Lukas ni kitab i nfamalik Ubu Ni Ivar Lolin
Lukas nfamalik ne, afakinimi ntulis surat ini
1 Baba Teofilus,
ya'a alang oa.
Tamata rivun rasahak roak ma rtulis ivar i nvotuk roak a,
ma rfamalik na'a afa ovi tatuan roak na'a dida vava'at ra.*
2 Ira rtulis wean lahir i trenar roak tali tamata ovi ka'i rsi'ik lahir afa ovi Yesus notu tali lalan a,
beti rti ma rfamalik ivar yai.
3 Ba urenar ovu ubas ma lolin afakataka munuk na'a Yesus,
tali na'ut i beti nvotuk a,
ti naran i roak a.
Ufikir ne,
ni lolin a,
na ususan ma lolin ivar yai veki,
beti utulis lahir na'a surat isa verin oa.
4 Ya'a otu wean inyai,
boma mka'a lahir ne,
afa ovi rair munuk roak verin oa yai,
kena urun.
Ivar na'a amar i rarali Yohanes i nbaptis tamata ra
5 Na'ut i Herodes notu raja na'a propinsi Yudea,
na Yahudi rira mela falurut isa i nkarya verin Ubu nana'a inyai.
Mela falurut yai naran Zakharia.
Ia ntali sidovung mela falurut ovi Abia nban-ulu verin ira.
Awan a naran Elisabet.
Elisabet ini Harun ubun a nusin verin ia.*
6 Zakharia irua awan a rira vava'at ra rmalola na'a Ubu wahan ralan a.
Irua ralarira urun ma rot-orang munuk afa ovi Duila'a nfadoku roak na'a Ni inukun ra.
7 Na'uk irua wol yanarira,
tevek Elisabet wol bisma yanan,
ovu vali na'ut inyai itvata-itrana roak ira.
8 Amar isa,
na'ut i sidovung Abia rira amar ma rfabana rira karya na'a Yahudi rira Rahan Dawan Falurut,
na Zakharia nfabana ni karya i neluk Yahudi rira mela falurut a na'a Duila'a wahan ralan a.
9 Na'ut i rotu undi ma al nfaturu ne,
mela falurut iki veka nfabana ni karya na'a Duila'a Ni Rahan Dawan Falurut,
na undi yai nfaturu Zakharia.
Ba ia nti Rahan Dawan Falurut ralan a ma nasnuri afa i uman voan a lolin urun.*
10 Na'ut i Zakharia nti ralan ma nasnuri afa i uman a voan a lolin urun yai,
na tamata rivun rasdovu ira na'a Rahan Dawan Falurut ni lean a ma raflurut.
11 Ba na'ut inyai,
na Ubu Ni sansinir isa ntali lanit ratan nvotuk ma ndiri lahir wan i ba'i rasnuri afa i uman a voan lolin urun,
ni lihir mela a.
12 Ti ma Zakharia nsi'ik Ubu Ni sansinir yai,
na nabrian munuk ovu nbobar urun.
13 Na'uk Ubu Ni sansinir yai nfalak verin ia ne,
“Zakharia,
deka bwobar,
tevek Ubu nrenar roak mu falurut a.
Awam i Elisabet a veka nrali kasiko'u brana isa.
Oa musti fwanara ia ne,
Yohanes.
14 Ralam a veka lolin urun,
ovu tamata rivun ralarira ra veka lolin urun i vali,
na'ut i kasiko'u yai rarali roak ia!
15 Ira ralarira ra veka lolin,
tevek Ia veka neluk tamata dawan na'a Duila'a wahan ralan a.
Ia wol bis lahir ma nenu anggur te tuat,
ovu na'ut i na'a kevralan obin,
na Ubu Ni Roh a veka nsoru ralan a.
16 Afa ovi nair ra veka notu ma tamata Israel rivun ira rorang ewal Duila'a i rira Ubu verin Ia.
17 Ia veka neluk Duila'a Ni sansinir i ula ia ma nasusan linga'an verin Duila'a.
Ia notu afa yai ovu ngrebat i ntali Ubu Ni Roh a,
wean ngrebat i nala verin nabi Elia.
