Kugbɔŋu kun bi ŋmàn̄ ki tīī
Eebru
yabee
Unimbɔti dī u-Jipɔɔn pu ki sòon̄
1
1 Dooooyee, Unimbɔti nìn dī u-bɔnaatiliibi pu nì nsàmbiyaamu tikpil pu ki sòon̄ nì ti-naanjab ŋfunyɔm tikpil. 2 Ama iyunti in sá ijoolkaa nee poonee, u dī u-Jipɔɔn pu ní ki sòon̄ nì ti. Unimbɔti dī u-Jipɔɔn gbanti pu ní ki náań duulinyaa nì tin kɔkɔ bí duulinyanee. Úǹ ní Unimbɔti lēē ní ki dū tikɔkɔ ki ŋá u-ŋaan. 3 U-pu ní ti kāntí Unimbɔti nyooti nín jìl̀ miŋyee. Úǹ di sá Unimbɔti naŋku, ní ki cáá u-nyɔɔbundi din sá mpɔnee ki ŋúb́ duulinya kɔkɔ. U fíntì ti-kpitii. Boonee ní u nín jɔ́ḿ yilpu ki cūtìi kāl̀ Unimbɔti Mpɔŋkpaandaan ŋaŋgiil púb.Unimbɔti Jipɔɔn jítiǹ ituun
4 Kii Unimbɔti Jipɔɔn nín jítiǹ ituun puee, míǹ ní u-yindi mun tí jítiǹ ituun yaŋ. 5 Di sá yii Unimbɔti kaa lī ntuun ŋubɔ dalba yii:
«A sá m-Jipɔɔn,
kí yòon̄ díǹ kí nīn cée,
man di sá a-Baa.»
Waa láá sòon̄ ntuun ŋubɔ pu yii:
«Man di làá nīn sá ŋu-Baa
ní ŋú nīn sá man Jipɔɔnc.»
6 Ŋyunti ŋun u dū u-Jipɔŋkpiliu gbanti ki túnní duulinya poonee, ní u bí yii:
«Unimbɔti tuuŋyi kɔkɔ ń gbàan̄ kí nyɔ̄ŋkì-u.»
7 Kpèè Unimbɔti nín sòon̄ ituun pu yii i sá kuŋyee sèé, yii:
«Ituun yáb̀ kii kubuŋuee,
ní ki tūǹ úǹ tundi,
ní ki tùm̀ kpaŋkpam kii ŋŋmee
ki tūǹ u-tundid.»
8 Kpèè u nín sòon̄ u-Jipɔɔn pu miŋyee sèé, yii:
«Unimbɔti, a-beejal pée bí ní kí nīn cá jaanjaan.
A làá jī a-beel nì deedee ní.
9 A néeń tin bí deedeeyee ní ki ná tin kaa ŋān̄ee.
An pu ní Unimbɔti, a-Nimbɔtiu, lútì-si,
ki bātì dipɔɔpindi kpam ki sītì a-yil pu.
U kāaǹ-si tinyool kakaaŋu, a jítiǹ a-jutiibi kɔkɔe.»
10 Ní Unimbɔti gíti bí yii:
«Ŋkilkaaminee, sii ti-Dindaan di nìn náań kitiŋ,
a-ŋalii ní a dūu náań kutagbɔŋu.
11 Tíǹ kɔkɔ làá dāá púĺ ní kí sátí kii dibɔkutilee
ní kí kpú,
ama sii làá nīn pée bí ní.
12 A làá dāá kpáb́ yilpu nì taapu kii kukampeeuee,
ní kí cáań tipɔn kí kpántí tikpikil kii bi nín kpántí dibɔkutil pu
kí dū dipɔndi kí pèen̄ puee ní.
Ama sii làá nīn pée gbíntì ki bí min a bée ní,
aa làá púĺ jaanjaanf.»
13 Unimbɔti kaa láá lī ntuun ŋubɔ dalba dalba yii:
«Kàl̄ m-ŋaŋgiiliŋu pú yéè
kí nīn cí ŋyunti ŋun m làá dū a-nannanliibi
kí bíĺ a-taapu á tāā-beeg.»
14 Unimbɔti tuuŋyi di kaa sá bin kɔkɔ sá ŋfam ki bí ki tūǹ Unimbɔti tundeeee? U tūnní-bi ní bi dòoń ki tútúǹ bin làá ká difiilee.