रूत
देसेमते पेद्दा कर्वु अरमड
1
1-2 बस्के अय्ते इस्राएल देसेमते न्यायम कियानोरा राज्येम मत्तनो, अस्के आ देसेमते पेद्दा कर्वु अरसि मत्ता. आ कर्वु इच्चोन कतरनाक मत्ता गदा, अगा तिनालय गाटो इंका दोर्काकोंदु. अस्के एलिमेलेक इनना एप्राता वसंमतोर वरोर इस्राएल मनकल ओना मुत्तो नाओमि आनि इव्वुर मर्क वरोर महलिन आनि इंका वरोर किलयोन ईर्कुन पीसि ओर ओना यहुदिया एरियाता बेतलहेम इनना सहरतुन होडसिसि मोआब इनना गुट्टाना देसेमते होत्तोर, होंचि अगेने जेगा पीतोर. 3 कोन्नि रोजकुंक नाओमिना मुय्दो एलिमेलेक हासोत्तोर. हासोत्तस्के नाओमि आनि दाना इव्वुर मर्क महलिन आनि किलयोन इर मुव्वुरे पिस्सी मत्तुर. 4 मननेंके-मननेंके दाना इव्वुर मर्क अदे मोआब देसेमता रोंडु पोरिह्कुनतोनि मरमीं आतुर. उंदि पोरिन पोर्रोल ओर्पा आनि इंकुंदान पोर्रोल रूत. इल्हा ओर आ मोआब देसेमते दगेर-दग्गेरा पदि वर्सां मत्तुर. 5 पजा दाना इव्वुर मर्क महलिन आनि किलयोन ईर इंका हासोत्तुर. दाना मुय्दो आनि इव्वुर मर्क हासोत्तस्के बिचारी नाओमि बेके दिक्कु हिलाकोंटा आता.रूतना निर्नायम
6 अस्के नाओमिंक मोआब देसेमते इल्हा तेळियता गदा, यहुदिया एरियाते दाना लोकुल्कुना पोर्रो यहोवा पेंदा दया वासि वेल्ले बेसता पंटा हीता. 7 अदुनहाटीं नाओमि गुट्टाना मोआब देसेम होळसना विचारम कीता. अस्के दानां रोंड कोळियाहकु इंका, दानतोनि होनालय तयार आतां. अस्के अव इच्चुं रोजकु मत्ता मोआब देसेम होडसिसि मर्रा यहुदिया एरियाता हर्रि पीतां. 8 अस्के नाओमि कोळियाह्कुनतोनि,‘‘मिमेट मीवा-मीवा तल्लुर-बाबोना नार होन्टु. बारित्ते हासोत्ता मर्कुन पोर्रो हुपिस्ता पावरम ना पोर्रो हुपिस्तिट, अल्हेन मीवापोर्रो इंका यहोवा पेन दया कियिकांटि. 9 मीकु इव्वुर्कु इंका बेसता मुय्दुर दोर्कीसि बेस सुकमते मननाहाटीं आ यहोवा पेन मीकु सहायम किय्यि इंचि नना कोरसंतन,’’ इंचि इत्ता. आनि रोंडुन इंका अळसेक तोड्डि बुर्ता. पोरळ अळानद हूळसि कोळियाह्कुंक दुक्कम वाता, आनि अविंका अळालय दल्गुतां. 10 पजा रोंडु कोळियाह्क इंका, ‘‘हिल्ले, मोमोट इंका नितोने वांतोम, नीवा लोकुल्कुनेन कलियसि पिस्संतोम,” इंचि पोरळतोनि इत्तां. 11 अल्हा इत्तास्के, नाओमि, ‘‘मिमेट नातोनि बारि वांतिट बिड्डा? मिमेट मी लोन तिरियसि होंट, बारि इत्ते, नना मीकु बतले सहायम किया परोन. इंका मीकु मरमीं कीसि हियालासिंक नहगा मर्क इंका हिल्लुर. 12 मिमेट मल्सि होन्टु बिड्डा! नना मातिर आताहाटीं मर्रा मरमीं आया परोन. ओकला नना मर्रा मरमीं आयना विचारम कियिना गानि मीकु बतले सहायम किया परोन. अचोने आयका इदे नर्का नना नेला तपसि इव्वुर मर्कुन कनिनागानि बतले पायदा हिल्ले. 