2 Tiimootee 2

Yeesu Kriisitoo janjamɔntiu

1 Míǹ puee sii man biki, pɔ́ɔǹ a-ba nì tiŋan tin ti ká ti nì Yeesu Kriisitoo nín ŋá ubaantee pu. 2 A nín gbìl̄ m sòon̄ tin diniwul nimbiinee, dū-tì kí ŋúbiǹ binib bin yú deedee ki ŋūǹ kí dàkèe, bi mun ń ŋmā kí dūú dàkà bin kíǹee.

3 Si mun kūtì kí jī falaa kii Yeesu Kriisitoo janjamɔntiuee. 4 Ujanjal un là kí tɔ̄ ditundi kí fáatíǹ u-kpiliuee kaa ti yì u-ba kí ŋá kii binifantantiibi nín tɔ́ bi-ba ki ŋáań miŋyee. 5 Kí wàatī un cūtì ditaatandi kpaŋkpakantikuuee ń ŋmā kí sāǹ kí jītí bin kíǹee pu kí nīn sá upeepeekaa kí fōō tipaalee, see ú nīn sáń ki táá nì kpaŋkpakantiku marau^a. 6 Ukpaal un di kùn̄ u-saaku nì digìńdee di dāa tí sá upeepeekaa kí lēeń tijin u-saakun. 7 Á dàkafì tibɔti tin m sòoǹee pu, kun puee ti-Dindaan làá tūtuǹ-si á gbìl̄ ti-taapu kɔkɔ.

8 Á téetí Yeesu Kriisitoo un fīkitì ditaŋkpiilinee pu. U sá Daafiidi naantiiu kii Tibɔmɔntiil tin m sòoǹee nín tùkū-ti puee ní. 9 Tibɔmɔntiil gbanti sòontam pu ní m bí ki jīǹ falaa bi bóob́-mi ikusaka kii m sá unikpitee, ama baa bóob́ Unimbɔti bɔti tíǹ. 10 An pu ní m ŋmèé tikɔkɔ án nín làá ŋá pu bin Unimbɔti lútèe ń ŋmā kí ká difiil din bí Yeesu Kriisitoonee, nì tinyool tin làá nīn bí jaanjaanee. 11 Tibɔti tin m làá sòoǹee sá ibaamɔn ní:

«Ti nì u yaa kpáfì ki kpíìyee,

see ti nì u ń dāá nīn tí bí dimaŋfalin.

12 Ti yaa pɔ́ɔǹ ki tin kátì-kuee,

ti nì u di dāa tí jīǹ dibeel.

Ti yaa néè yii taa nyí-u,

u mun làá dāá néé yii waa nyí-ti.

13 Ti yaa kaa yúliǹ-u deedee,

úǹ làá nīn yú deedee,

kun puee waa ŋūǹ kí néé kí kpántí u-deedeebítam^b.»

Utɔntɔnli un sá umɔntee

14 Á téetí bi-kɔkɔ kí tùkù-bi yii nì Unimbɔti puee, bí taa nín̄ kpākantí tɔb anyɔɔbun aba pu. An nikpɔŋkpɔkɔkuee kaa cāabìń tiŋan, ama an bíiĺ bin pílifée ní. 15 Pɔ́ɔǹ a-ba Unimbɔti ń ká-si kii utɔntɔnli un tuuŋŋi kaa cāabìń icooyee, kí sòoǹ ibaamɔn Bɔmɔntiitee nín sá puee deedee. 16 Taa cèeǹ a-nyɔkɔ tibɔfan nikpɔŋkpɔkɔku kun nyáń tiba nì Yeesu Kriisitoo bɔti tin a fōōyee, di sá bin ŋúb́ an bɔtee mɔ̀tīi gáatí Unimbɔti nimbiin ní. 17 Binib gbanti dàkatam bí kii mbuunee ní ki ŋmóò ki lɔ̀tī tiwun. Imeenee^c nì Fiileeti mun bí binib gbanti kansikin. 18 Bi nyáń ibaamɔn saŋŋu poon ki yāntì bi-jutiibi bin fōō Yeesu ki kííyee fá bi-fookiiu bi nín lì yii dooooyee ní bitaŋkpiibi fīkitèe pu. 19 Ama nì míǹ kɔkɔee, Unimbɔti bɔnyeel din u dūu tíĺ taapuee pée pɔ̄ɔ̄ ní ki yú di-laŋki. An bɔnyeelee di sá yii: «Ti-Dindaan nyí bin sá u-yabee^d», ní «Un kamaa nyí yii u sá ti-Dindaan yɔuee máaǹ kí fá ikpiti.»

20 Diciŋkpaandinee, an kaa sá sindaariya nì animbil kúti booŋŋi baba di bí, ama aboon ŋin bi máń nì kuyɔkɔuee nì itúun mun bí. Sindaariya nì animbil kúti booŋŋi yú ki cí iwiŋkpaan dal ní, ní itúun nì aboon ŋin bi máń nì kuyɔkɔuee sá báà ŋma ń nīn cáa ŋáań min u lèe. 21 Un yaa fá ikpiti in bɔti m sòoǹee kpántì umɔnti dee ki sá kii sindaariya booŋŋi ŋin yú ki cí iwiŋkpaanee. Di sá yii u bí ki tīī u-kpiliu an kɔkɔ pu ú dū-u kí tɔ̄ atummɔnti.

22 Á fá tinaacimpɔn landɔkɔkpitii kí nyàab̀ deedeebítam nì fookii nì dineendi nì ŋgbansɔŋfi, sii nì bin kɔkɔ jáaḿ ti-Dindaan nì dipɔɔmɔntiilee. 23 Ama á fá fám fám nikpɔŋkpɔkɔku kun sá tibɔfanee, kun puee sii a-ba nyí yii an nikpɔŋkpɔkɔkuee pée kúntí nì kujaau ŋma ní. 24 An mun kaa máaǹ yii ti-Dindaan tɔntɔnliu nì binib ń nīn jáà, ama u máaǹ kí nīn néeń báà ŋma, kí nīn ŋūǹ ki dàkà binib nì kimɔtii. 25 U máaǹ kí nīn sá unil un mɔ̄ee kí ŋmā kí dàkà bin kpākantí-uee. An yaa yíì Unimbɔti táá yàntī bí kpántí bi-bimbim kí ŋmā kí béé ibaamɔn, 26 kí gítiń nsammɔnti poon kí ŋmátí Sitaan taliŋku kun sàl̄-bi ki yāntì bi ŋáań min u lèe.