Ia veka notu ma brana ovi wol malinan obin ovu yanarira ra,
malinan ewal.
Ia veka notu vali ma tamata ovi wol rorang afa ovi Ubu nfalak ra,
rorang ewal Ubu,
ma rira kaka'a wean tamata ovi rira vava'at ra rmalola.
Notu wean inyai,
boma tamata rira vava'at ra inovan ma rarenar Duila'a.”
18 Nata Zakharia nfalak verin Ubu Ni sansinir yai ne,
“Wean inba ma uka'a ne,
afa yai veka nvotuk?
Ya'a itrana roak ya'a ovu vali awang a itvata roak ia.”
19 Ubu Ni sansinir yai nfalak ne,
“Ya'a ini Gabriel.
Ukarya verin Ubu na'a lanit ratan,
ovu Ia nsinir ya'a ma ufalak ivar lolin ini verin oa.
20 Afa i ufalak ini veka nvotuk na'a amar i Ubu nfadoku roak a.
Na'uk oa wol morang,
ba veka wol mungrihi nala oa,
nata ti naran afa i ufalak yai nvotuk.”
21 Na'ut inyai,
na tamata rivun rnaban watan Zakharia.
Ira rsiforat ira ne,
afakinimi mnanat ia na'a Rahan Dawan Falurut ralan a.
22 Ti ma Zakharia ntali Rahan Dawan Falurut ralan a nma murin,
na ia wol nangrihi nala afakataka verin ira.
Ia nala watan liman a ma al notu faneak verin ira.
Ba tamata ra rka'a ne,
ia wean i namifi na'uk wol ntub-lufa ma nsi'ik afa boku na'a Rahan Dawan Falurut ralan.
23 Amar ovi nkarya na'a Rahan Dawan Falurut ralan a nbosal roak,
beti newal ia nti ni rahan.
24 Wol ka'i mnanat,
na awan a Elisabet nbarlewan.
Vulan ilima,
na ia nana'a rahan ralan watan ma tamata ra wol rarea ia.
25 Elisabet nfalak ne,
“Duila'a nfaturu roak Ni rala lolin a verin ya'a,
tevek nlobang roak ya'a ma ubarlewan,
ba wol uma'it roak na'a tamata waharira ralan ra.”
26 Elisabet nbarlewan vulan inean roak,
na Ubu nsinir Ni sansinir tali lanit ratan i naran Gabriel yai,
ma nti ahu isa naran Nazaret na'a propinsi Galilea.
27 Gabriel ti nalola vata mnelat isa naran Maria.
Ia wol ntuba ovu brana obin.
Yusuf i ubun-nusin Raja Daud ntavun teri roak ia.
28 Sansinir yai nti Maria ni rahan ma nfalak verin ia ne,
“Oo titi,
Duila'a naflahar roak oa ovu novun oa!”
29 Ti ma Maria nrenar afa i nfalak yai,
na wol nka'a ne,
veka nanovak aka.
Ba norat watan na'a ralan a ne,
vaivatul ovi ihirira ra wean inba?
30 Ubu Ni sansinir yai nfalak vali ne,
“Maria deka bwobar,
tevek Ubu naflahar roak oa.
31 Oa veka bwarlewan ma mrali oa,
na yanam brana.
Oa musti fwanara Ia ne Yesus.
32 Ia vali veka nana'a tamata dawan,
ovu tamata ra veka rfalak ne,
Ubu i Ni dawan nlia munuk afakataka,
Yanan Ia.
Ubila'a veka nsikat Ia ma neluk raja,
ma ndoku ubun-nusin Raja Daud wan i ndoku ma nfareta.
33 Ia veka nfareta kakiwal Yakub ubun-nusin ra*,
tevek Ni fareta a wol ni wahan.”
34 Maria nfalak verin Ubu Ni sansinir yai ne,
“Wean inba ma veka wean inyai,
tevek ya'a wol utuba ovu brana obin?”
35 Ubu Ni sansinir yai nfalak verin Maria ne,
“Ubu Ni Roh veka nsuta ma nleal lahir oa.
