उत्‍पती
जगमतुन आनि मनकलुर्कुन पुटुसमड
1
1 मोट्‍टा मोदाला पेन बूमि आनि मब्बुकुन पुटिस्ता. 2 अस्के बूमिकु आकारम हिल्‍लक मत्‍ता. इंका सुमसाम मत्‍ता. एतापोर्रो हिर्रु हीकट मत्‍ता. अय्ते पेनदा आत्मा आ एतापोर्रो तिरियसेक मत्‍ता. 3 अस्के पेन ‘वेलगु आयी’ इत्‍तस्के, वेलगु तयार आता. 4 आनि पेन वेलगुन हूळसि, “इद बेस मंता,” इत्‍ता. पजा पेन हीकटताल वेलगुन वेरे कीता. 5 आनि हिकटतुन नर्का आनि वेलगुन पिय्यला इंचि पेन इत्‍ता. इल्हा पोळदु होंचि पंग आता. इदे मोदोलता रोजु आंद.
6 पजा पेन मर्रा, “ई एता नड्‍डुम उंदि अंतर आसि एतद रोंडु वेरे-वेरे बागाल्क आयि,” इंचि इत्‍ता. 7 इल्हा पेन एता रोंडु बागाल्कुना नड्‍डुम उंदि अंतर कीसि हिळता एतुन आनि पोर्रोटा एतुन वेरे कीता. आनि अद अल्हे आता. 8 पजा आ अंतरतुन पेन 'मब्बु' इंचि इत्‍ता. पोळ्‍द होंचि, पंग आता. इद रेंडोव रोजू आंद.
9 पजा पेन “मब्बुना हिळता एर उंदि जेगाते जमा आसि, वत्‍तुता जेगा दिस्सिकांटि,” इंचि इत्‍ता. आनि इत्‍तापे आता. 10 अस्के पेन, दिस्ता आ जेगातुन 'बूमि' आनि जमा आता एतुन बारे 'समुद्रम' इंचि इत्‍ता. पजा पेन हूळसि, “इद बेस मंता,” इत्‍ता. 11 इंका पेन, “ई बूमिपोर्रो पच्‍चटा जाळि, पेडेक मनना सिना-सिना मराकु, इंका पंडिं पंडांना मराकु अवुना पेडेक अवुंके विज्जां आयानसोंटा मराक पुट्‍टीं,” इंचि इत्‍ता. आनि अल्हेने आता. 12 इल्हा बूमिपोर्रो पच्‍चटा जाळि, सिना-सिना पेडेकुना मराकु आनि कायां हादना मराक पुट्तां. पजा पेन हूळसि “इद बेस मंता,” इंचि इत्‍ता. 13 मर्रा पोळ्‍द होंचि, पंग आंता. इद मुडोव रोजू आंद.
14 पजा पेन, “नर्का आनि पिय्यला वेरे-वेरे अन्‍पिच्‍चलय मब्बुने ज्योतीं आयगोम. आनि अव, चिन्हां, कालाल्कु, वर्सानाहाटीं आनि रोज्कु हुप्‍सनाहाटीं आयीं. 15 इंका आ ज्योतीं मब्बुने मंचेके बूमिपोर्रो वेलगु हियालय आयीं,” इंचि इत्‍ता. आनि अल्हे आता. 16 अस्के पेन रोंडु पेद्‍दे ज्योतीं तयार कीता. अव्टेटाल पेद्‍दा ज्योतीतुन बारे पियला वेलगु हियालय कीता आनि सिन्‍ना ज्योतीतुन बारे नर्कळकु वेलगु हियालय कीता. इच्‍चोने आयका पेन सुक्‍कां इंका तयार कीता. 17 अव पोर्रो मंचेंके हिळु बूमिपोर्रो वेलगु हियालय, इंका नर्का-पिय्यल वेलगु हीसि हीकटतुन वेलगुनाल अलग कियाना इंचि मब्बुने ज्योतीं इर्ता. 19 इल्हा पोळ्‍द होंचि, पंग आंता. इद नालुंगो रोजू आंद.
