Mu kuhindula kino kitaabo, tushuba mu kulikira ikitaabo kya mbere, íkiyandisirwi mu ndeto yeꞌkiheburaniya na yeꞌkigiriki, gira Igambo lya Rurema lihindulwe mu Kifuliiru nga ngiisi kwo liri. Tunashuba mu lola ngiisi kwaꞌbandi bakahindula mu zindi ndeto kwakundi, gira lyoꞌkikulikirana neꞌbyabo. Ku yukwo, ndaago magambo go tukabalala, tutakanayushuula kwaꞌgandi-gandi magambo.

Kuguma na yibyo, twalooza ukumùkengeeza kweꞌkifuliiru iri ndeto ngeꞌzindi. Na mu kukiyandika bwija, hali ubuhinga bwoꞌkutengeka amagambo, halinde lyo gakulikirana bwija. Kwokwo, mu kuhindula Igambo lya Rurema, byatuhuuna tukizi simbaha yubwo buhinga bweꞌndeto. Neꞌmbere lyoꞌkukihulusa, kyatee hubuulwa naꞌbahinga baꞌmandiko, ábali mu tabaala abahinduzi beꞌBibiriya mu ndeto zaabo. Kino kitaabo kyayandikwa hiꞌgulu lyaꞌBafuliiru ba zeene, na mu kutoola amagambo, tushuba mu looza amagambo ágangayuviikana mu bandu booshi.

Indeto yeꞌkifuliiru iri nguma naaho, naꞌBafuliiru booshi bali mu yuviikana mu kati kaayo. Kundu kwokwo, hali amagambo maguma-maguma go bali mu sigaana kwo mu kudeta, nga «kubumba / kulema», «kulima / kuhinga», «kasindagulo / kasiizira», «ulwivi / uluuvi», «kuyivwima kwo / kuyivwema kwo», naꞌgandi mwene yago. Ku magambo mwene yago, tukalonga ubutabaazi imwaꞌbahubuuzi (réviseurs) ukulyoka mu mashengero. Twamùyinginga, iri mwangabona igambo íriyandisirwi ngiisi kwo mutali mu lideta, mutuyigenderere.

Mu kuheza, twadeta kongwa ku booshi ábali mu huunira iyi mikolwa, na ábali mu gishiga ku njira za kwingi-kwingi. Rurema akizi mùgashaanira ku kyanya mugakizi soma Igambo lyage.

Daata Rurema na Nahamwitu Yesu Kirisito bakizi yivugwa!

\it Abahinduzi : Indeeko yo'kuhindula Ibibiriya mu ndeto ye'kifuliiru,

\it i Kiriba, Sud-Kivu, RDC

Ihifwabe íhiri ku mbeka yiꞌgambo: Mu kino kitaabo, hali igambo liguma-liguma íribiisirwi kweꞌhifwabe hiniini ku mbeka yalyo. Ku mugani: «Hedeni».^a Yihyo hifwabe, hiri mu yerekana kweꞌri mwangalooza ukusobanukirwa niꞌgambo, mukwaniini ukulilola hidako lyaꞌkarataasi, ngiisi ho yihyo hifwabe hiyandisirwi.

Ku mbeka yeꞌkitaabo hali naꞌmandiko magerwa goꞌkutabaala abandu ukumenya umugeeza gwaꞌmagambo maguma-maguma ágayandisirwi mu Bibiriya, nga: Bafirisiti, Bafarisaayo, Kahisaari, naꞌgandi. Iri umundu angalooza ubutabaazi buniini na magambo mwene yago, anatee lola yaho ku mbeka yeꞌkitaabo. Bitangashoboka ukuyandika mwo ngiisi igambo likomo, haliko muli magambo mingi ágangatabaala úli mu soma yiki kitaabo.