee. 9 Man di sá kiwaai akpambal kansikin. Maa máaǹ bí yíiń-mi Yeesu kpambal báà fiii, kun puee m sāaǹ Unimbɔti nikitil^b. 10 Unimbɔti ŋanti pu ní m sá kun m sá díǹ nee. Tiŋan tin u ŋá-mee cáá mpɔn ki yāntì m túń ditundi ki jítiǹ akpambal ŋin kíǹee. An kaa sá man m-ba di túń an tuuŋŋi, an sá Unimbɔti ŋanti tin bí m-nee di túń ditundi gbanti. 11 An puee an yaa sá mamaaa, an yaa tí sá bin kíǹeeyaaa, tin pu ti sòon̄ee dee, tin ni mun fōō ki kííyee dee.

Ti mun làá dāá fìkitī

12 Ti yaa sòon̄ ki tùkū-ni yii Unimbɔti fīkitì Kriisitoo ditaŋkpiilinee, mana ní ni-kansikin biba lì yii bitaŋkpiibi kaa bí kí fìkitī? 13 Bitaŋkpiibi yaa kaa fìkitī ditaŋkpiilinee, mimmee Kriisitoo mun kaa fīkitì deeyaa! 14 Kriisitoo yaa kaa bàà fīkitèe, Tibɔmɔntiil tin ti sòoǹee bàà sá fám ní, ní ni mun nín fōō ki kíí miŋyee ŋá fám. 15 Áli gba ti bàà sá binyimɔndambi, kun puee ti mɔ́ntì ki túǹ Unimbɔti pu yii u fīkitì Kriisitoo ditaŋkpiilin, kin u mun kaa fīkitì-u, an yaa lafun sá tiŋman yii bitaŋkpiibi kaa fìkitēe. 16 Bitaŋkpiibi yaa kaa fìkitēe, mimmee Kriisitoo mun kaa fīkitì dee. 17 Kriisitoo yaa kaa fīkitì ditaŋkpiilinee, mimmee ni-fookiiu sá fám dee, ni dáá gbíntì ki bí ni-kpitii poon dee. 18 An yaa sá mimmee, bin nóó Kriisitoo ki kpíìyee wáŋkì. 19 An yaa sá dimaŋfal din poon ti bí nee ŋmaniŋma pu ní ti yaa máká Kriisitoo puee, mimmee timbi falaau jítiǹ binib kɔkɔ yɔu dee.

20 Ama Kriisitoo fīkitì ditaŋkpiilin tiŋman. Bitaŋkpiibi bin làá dāá fìkitēe, úǹ di sá upeepeekaa ki fīkitì. 21 Di sá yii unibaanti pu ní ŋkúm dī ki jéetì binib pu. Míǹ mbaantiim ní bitaŋkpiibi fìkititam tí dīń unibaanti pu kí fìkitī báà ŋma. 22 Kii inifunaan kɔkɔ nín cáá mpèé nì Adam ki kúù puee, míǹ mbaantiim ní bin kɔkɔ ŋá ubaanti nì Kriisitooyee làá dāá ká dimaŋfal^c. 23 Ama an sá báà ŋma nì u-yuntiŋu ní. Kriisitoo di sá upeepeekaa ki fīkitì ditaŋkpiilin, ní bin nóó Kriisitooyee mun ń dāá fìkitī ŋyunti ŋun u yaa láa fātìi gítińee. 24 Boonee ní duulinya kúntitam ń nín bàń. Ŋyunti ŋun u yaa láa kúntì ipɔn kɔkɔ nì i-nyɔkɔmee ní ú dū Dibeel kí tīī u-Baa Unimbɔti. 25 Kriisitoo làá jī dibeel míǹ ní kí tin sāā ŋyunti ŋun u làá já kí pɔ̄ɔkiǹ u-nannanliibi kí dū-bi kí ŋá u-taaŋi taapuee^d. 26 U-nannanliu un u làá kúntí katanjooliiyee di sá ŋkúm. 27 Kun puee an lī Unimbɔti gbɔŋku poon yii: «U dū tikɔkɔ ki ŋá u-taaŋi taapu^e.» Unimbɔti nín lī yii u dū tikɔkɔ ki ŋá u-taaŋi taapuee, kaa sá ki kpáaǹ úǹ Unimbɔti u-ba ní u kpáàa dūu ŋá u-taapu. 28 Ŋyunti ŋun ní tikɔkɔ yaa láa sīntiǹ ti-ba ki tīī Kriisitooyee, niinee ní úǹ Unimbɔti Jipɔɔn mun u-ba ń dāá sìntīǹ u-ba kí tīī Unimbɔti un sīntiǹ tikɔkɔ taapu ki tīī-uee, ní Unimbɔti ń nīn yì tikɔkɔ nì tikɔkɔ.

