Afa ovi rotu ma tamata ra rotu a'uk salasilan ra
1 Yesus nfalak verin Ni tamata ovi rorang Ia ne,
“Ita tka'a roak ne,
afa ovi rotu ma tamata ra rotu a'uk salasilan ra veka rna'a,
na'uk sian urun i lahir verin tamata ovi rotu ma tamata liak ra rotu salasilan.
2 Ni lolin a,
rkeak vatu dawan isa na'a tamata avyai relarira ra ma relik ira rti tahat ralan.
Rotu wean inyai,
na lolin lia tali tamata avyai rotu ma tamata i ni inorang a kako'u nleka ma notu salasilan.*
3 Wean inyai bi,
msyi'ik ma lolin afa ovi myotu ra!
Wean i terabir-valibira isa notu salasilan,
na mtyabu ia.
Ba wean i nahil ma ntalik roak tali ni salasilan ra,
na myabun ia.
4 Wean i notu salasilan verin mia fafitu na'a amar isa,
ovu vali newal nala fafitu ia nma verin mia ma nfalak ne,
‘Ya'a ahil roak,
ba era ma myabun ya'a,’
na mia musti myabun ia.”
Inorang i nangrebat a
5 Nata Yesus Ni rasul ra rfalak verin Ia ne,
“Duila'a Yesus,
fara fwangrebat mami inorang a!”
6 Duila'a nfalak ne,
“Wean i bira inorang a veran sesawi ni vatul watan,
na mia bisma fyalak verin aa dawan ini ne,
‘Mutvutuk lahir ma roal mdiri tahat ralan,’
na veka norang watan mia!”*
Tamata sansinir isa ovu duan a
7 “Wean i tamata isa tali bir tinemun ni tamata sansinir nkarya na'a ni va'i a,
te nwanar ni afwatan ra,
ma wean i newal ia tali ni karya,
na tamata yai veka nfalak verin ni sansinir yai ne,
‘Mwa ma mufna'an kikyai!’?*
8 Velik aba,
wahal lahir!
Ia veka nfalak verin ni sansinir yai ne,
‘Mususan afamtahan verin ya'a.
Moru mu ravit i nmerat a,
ma mdiri msi'ik ma ufna'an-ufnenu munuk veki,
beti mufna'an-mufnenu vali.’
9 Ia veka nraning ni sansinir yai?
Wahal lahir,
velik ne notu munuk ni karya ovi nala verin ia.
10 Wean watan inyai verin mia vali.
Wean i myotu munuk roak afa ovi Ubu nfalak ma myotu ra,
na ni lolin a,
fyalak ne,
‘Ami tamata sansinir ami watan,
ovu wol fyawamami lahir,
ba amotu a'uk afa ovi musti amotu ra.’ ”
Yesus notu ma lolin ewal tamata vutu ovi rira suhut ngabaa
11 Yesus nahu propinsi Samaria ovu propinsi Galilea rira elat ratan a ma nbana nti Yerusalem.
12 Na'ut i Yesus nti naran ahu isa,
na tamata vutu ovi rira suhut ngabaa rma rtuan Ia.
Ira rdiri ma ya'i raroa ira tali Yesus,*
13 ma rafwak ne,
“Yesus,
Tuan Guru!
Mlobang ami.”
14 Ba Yesus nsi'ik ira ma nfalak ne,
“Miti ma fyaturu tenabira ra verin Yahudi rira mela falurut ra,
ma rsi'ik tenabira ra ne,
lolin roak te wahal.”
Na'a rira banbanan obin,
na lolin lahir ira tali rira suhut a.
15 Tamata isa tali tamata vutu yai,
ti ma nsi'ik tenan a,
na lolin roak ia tali ni suhut a,
ba newal ia ma nfadawang Ubu ovu vain dawan.
16 Nata nsangatur na'a Yesus wahan ralan a,
ovu nfalak fara weninyai verin Ia.
Tamata yai ntali Samaria.*
17 Yesus nfalak ne,
“Inlangin a otu ma tamata vutu lolin ewal roak ira tali rira suhut a te wahal?
Tamata isi yai rna'a inba?
