Eebru 8

Yeesu di sá ti-saraaŋakpiliu

1 Tibɔti tin kɔkɔ ti sòon̄ nee, dibɔyil di sá yii, an saraaŋakpiliu juti ní ti cáá u kā yilpu Unimbɔti Mpɔŋkpaandaan ŋaŋgiiliŋu pú^a, dibeelin, tinyool laŋki. 2 Úǹ sá usaraaŋakpil un tūǹ ditundi laakin ti-Dindaan Unimbɔti u-ba máń an sá circiree ní, an kaa sá tanti un binib gāāyee poon kii bisaraaŋaliibi bin kíǹee nín ŋáań puee.

3 Bi kāaǹ bisaraaŋakpilib bí nīn ŋáań saraabi ki jáaḿ Unimbɔti ní kí nīn ŋáań saraabi binib kpitii pu. An puee u máaǹ kí nīn cáá tin tin u làá dūú ŋá saraayee. 4 U yaa bàà bí duulinyan doo, waa bàà ŋūǹ kí nīn sá usaraaŋal kpaŋkpam. Di sá yii bisaraaŋaliibi bí ki ŋáań saraabi kii Juuda yab marab nín lī yii bí nīn ŋáań miŋyee. 5 Saraabi bin bisaraaŋaliibi ŋáańee sá tin bí yilpuee naŋku ní, a lì kii Unimbɔti nín nìn dū yilpu diiku bítam kɔkɔ ki dàkā Mooyiisi u gāā-u tanti taapu doo puee ní. Unimbɔti bí-u yii: «Á kpèè kí gāā-mi tanti ú nīn bí kii un m nìn dàkā-si dijool puee deedee^b.» 6 Ama kɔŋkɔnnee ditundi din Kriisitoo bí yilpu ki tūǹee jítiǹ Juuda yab saraaŋaliibi nín tūǹ ŋiŋyee, di sá Kriisitoo kúm di yì-tì ní Unimbɔti pōoǹ-ti dipoondi din sá dimɔntiil ki jítiǹ dikpikilee.

7 Dipoompeepeekaal^c din Unimbɔti nìn pōoǹ ti-naanjabee yaa nìn sá dimɔntiilee, an kaa bàà gíti bàlifī yii bí kpántí diba. 8 An pu ní Unimbɔti nìn bíi wòoǹ-bi ki tùkù-bi yii:

«Man ni-Dindaan di lī yii iwiin bí ki dòoń

in poon m làá fàtīí pòon̄ Isirayeel yab nì Juuda yab dipoompɔndee.

9 Dipoondi gbanti kaa dāa sá kii din m nìn pōoǹ bi-naanjab

daliŋkin m nìn nyántìń-bi Eejipiti tiŋkinee.

Boonee baa dū dipoondee ki túń ditundi,

ní ma mun kaa ti fātìi tɔ́ bi-bɔti.

10 Ti-Dindaan bí yii: M nín làá dāá líí Isirayeel yab dipoondi diŋyee sèé:

Ŋyunti gbantee, m làá dāá ŋmà m-marab kí ŋá bi-landɔkɔyin

bí ŋmā kí nīn nyí min m lèe,

ní kí dūú ŋmà bi-pɔbiliŋin

bí ŋmā kí nīn ŋúb́-bi kí taa ti súntí.

Míǹ ní m dāa sá bi-Nimbɔtiu

ní bi mun dāa sá man samaau.

11 Ubɔ kaa dāa gíti dàkà u-kɔŋkɔnnaatɔ àá u-nabiki yii

ú nīn nyí ti-Dindaan.

Kí yòon̄ bi-kansikin mbiyaawaamu

kí tin cáá sāā bikpaambi,

báà ŋma làá dāá béé-mi.

12 Kun puee m làá dāá sɔ̄ bi-saai

kí dū bi-kpitii kí pɔ̄-bi,

kaa làá ti pée téetí bi-kpitii gbanti pu^d.»

13 Unimbɔti nín sòon̄ dipoompɔndi bɔtee, mimmee din béeyee ŋá dikpikil dee. Tiwan yaa ŋá tikpikilee ti púĺ dee, ki làá kúntí mun.