Ubu i Ni dawan nlia munuk afakataka,
Ni ngrebat a veka nteri oa ma yanam i veka mrali Ia yai wol Ni salasilan,
ovu veka rera Ia ne,
‘Ubu Yanan a.’
36 Teram i Elisabet itvata roak ia ma tamata ra rfalak ne,
ia wol bisma yanan,
na'uk fiang ini nbarlewan vali ma ni vulan inean roak,
ovu kasiko'u yanat i na'a evun ralan a,
brana vali ia.
37 Tevek Ubu bis not-nala munuk afakataka.”
38 Maria nfalak ne,
“Ya'a eluk sansinir verin Duila'a,
ba fara wean urun afa ovi fwalak yai.”
Nata Ubu Ni sansinir yai nti talik ia.
Maria nti nalola Elisabet
39 Wol mnanat,
na Maria nti lahir ma nalola Elisabet na'a ahu isa,
na'a propinsi Yudea.
Ahu yai ndoku wan i vuar ra rna'a.
40 Na'a inyai,
na ia nti Zakharia ni rahan ralan a ma nala salam verin Elisabet.
41 Ti ma Elisabet nrenar Maria vain a,
na yanan i nana'a evun ralan a nasdai lahir,
tevek inan lolin,
ovu vali Ubu Ni Roh a nsoru lahir Elisabet.
42 Ba vain a dawan ma nfalak ne,
“Ubu naflahar roak oa,
nlia tali vata liak ra munuk,
ovu naflahar vali kasiko'u yanat i veka mrali ia yai.
43 Ya'a ini iki ya'a mi ning Duila'a renan a nma ma nalola ya'a?
44 Na'ut i urenar vaim a,
na kasiko'u yanat i na'a evung ralan ini nasdai lahir,
tevek inan lolin urun.
45 Lolin urun verin oa,
tevek morang ne,
afa ovi Duila'a nfalak verin oa yai veka rvotuk.”
Maria ndedang ma al nraning Ubu
46-47 Maria nfalak ne,
“Ufadawang Duila'a,
ovu ralang a lolin urun,
tevek Ubu neluk Raja ma nsikat ya'a tali ning salasilan ra,
ma ning vava'at kakiwal.
48 Ia nsi'ik ma lolin ya'a,
velik ne eluk tamata sansinir ma ukarya verin Ia.
Ba tali amar ini,
tali tuvu nti tuvu,
na tamata ra munuk veka rfalak ne,
ya'a ini vata i utung urun a,
49 tevek Ubu i nfareta munuk afakataka notu roak afa dawan ovi tamata ra wol rot-nala a verin ya'a.
Ubu naran a nmerat urun.
50 Tali tuvu nti tuvu,
na Ia nfaturu lalawatan Ni silobang a verin tamata ovi rbobar Ia.*
51 Ia nala Ni ngrebat a ma notu afa dawan ovi tamata ra wol rot-nala,
ovu notu ma tamata ovi rfakaratat tenarira ra ramir-ramar tia ma watan ira.
52 Ia nfaleka tamata fareta ra tali wan ovi rdoku ma rfareta a,
na'uk nfakaratat tamata ovi wol fyawarira ra.
53 Ubu nala afa ovi lolin ra munuk verin tamata kasian ra,
boma deka rablafar,
na'uk nsinir tamata ovi rka'i ra ma rewal ira ovu limarira vu watan.
54-55 Ubu Ni tnorung verin ubumam-nusimami ra ma nfalak ne,
Ia nlobang ami,
tamata Israel ra.
Ia nfakena roak Ni tnorung yai.
Ia wol nablufang ma nfaturu Ni silobang a verin Abraham ovu ubun a nusin ra,
nata ti wol ni wahan.”
56 Maria nana'a Elisabet ni rahan,
ka'a bi vulan itelu,
beti newal ia nti ni rahan.
Rarali roak Yohanes i nbaptis tamata ra
57 Elisabet ni amar kena roak ma nrali ia,
ma yanan a brana ia.
58 Ti ma tamata ovi rna'a ni rahan nelan a ovu ni tiniman ra rarenar ne,
Duila'a nfaturu Ni silobang i dawan urun a verin Elisabet,
na rir tinemun rotu inarira lolin ovu ia.
