2 Kɔranti 2

1 An pu ní m ká yii an ŋān̄ ḿ taa dāan̄ ni-cee kí fàtīí tí kɔ́ǹ-ni kunimbaau. 2 Kun puee nimbi di tìì-mi kunyannyaau. Kin m yaa kɔ́ǹ-ni kunimbaauee, bilab di làá gíti tīī-mi dipɔɔpindi? 3 Kun yì-tì m ŋmàn̄-ni kugbɔŋuee di sá maa là kí bàń kí ká bin bàà làá tīī-mi dipɔɔpindee ń kɔ́ǹ-mi kunimbaaun, di sá m nyí yii man pɔɔpindi sá nimbi yal, ní ni mun pɔɔpindi sá ma yal. 4 An nìn sá-mi kunimbaau nì dipɔɔbiildi nì nsiim ní m ŋmàn̄-ni kugbɔŋu. An kaa nìn sá kí kɔ́ǹ-ni kunimbaau pu ní m ŋmàn̄-ni, ama an nìn sá ní ŋmā kí béé dineendi din bulifi m cáá ni-puee ní.

Pɔɔl dū un yīntiǹ-uee kpitii ki pú-u

5 Unil un di yaa cáań kunimbaau neeyee, an kaa sá man baba ní u kɔ́ǹ kunimbaau, u kɔ́ǹ ki kpáaǹ ni-kɔkɔ ní. Ama kí taa sòoǹ kí càatēe, ni-kansikin biba ní u kɔ́ǹ kunimbaau. 6 Ni-kansikin kupaau nín kpáfì kinyɔkɔ ki dáaĺ udaan tafal miŋyee ŋmāntì. 7 Kɔŋkɔnnee ni máaǹ kí dūú pɔ̄-u kí tīī-u kunyannyaau ú taa gíti kɔ́ kunimbaakpaŋkpaaŋŋun. 8 An puee m gbāam̀-ni, ní dàkàmaan ni-neendi udaan pu. 9 M nìn ŋmàn̄-ni tibɔtee kí cɔ̄ŋkì-ni kí kpèè yii ni tɔ́-mi tiŋman puɔɔɔ! 10 Ni yaa dū unil un kpitii ki pú-uee, ma mun làá dūú pɔ̄-u. Tiba yaa bí ki sá ḿ dūú pɔ̄ udaanee, nimbi puee, m dūu pú-u Kriisitoo nimbiin, 11 án nín làá ŋá pu tí taa yàntī Sitaan ń jī ti-pu dinyandee, kun puee ti nyí u-landɔkɔŋu.

Tibɔti tin páb́ Pɔɔl Troowaasi tiŋkinee

12 M nín bàn̄ Troowaasi tiŋkin kí sòoǹ Kriisitoo bɔmɔntiitee, m nìn ká yii ti-Dindaan pīitì-mi nsan ḿ sòoǹ-tì. 13 Ama m nín kaa ká m-nabiki Tiiti niinee, m-pɔbil kaa nìn sɔ̀m̀ ḿ kàl̄ niin. An pu ní m yíkì bi-cee ki búntì Maseeduwaan^a.

Yeesu Kriisitoo tìì-ti dijajil

14 Tí jāam̀ Unimbɔti Kriisitoo pu, u nín cáá ti mun ki ŋáań u-jajil faalii poon puee. Ti nì Kriisitoo nín ŋá ubaantee puee, u dì ti-pu ki gbìtī ajan kɔkɔ Kriisitoo bɔti kii talaaluee. 15 Ti sá kii talaalu un sɔ́fèe ní Kriisitoo cáa tìì Unimbɔti. Míǹ ní ti tí sá ki tīī binib bin ká difiilee nì bin mun wáŋkèe. 16 Bin wáŋkèe ceeyee, an sá ŋkúm nunuŋu ŋun cáǹ ŋkúminee, ní bin ká difiilee ceeyee, an sá dimaŋfal sɔnsɔfiŋu ŋun tìì dimaŋfalee. Ŋma di bàn̄ kí tɔ̄ an tundi gbanti? 17 Timbi kaa sá kii binib tikpil bin dū Unimbɔti bɔti ki kpántì dibàntilee, ti sá ibaamɔn nib ní, Unimbɔti di lēē-ti ki tú. Ti nín ŋá ubaanti nì Kriisitooyee pu ní ti sòoǹ Unimbɔti nimbiin.