18 Wean inbinimi wol tamata isa vali tali ira rma ma rfalak fara weninyai verin Ubu,
na'uk tamata i wol Yahudi ini sa'i nma a'uk?”
19 Yesus nfalak verin tamata yai ne,
“Mdiri ma mewal oa kikyai,
tevek mu inorang a notu ma lolin roak oa.”
Na'ut i Ubu veka nma ma nfareta lanit ivavan a
20 Tamata Farisi ifira rorat Yesus ne,
“Lafira,
na Ubu nma ovu Ni Fareta Ralan a?”
Ba Yesus nfalak ne,
“Ubu Ni Fareta Ralan wol nma ovu faneak ovi tamata ra rsi'ik,
21 ovu vali tamata ra wol bisma rfalak ne,
‘Eka msyi'ik,
Ia na'a ini,
te na'a ineri!’
Tevek Ubu neluk raja ma nfareta lanit ivavan ini na'a roak ralabira ra.”
22 Ba Yesus nfalak verin Ni tamata ovi rorang Ia ne,
“Ni amar a veka nma ma inabira ma msyi'ik Ya'a,
Tamata Yanan Ya'a,
na'a amar isa watan,
na'uk mia wol bisma msyi'ik.
23 Tamata ra veka rfalak verin mia ne,
‘Msyi'ik Ia na'a ineri!’
Te,
‘Msyi'ik Ia na'a ini!’
Mia deka miti ineri,
ovu deka myorang ira.
24 Tevek Ya'a,
Tamata Yanan Ya'a,
veka uma ewal lanit ivavan ini,
ma vanang wean lahir i fitik nyelar tali lanit wahan nti lanit wahan.
25 Na'uk Ya'a musti utuan veki wawa'uk i dawan urun a,
ovu tamata ovi fiang ini rva'at ra veka rala'ing Ya'a.
26 Amar i Ya'a,
Tamata Yanan Ya'a veka uma,
na tamata ra veka wean lahir na'ut i Nuh nva'at a.*
27 Na'ut inyai,
na tamata ra rafna'an,
rafnenu ovu rsifa wean watan wean a,
ti naran amar i Nuh nrata ni kabal a.
Nata wear dawan nma ma nfedan munuk ira.*
28 Amar yai wean vali na'ut i Lot nva'at obin.
Tamata rafna'an,
rafnenu,
rfedi-rfaha afa,
ravuri-rava ovu rotu rira rahan ra.*
29 Na'ut amar i Lot nban-talik kota Sodom,
na Ubu nfasuka yafu ovu belerang wean lahir da'ut tali lanit ratan,
ma nvisal tamata ra munuk.
30 Veka wean vali inyai na'ut i Ya'a,
Tamata Yanan Ya'a,
uma ma ufavotuk tenang a.*
31 Na'a amar yai,
na tamata ovi ryari ira na'a rira rahan ratan ra,
deka rsuta ma rala rira afa ovi rna'a rira rahan ralan,
ovu vali tamata ovi rkarya na'a rira va'i ra wol bisma rewal roak ira rti rira rahan ra.*
32 Mingnanang afa i nkena roak Lot awan a.*
33 Tamata iki watan nfikir a'uk ni vava'at na'a lanit ivavan a,
na ia veka wol ni vava'at kakiwal a.
Na'uk iki watan wol nfikir ni vava'at tevek norang Ya'a,
velik ne tamata ra rfedan ia,
na ia veka ni vava'at kakiwal.*
34 Ya'a ufalak verin mia ne,
na'a ovan i veka uma ewal yai,
na wean i utuan tamata irua rtuba ko'i isa,
na Ubu veka nala isa,
na'uk isa nana'a watan.
35 Wean i vata irua rbutar slaru na'a batu putar,
na Ubu veka nala isa,
na'uk isa nana'a watan.” [
36 Wean i tamata irua rna'a va'i,
na Ubu veka nala isa,
na'uk isa nana'a watan.]*
37 Ba Yesus Ni tamata ovi rorang Ia rorat Ia ne,
“Duila'a,
afa yai veka nvotuk na'a inba?”
Ba Ia nfalak verin ira ne,
“Wean i matmatan ra rna'a inyai,
na manut nangan dawan ovi ba'i ra'an afa matmatan ra rna'a vali inyai.”*