2 Tiimootee 4

1 M bíi kpáafí-si tibɔti nee Unimbɔti nimbiin nì Yeesu Kriisitoo un làá dāá sòoǹ binifoobi nì bitaŋkpiibi bɔtee nimbiin, úǹ un làá dāá dāan̄ kii ubɔtee: 2 Á sòoǹ Unimbɔti bɔti. Báà ŋyunti yaa pɔ̄ɔ̄yaaa, ŋu yaa pɔ̀fàaa, á nīn pée cɔ́ tibɔti gbanti pu, kí dàkà binib bi-yìntitam kí wòoǹ-bi bi-kpitii pu, kí tīī-bi kunyannyaau. Á nīn cáá kimɔtii tikpil a-dàkatam poon. 3 Kun puee iyunti iba dòoń binib kaa dāa gíti là kí pīlifì ibaamɔn dàkatam. Ama bi dāa nōotí bíǹ bi-ba nín fáatì miŋyee ní ki dāa kpáfí bidakaliibi kupaau bi-cee, ní bíǹ dàkà-bi tin bi là kí nīn pílifée. 4 Baa dāa gíti là kí pīlifì ibaamɔn, see bitiŋkpikib nín nìn ŋáań tiŋyee ní bi dāa néeń ki pílifí. 5 Ama sii ń ŋúb́ a-ba an kɔkɔ poon, ní kí ŋmèè falaa kí tɔ̄ a-tundi din sá Tibɔmɔntiil sòontamee. Tɔ̄ ditundi din sá Unimbɔti tɔntɔnliu tundee.

6 Ama an yaa kíǹ mamee, ŋyunti bāań ḿ dū m-ba kí ŋá saraa, man kúm yuntiŋu bāań. 7 M jáń kujamɔntiiu, m sáǹ ki bàn̄ ditaatandi kúntilaŋki ki gbíntìi ŋúb́ m-fookiiu. 8 Kɔŋkɔnnee dijajil paati di dɔ̄ ki cí-mi. Tíǹ di sá difiil beefuuliiki kin Yeesu un sá ibaamɔn bɔsoonliuee làá dāá tīī-mi ŋwindalee. An kaa dāa sá man baba ní u làá tīī, ama bin bin kɔkɔ néeń ki cí u-gítintamee.

9 Á pɔ́ɔǹ kí dāan̄ m-cee malaa, 10 di sá yii Deemasi dū-mi ki fá ki búntì Teesalooniiki, kun puee u néeń duulinya un poon ti bí nee tikpil. Kriiseensi búntì Galaati, ní Tiiti mun búntì Dalmatii^a. 11 Luuki baba di pée kíǹ m-cee. A yaa dòońee, á kpáaǹní-mi Maarki, kun puee u ŋūǹ kí dāá tūtuǹ-mi m-tundi poon^b. 12 M dū Tiisiiki ki tú Eefeesi^c. 13 A yaa dòońee, á taa súntí kí kpáaǹní-mi m-bɔkutifɔkɔl din m nìn yāntìń Troowaasi tiŋkin Kaarpusi ceeyee, kí kpáaǹní-mi m-gbɔnti, cilinjee tigbɔn tin sá igbanee^d.

14 Ucaa Aleekisandir ŋá-mi inikpiti tikpil. Ti-Dindaan làá dāá pà-u atuun ŋin u túńee paati^e. 15 A mun ń nīn nyíǹ-u, kun puee u nìn yíì kpataaa kaa là tibɔti tin ti sòoǹee.

16 Bi nín péé péé ki cúú-mi ki cáá ibɔsoonee, báà ubɔ kaa yúl̀ m-boon. Bi-kɔkɔ dū-mi ki fá ní. Unimbɔti ń taa dūú ŋá-bi tibɔti. 17 Ama ti-Dindaan yúl̀ m-boon ki tīī-mi mpɔn m ŋúń ki sòon̄ Unimbɔti bɔti mmɔntiimin ki yāntì bin kaa sá Juuda yabee kɔkɔ gbìl̄ tibɔti gbanti, ní m nyáń gbikinti nyɔkɔn. 18 Ti-Dindaan làá nīn pée nyāntí-mi tibɔkpitil kamaa poon míǹ ní kí dāá cáá-mi kí kɔ́ǹ yilpu Beelin nì alaafiya. Úǹ di sá tinyooldaan kí nīn pée cá jaanjaan! Ameeni.

Ijaam iluŋkikaa

19 Á jāam̀ Priisiil nì Akiilasi, ní kí jāam̀ Ɔneesiifɔɔr dicaŋkun yab^f. 20 Eeraasiti gbíntì Kɔranti ní Troofiim būǹ. M yāntì u gbíntì Miilee^g. 21 Á pɔ́ɔǹ a-ba kí bàń-mi kí wàatī tiwool yuntiŋu ń nín bàń.

Eebulusi nì Pudansi nì Liinusi nì Kloodiya nì nnabiyaamu kɔkɔ jáaḿ-si.

22 Ti-Dindaan ń nīn bí a-cee.

Unimbɔti ŋanti ń nīn bí ni-pu.