13 मिमेट ओरतोनि मरमीं आयगोम इत्ते ओर लेय्योर्कु आयनदाका एदुर हूळसेके मना पींता. मुय्दोनहाटीं मिमेट वेल्लेन रोजकुनदाका एदुर हूळसेक मनमड़ नाकु इस्टम हिल्ले. मिमेट इल्हा एदुर हूळसेके मत्ते नाकु वेल्लेन दुक्कम अनपिच्चंता. नना अय्ते मुन्नेटाले वेल्लेन दुक्कमते मंतन इत्ता संगति मीकु एरपाटे मंता. इंका यहोवा पेनगुडा पोर्रो होंग आसि वेल्लेन कस्टाल्क हीसंता,’’ इंचि इत्ता. 14 इद केंजतस्के अव इंका इरगा अळालय दल्गतां. पजा ओर्पा इनना कोळियड, पोराटुन बुर्ता, आनि होळसि होत्ता. गानि रूत इनना कोळियड मात्रम पोराटुन होळसि होना हिल्ले. 15 अस्के नाओमि, रूत इनना कोळियाटुन, ‘‘हुळा, नीवा हेरीयड अय्ते दाना लोकुल्कुने, दाना पेनकुने होंचि कलियता. निमे इंका अद होत्तापे होंचि कलिया,” इंचि इत्ता. 16 गानि रूत मात्रम, ‘‘निमे नाकुन नावा लोकुल्कुने होंचि कलिया इंचि बारिंक बलमि कीसंतिन? नना निमे बगा-बगा अय्ते दांतिनो, अगा-अगा वांतन, निमे बगा-बगा अय्ते मनांतिनो अगा-अगा नना मनांतन, नीवा लोकुल्के नावा लोकुल्कु, नीवा पेने नावा पेन. 17 निमे बगा अय्ते जीवा होळसंतिनो, अग्गेन नना जीवा होळसंतन, नाकुनगुडा अगेने बोंदा तासगोम. ओक्कला नना इत्ता पोल्लें तप्पानय्ते, नाकु यहोवा पेन पेद्दा सिक्सा हिय्यिकांटि. मनाकुन सिराप हामुरे वेरे किया परंता,’’ इंचि इत्ता. 18 अस्के रूतना पोल्लें केंजसि 'ई रूतुंक अय्ते नातोनि वायानद वेल्लेन इच्चा मंता, इनकुंचि नाओमि दान इंका बतिमलाडा हिल्ले.
नाओमि बेतलहेम सहरते मर्रा मल्सि दांता
19 पजा नाओमि आनि रूतु रोंड कूळसि बेतलहेम सहर एव्वनाल होत्तां. बेतलहेम सहर एवतंका अगाटा लोकुल्कु अवुन हूळसि वेल्ले इचंत्रम आतुर. आनि ‘‘अरे, इद वायनद नाओमि आंद गदा?’’ इंचि इनालय दल्गुतुर. 20 अस्के नाओमि, ‘‘नाकुन नाओमिa इंचि केयमटु, माराb इंचि केयाटु. बारित्ते ताकतवान पेन नावा पिसवरते वेल्लेन दुक्कम वाटसीता. 21 नना इगेटाल होनानेंके नहगा नाकु गावाले मत्तव अन्नि मत्तां, गानि इंदके नाकुन यहोवा पेन दिक्कु हिलवादान कीसि वापस तत्ता. सामिए नाकु दुक्कम हियनेंके, मिमेट बारिंक नाकुन नाओमि इंचि केयंतिट? ताकतवान पेन नाकु वेल्लेन तकलिप कीता,” इंचि ओर्क वेहता. 22 इल्हा, नाओमि आनि दाना मोआब देसेमता लेय्या कोळियड रूत इव रोंडगुडा मोआब देसेमताल तिरियसि वातां. जोन्ना पंटा कोतक वायना वेलाते अव रोंडु मुर्ताह्क यहुदिया एरियाता बेतलहेम सहरते एवतां.