59 Kasiko'u yanat yai ni amar iwalu roak,
na rir tinemun rovun ia ti mane rsunat ia.
Ira mane rfanara kasiko'u yai naran a wean yaman a Zakharia.*
60 Na'uk renan a nfalak ne,
“Deka!
Ita musti tfanara ia ne,
Yohanes.”
61 Ira rfalak verin Elisabet ne,
“Wol tamata isa vali tali bira tiniman ra nararira wean inyai.”
62 Ba ira rotu faneak ma al rorat yaman a ne,
veka nala nara aka ma al nfanara yanan a.
63 Zakharia nera kba masnifit isa tali ira ma ntulis ne,
“Ia naran Yohanes.”
Ba rir tinemun rtalkaka munuk lahir.*
64 Brian munuk,
na Zakharia nangrihi nal-ewal ma nfadawang lahir Ubu.
65 Ba tamata ovi rna'a rira rahan nelan a munuk rbobar ma ralang Ubu,
ovu tamata ra rfamalik ivar yai ma ti nsoru munuk wan ovi rna'a Yudea ni vuar ra.
66 Tamata ovi rarenar ivar yai,
ira munuk ranovak watan na'a ralarira ra ne,
“Kasiko'u yanat ini dawan ia,
na veka wean inba?
Kena urun ma Duila'a nfatuang ia.”
Zakharia nraning Ubu ma nfamalik ivar ovi nrenar lahir tali Ia, na'a afa ovi yanan mane notu ra
67 Ubu Ni Roh a nsoru lahir Zakharia i yanan kasiko'u yanat yai,
ba nfamalik ivar ovi nrenar lahir tali Duila'a.
68 Ia nfalak ne,
“Mya ma tfadawang Duila'a,
Ubu i tamata Israel ra raraning a,
tevek nma ma nalola ita ovu nlobang ita,
ma nfatalik ita tali dida varvara aleman ra.
69 Ia nala Tamata i Ni ngrebat a dawan urun a,
ma nsikat ita tali dida salasilan ra,
ma dida vava'at kakiwal.
Ia ubun a nusin Raja Daud i neluk tamata sansinir verin Ubu.
70 Tali lalan ana,
Ubu nfalak roak Ni tnorung yai nahu nabi ovi nfili ra,
71 ma nfatalik ita tali tamata ovi rira sian ita.
Ia nfatalik ita tali tamata ovi wol inar lahir ita.
72 Notu wean inyai ma nfaturu Ni rala lolin a verin ubud-nusid ra ne,
veka nfakena Ni tnorung i nmerat urun yai.
73-74 Ia nafwaba roak na'a Ni tnorung a verin ubud-nusid i Abraham.
Ia nafwaba roak ne,
veka nfatalik ita tali tamata ovi rira sian ita,
boma tot-orang afa ovi nfalak ra,
ovu wol tbobar,
75 ovu ralad urun ma dida vava'at ra rmerat ovu rmalola,
boma Ubu ralan a lolin ovu ita,
ti naran i tmata a.”
76 Nata Zakharia nfalak verin yanan a ne,
“Ubu i Ni dawan nlia munuk afakataka veka nsikat oa ma meluk Ni nabi,
tevek oa veka bwana ula oa ma mususan linga'an verin Duila'a.
77 Oa veka fwalyawang verin Ni tamata ra ne,
wean i Ubu na'i vatuk roak rira salasilan ra,
na Ia veka nala vava'at kakiwal verin ira.
78 Ubu nfaturu Ni rala lolin a ovu Ni silobang a verin ita,
bi notu wean inyai.
Ia i ntali lanit ratan yai,
veka nma wean lera beti ndata.
79 Ia vanan a veka nyeba munuk tamata ovi rva'at na'a dedan ralan a,
ovu vali tamata ovi rbobar matmatan.
Ia veka novun vali ita ma dida vava'at ra malinan lalawatan.”
80 Zakharia yanan yai nmela ma dawan roak ia,
ovu ni inorang verin Duila'a ntafal ma nangrebat.
Ia nana'a watan wan lean vu dawan,
ti naran amar i nfavotuk tenan a verin tamata Israel ra.