Eebru 4

1 Kii dipoondi din sá tí kɔ́ Unimbɔti ŋuŋfilinee nín dáá bí pu nee, tí fàŋkìmaan, ni-kansikin ubɔ ń taa ŋá u-ba kí dāá gbíntí boon. 2 Kun puee bi sòon̄ Tibɔmɔntiil ti gbìl̄ kii bi nín nìn pée tí sòon̄ nì ti-naanjab bi mun gbìl̄ puee ní. Di sá bi nìn gbìl̄ tibɔtee kɔkɔ, ama ní kaa fōotìi yīkiǹ, kun puee bi nín nìn gbìl̄-tèe, baa nìn fōō-tì ki kíí. 3 Timbi bin fōō ki kííyee, ti làá kɔ́ diŋuŋfil laŋki, laakin ní Unimbɔti lī yii:

«M nìn gíí diŋuul ki pūtì yii

mpaan ŋun m bɔ́ntì bí bàà kɔ́ kí kàl̄ kí ŋùŋfèe nee,

bi kpá kí kɔ́^a!»

U nìn lī míǹ, nì min kɔkɔ u nìn bɔ́ntì u-tundi ki síiǹ ki wāatì ní ki nín náań duulinyee. 4 Di sá Unimbɔti gbɔŋku poon sòon̄ ŋwinluluúti pu yii: «Unimbɔti ŋūŋfì u-tuuŋŋi kɔkɔ pu ŋwinluluúti dal^b.» 5 Ní an dāa nín sòon̄ doo yii: «Unimbɔti bí yii: <Bi kpá kí kɔ́ mpaan ŋun m bɔ́ntì binib ń kɔ́ kí ŋùŋfèe ni^c.>» 6 Bin bi nìn péé péé ki sòon̄ Tibɔmɔntiilee ki tīīyee nìn ŋá mpɔɔgbifin, an puee baa nìn ŋúń ki kɔ́ diŋuŋfil gbanti poon, ama dipoondee dáá gbíntìi bí, biba làá ŋmā kí kɔ́. 7 Kun puee Unimbɔti gíti yóoǹ ŋwimpɔɔn ŋun binib làá kɔ́ u-ŋuŋfil laŋkee. Ŋúǹ di sá «díǹ». Di sá yii abin kupaau boonee, u nìn gíti yāntì ubɔti Daafiidi sòon̄ an pu, kii ti nín dáá kàan̄ní-tì pu nee yii:

«Ni yaa gbìl̄ Unimbɔti bɔti díǹ,

ní taa ŋá mpɔɔgbifin^d.»

8 Di sá yii laakin Joosuwa nìn cáá Isirayeel yab ki cūnnèe di yaan nìn sá diŋuŋfil laŋki^e, laakin Unimbɔti bée, Unimbɔti kaa bàà nìn gíti sòoǹ diŋuŋfil diba mun pu. 9 An puee, ŋwiŋŋuŋfikaa mmɔnti ŋubɔ gíti bí nyɔkɔpu ki cí bin sá Unimbɔti yabee. 10 Un yaa kɔ́ laakin Unimbɔti kā ki ŋùŋfēe mun ŋùŋfī ní. Kii Unimbɔti u-ba nín náań duulinya ki dóò ki kā ki ŋùŋfī puee, míǹ ní udaan mun yàntī u-tuuŋŋi kí ŋùŋfì. 11 An puee, timbi ń pɔ́ɔǹ ti-ba kí kɔ́ diŋuŋfil gbanti poon, kí taa fōō ti-naanjab yaŋyam kí lántí-dì.

12 Di sá yii Unimbɔti bɔtee, tì cáá dimaŋfal ní, ní ki tūǹ ditundi ki jītí ki jítiǹ bɔlfi un jītí ajan liitil puee, ki gífí malaa, kí cúú kinaŋ nì ŋfam kí yàkatī tɔbin, ki kóò dikpabilin ki bà ncoom, ki béetí unil nín màkà kí ŋá puee nì u-pɔbil poon landɔkɔi. 13 Tiwannáaŋkaal tiba kaa bí Unimbɔti kaa wāĺ-tì. Tin kɔkɔ pée bí duulinyanee dɔ̄ mpaampiin pu ní úǹ cee. U-nimbiin ní ti làá dāá sòoǹ ti-nyɔkɔpu yai.

Yeesu, usaraaŋakpil un jítiǹ bin kɔ kíǹee

14 Yeesu, Unimbɔti Jipɔɔn di sá usaraaŋakpil un sá ukpaan ki jɔ́m̀ doooo yilpu fɔ́ŋŋŋ kí nīn tútúǹ-tee. An puee tí mɔ̀tīí nīn ŋúb́ fookii un ti cáá u-puee gbīŋgbim. 15 Kun puee timbi saraaŋakpiliuee sá un nyí ti-wɔfii ki sūǹ ti-saayee. Di sá yii u gíiǹ u-ba kii timbee ní, nniyaamin, ní ki béè iwɔsɔfi, ní Sitaan cɔ́ŋkì-u ama waa lítì ikpitin. 16 Míǹ puee, kámaan kunyannyaau kí sútiń kí pìl̄maan Unimbɔti beejal nì dimákal. Niin ní u-ŋanti bí. Niin ní u làá dàkà-ti u-ŋanti kí dū ti-kpitii kí pɔ̄-ti ní kí tūtuǹ-ti ŋyunti ŋun an máaǹee.