29 Kpèèmaan bin yàntī bi fùul̀-bi Unimbɔti nyim bin kpíìyee yil puee: bin kúùyee yaa kaa bàà fìkitēe, ba pu ní bi yàntī bi fùul̀-bi Unimbɔti nyim bitaŋkpiibi yil pu? 30 Bi yaa kúù kaa fìkitī ní, ba pu ní ŋyunti kamaayee timbi bí dinimbinaamandin ní? 31 Nnabiyaamu, baabadalee ŋkúm tà ki kíbití-mi ní. Ni nín nóó ti-Dindaan Yeesu Kriisitoo puee nín tìì-mi disíndi diŋyee di yì-tì ní m lì míǹ. 32 An yaa sá yii unil yaa kpíì waa ti fìkitēe, mimmee m nín jáń nì kumooun peelii in bí Eefeesee, ba paatii ní m ká? An yaa sá yii bitaŋkpiibi kaa fìkitēe, mimmee càmaan tí ŋá kii dilaŋkpandi nín lī puee yii: «Tí jī kí nyɔ̀maan, kun puee fool ti làá fu kpú^f.»

33 Ní taa yàntī ubɔ ń kīil̀-ni: «Ni yaa nóó binib bin bimbim kaa ŋān̄ee, see ni mun ń dāá bīil̀.» 34 Ní gítiḿmaan ni-ban kí nīn cáá ilandɔkɔmɔnti kí taa ti ŋá ikpiti. Ni-kansikin biba kaa nyí Unimbɔti. M nín lī pu nee, an sá ni-cooi ní.

Bin làá fìkitēe wunti

35 Ama ubɔ làá lì yii: «Mana ní bin kpíìyee làá fìkitī? Tiwun tilati ní bi làá dāá nīn cáá dee?» 36 Ugbaan, a yaa búĺ ŋwamboolee, ŋwamboolee yaa kaa kpíìyee, ŋuaa nyēē. 37 Kí kūtèe, kun a búĺee sá idi àá iwambool iba ní an nyā ki sá tifaal, kaa ti sá ŋwambool ŋun a búĺee. 38 Unimbɔti di tìì ŋwamboolee u nín là ŋú nyā kí nīn bí miŋyee. Úǹ di tìì iwambool kɔkɔ nín máaǹ kí nyā kí nīn bí miŋyee.

39 Tiwan tin kɔkɔ cáá kufoouee wunti kaa sá tibaantiil, binib wunti bí ti-ba, ipeel yati bí ti-ba, nnɔmbiyaamu yati bí ti-ba, ní ijɔm mun yati bí ti-ba.

40 Tiwun tin sá yilpu yatee bí, ní tin mun sá taapu dooyee yati bí. Tin sá yilpuee nyaaŋku nyáń ku-ba nì tin sá taapu dooyee. 41 Ŋwìiń nyaaŋku bí ku-ba ní uŋmal mun yɔkɔ bí ku-ba, áli gba iŋmalbijaa kansikinee i-nyaaŋku bí ku-ba ku-ba ní.