20 मर्रा पेन, “ई एते जिवजंतुल्कु पुट्‍टिसि निंडिस होन्‍निं. आनि बूमिपोर्रो मनना पिट्‍टें मब्बुकुनदाका परयींकांटी,” इंचि इत्‍ता. 21 इल्हा पेन एते रकारकाल्कुना जातिना ताकानव-बेंगानव पेद्‍दा-पेद्‍दा जिवजंतुल्कु पुटिस्ता, दानहेंका पूरा एर अंता आ जिवजंतुल्कुनतोनि निंडिसोत्‍ता. इंका पेन रकारकाल्कुना जातिना परियना पिट्‍टेंगुडा पुटिस्ता. पजा पेन हूळता आनि “बेस मंता,” इत्‍ता. 22 पजा अवुन, “मिमेट पलिंचट, वेल्‍लेक आम्टु, इंका पूरा समुद्रमते निंडिस होंटु, आनि पिट्‍टें बारे बूमिपोर्रो बेर्सीं,” इंचि आसिर्वादम हीता. 23 इल्हा पोळ्‍द होंचि, पंग आता. इद हेयुंगो रोजू आंद.
24 पजा पेन, “ई बूमिपोर्रो उंद-उंदि जातिता जीवाते मनना जिवरासीं इत्‍ते, नाटेन पीसि मनानव, बेंगानव, केडाते मनानव जिवरासीं अवुना जातिननुसार पुट्‍टीं,” इंचि इत्‍ता. अस्के अल्हे आता. 25 ई परकारम पेन बूमिपोर्रो केडा पीसि मनना जातिता जिवरासीं, नाटेन पीसि मनना जातिता जिवरासीं इंका बेंगाना जातिता जिवरासींन पुटिस्ता. आनि अवुन हूळसि, “बेस मंता,” इंचि इत्‍ता.
26 पजा पेन, “अय्ते इंदके मनकन मना रूपमते आनि मना समानम तयार कीकोम, आनि ओर समुद्रमते मनना जिम्मां, मब्बुने परियना पिट्‍टें, बूमि पिसी बेंगना अन्‍नि जिवरासींन पोर्रो इंका अचोने आयका ई बूमिपोर्रो मनना अन्‍नि रकाल्कुना जिवरासींन पोर्रो ओर राज्येम कियनुर,” इंचि इत्‍ता.
27 इल्हा पेन दाना सतता रूपमते इत्‍ते सुद्‍दू दानलेह्केन मनकन पुटिस्ता. अद मनकन, मुरतळ आनि मांडसा इल्हा तयार कीता. 28 पजा ओर्क पेन, “मिम्मेट पलिंचट. आनि ई बूमि अंतटा निंडिस होंटु. आनि ई बूमितुन मी कय हिळु कीकुंटु. अचोने आयका परियना पिट्‍टेन, समुद्रमते वेलियना जिम्मन, इंका बूमिपोर्रो तिरियना प्रति जिवरासीतुन मीवा कय हिळु कीकुंटु,” इंचि आसिर्वादम हीता. 29 मर्रा पेन ओर्क, “हिके केंजट, ई बूमिपोर्रो मनना विजां हियना हरेक मोल्कातालय्ते आ मोल्काताल बेरसि पंडीं पंडांना हरेक मरातुन नना मीकु हीतन, इदे मीकु तिंडि आंदु. 30 इंका वळिते परियना पीट्‍टेनहाटीं, एते मनना जिम्मानाहाटीं अल्हेन बूमिपोर्रोटा अन्‍नि जिवरासीनहाटीं नना पच्‍चटा जाळि आनि सिना-सिना मराक हीतन,” इंचि वेहता. आनि अल्हेन आता. 31 पजा पेन अद कीतावुन अन्‍नि हूळसी, “हूळट, इद वेल्‍लेन बेस मंता,” इत्‍ता.
इल्हा पोळ्‍द होंचि पंग आता. इद हारुंगो रोजू आंद.