42 Míǹ mbaantiim ní bitaŋkpiibi yaa láa fīkitèe, an dāa bí. Tiwun tin kúùyee ní bi dù kí síb́, ní tí dāá fìkitī nì tiwun tin kaa kúùyee. 43 Kí wàatī bí dū-tì kí síb́ee, tàa ŋān̄, kaa pɔ̄ɔ̄ mun. Ama ní tí dāá fìkitī nì kunyaaŋŋu nì mpɔn. 44 Taapu doo wunti ní bi dùú síb́ ní tì yaa fīkitèe, Circir Fam ń dāá tīī-ti dimaŋfal. Míǹ puee, taapu doo wunti bí ní tiwun tin Circir Fam tīī dimaŋfalee mun bí. 45 Kii Unimbɔti gbɔŋku poon nín lī puee yii: «Adam unipeepeekaayee, Unimbɔti náań-u ní ki tīī-u dimaŋfal^g», ama Adam joolkaayee, úǹ sá Ŋfam min tìì dimaŋfalee ní. 46 An kaa sá un nyánní Unimbɔti ceeyee di péetí kí dāan̄, an sá un nyánní taapu dooyee di péetí, ní un nyēeń Unimbɔti ceeyee ń páanní boon. 47 Ntam ní Unimbɔti dūu náań Adam peepeekaa ní u sá taapu doo^h, ama Adam liliitee nyánní Unimbɔti cee ní. 48 Binib bin sá taapu doo yabee náań nì un Unimbɔti dū ntam ki náańee ní, ní bin sá yilpu yabee náań nì un nyánní yilpuee. 49 Ti nì un sá taapu dooyee nín náań pu nee, míǹ mbaantiim ní ti nì un sá yilpuee làá dāá nīn tí náań.

50 Nnabiyaamu, tin m là kí tùkù-nee sèé: tiwun nì fatiku kaa ŋūǹ kí kɔ́ Unimbɔti Beelin, míǹ ní tin kúùyee kaa ŋūǹ kí fōō tin kaa kúùyee.

51 M làá tùkù-ni tibɔti tin nìn bí dibalinee: di sá yii ti-kɔkɔ kaa làá dāá kpú, ama ti-kɔkɔ wunti di làá dāá kpántí. 52 Dikantánjoolkaal yaa láa búńee, niin niin dicilpu kii dinimbil nín pée kábití puee, bitaŋkpiibi kpáàa fīkitì nì tiwun tin kaa ti kúùyee, ní timbi bin kíǹ kaa kpíìyee wunti ń cúú kpántíⁱ. 53 Di sá yii tiwun tin bíiĺee dāa kpántí tin kaa bíiĺee, míǹ ní tiwun tin kúùyee dāa kpántí tin kaa kúùyee. 54 Ŋyunti ŋun ní tiwun tin bíiĺee yaa láa kpántì tin kaa bíiĺee, ní tiwun tin kúùyee yaa láa kpántì tin kaa ti kúùyee, ŋyunti gbantee an ŋá kii an nín ŋmàn̄ Unimbɔti gbɔŋku poon puee dee, yii: «Bi kúntì ŋkúm, dijajil ŋá dimɔndi.»

55 «Too, ŋkúm, a-jajil bí la?

Too, ŋkúm, a-looti bí la^j?»

56 Ŋkúm looti di sá ikpiti, ní ikpiti pɔŋŋu sá mara. 57 Tí jāam̀maan Unimbɔti u nín dìŋfī ti-Dindaan Yeesu Kriisitoo pu ki tìì-ti dijajil diŋyee pu.

58 An puee, m-nabineeŋkaamu, ní nīn ŋúb́ an píkí, kí báań inyaan kí nīn tūm̀maan ti-Dindaan tundi kí taa gbèen̄, kí nīn nyí yii ni-tundi kaa làá gbíntí fám.