Paulus ralan a lalau tevek tamata Yahudi rafena ma rorang Yesus
1 Terang a valing averi,
afa ovi veka ufalak ini kena,
ovu wol usiklabir,
tevek Kristus Ni roak ya'a.
Ubu Ni Roh a nfangrebat ovu nfalyawang na'a ralang ila'a ne,
afa ovi ufalak ini,
kena.
2 Ralang a lalau urun i lahir,
ovu ufarnuang lalawatan susa i dawan urun a na'a ralang a,
3 verin terang a valing tamata Yahudi ra,
tevek wol rorang Kristus.
Ya'a utorung ma Ubu near nfasoba ya'a,
ovu nfaroa ya'a tali Kristus,
boma nlobang ira ma rorang Kristus.
4 Ira tamata Israel ira.
Ubu nfili roak ira,
ma nala ira ma reluk yanan ra,
ovu nfaturu lahir Ni ngrebat verin ira.
Ia notu tnorung ra verin ira,
ovu nala Musa ni inukun ra verin ira.
Ubu nfaturu vali verin ira ne,
wean inba ma raraning Ia ovu nala roak Ni tnorung ra verin ira.*
5 Ira ini,
uburir-nusirira verin Abraham,
Ishak ovu Yakub.
Na'ut i Kristus neluk tamata,
na Ia ubun-nusin vali ira.
Kristus Ubu Ia,
ovu Ni dawan nlia munuk afakataka,
ba musti tfadawang Ia,
nata ti wol ni wahan.
Kena urun!
Ubu wol nfili Abraham ubun-nusin ra munuk ma nala Ni kalolin ra verin ira
6 Ya'a wol ufalak ne,
Ubu wol nfakena Ni tnorung a verin ira.
Na'uk tali tamata Israel uburir-nusirira ra munuk,
na boku wol Israel mnga'un ira.*
7 Abraham ubun-nusin ra wean vali inyai.
Tali Abraham ubun-nusin ra munuk,
na boku Ubu wol nrekan ne,
Abraham ubun-nusin ira.
Ubu nfalak verin Abraham ne,
“Ishak ubun-nusin ra watan veka reluk ubum-nusim wean Ning tnorung a,
na'uk liak ra wahal.”*
8 Inyai ihin a ne,
kasiko'u ovi rarali ira tevek Ubu Ni tnorung a,
na Ubu yanan ira.
Ba wol mane munuk lahir kasiko'u ovi rtali Abraham ubun-nusin ra,
Ubu yanan ira.
9 Ubu notu tnorung verin Abraham,
ma nfalak ne,
“Na'ut amar i ufadoku roak ma veka ewal Ya'a,
na Sara nrali roak ia,
ma yanan a brana.”*
10 Wean vali inyai na'ut i Ribka nlewan yanan brana irua tali Ishak.
Ita tamata Yahudi ra ubud-nusid vali Ishak.
11-12 Na'ut i Ribka mane nrali kasiko'u dekut avyai,
na Ubu nfalak verin ia ne,
“Yanam iwarin a veka nfareta yanam iya'an a.”
Na'ut i nangrihi wean inyai,
na kasiko'u avyai wol rotu afa ovi sian te lolin obin.
Ubu nfalyawang lan roak ne,
Ia nfili roak kasiko'u i mane naflahar ia.
Notu wean inyai,
boma ita munuk tka'a ne,
wean i nfili tamata ra ma naflahar ira,
na wol naflahar ira tevek afa ovi rotu ra.
Ia nfili ira,
tevek ka'i nfadoku wean inyai na'a ralan a.
13 Wean lahir i Ubu nfalak roak na'a Surat Ralan ne,
“Ya'a ufili roak Yakub,
na'uk wol ufili Esau.”*
14 Ba wean inyai,
na ita veka tfalak afaka?
Na'ut i Ubu nfili tamata,
na Ia wol notu afa ovi rmalola ra?
Afa yai wol kena lahir!
15 Mingnanang!
Ubu nfalak roak verin Musa ne,
“Wean i mane ulobang tamata isa,
na veka ulobang lahir ia.
Wean i mane ufaturu Ning rala lolin verin tamata isa,
na veka ufaturu lahir Ning rala lolin a verin tamata yai.”*
16 Ba Ubu wol nfili tamata ra tali rira ininan ra te tali afa ovi rotu ra,
na'uk ntali watan Ni rala lolin a verin tamata ra.
17 Afa ovi Ubu nfalak verin raja Firaun rtulis roak na'a Surat Ralan ne,
“Ya'a otu ma mna'a raja,
boma ufaturu Ning ngrebat a verin tamata ra munuk.
Tali afa yai vali,
na otu ma tamata ra munuk na'a lanit ivavan ini rka'a narang a ma ralang Ya'a.”*
18 Ba wean i Ubu inan ma nfaturu Ni silobang a verin tamata isa,
na Ia veka nfaturu lahir Ni silobang verin tamata yai.
Wean i Ubu inan ma notu ma tamata isa ralan nangrebat watan ma wol nafrenar,
na Ia veka notu ma tamata yai ralan a nangrebat ma wol nafrenar.
Ubu nukun tamata boku, na'uk nfaturu Ni silobang a verin boku vali
19 Fiang ini,
mia veka myorat ya'a ne,
“Wean inyai,
na notu afakinimi Ubu nfasala watan tamata ra obin,
tevek rira salasilan ra?
Tamata iki vali nangal nala afa ovi Ubu ralan a nfalak ma notu ra?”
20 Terang a valing averi,
deka fyalak wean inyai!
Iki mia ma fyikir ne,
myangal nala Ubu?
Mia tamata watan mia.
Wol inovan ma suran i rotu tali bal,
norat tamata i notu a ne,
“Notu afakinimi motu ya'a wean ini?”
21 Velik aba,
tamata i notu suran yai bisma notu afaka watan tali bal a,
wean i ralan a nfalak.
Tali bal yai watan,
na ia bisma notu suran irua,
ma isa verin afa ovi fyawan a,
na isa vali ma ba'i tpake watan lokat amar.
22 Wean vali inyai na'a afa ovi Ubu notu ra,
inovan ma not-orang watan afa ovi ralan nfalak ma notu verin tamata ra.
Velik aba,
ntorung ma nfaturu Ni ngrova i nvua matmatan a verin tamata ovi rotu salasilan,
ovu mane nfaturu Ni ngrebat a,
tevek inovan ma nukun ira.
Na'uk Ubu ntahang ralan obin,
ma wol nukun lahir tamata ovi musti nukun ira tevek rotu ma nangrova urun.
23 Ia notu wean inyai verin ita,
boma nfaturu ne,
Ni dawan a nrahi lia munuk,
ovu nfaturu vali ne,
Ni silobang a verin ita.
Ralan nfalak roak tali lalan ma nfili ita ma dida afa lolin yai na'a lanit ratan.
24 Ubu nera roak ita ma teluk Ni tamata ra.
Ia wol mane nera watan tamata ovi rtali Yahudi ra,
na'uk nera vali tamata ovi wol Yahudi ra.
Rtulis roak na'a Surat Ralan ne, Ubu nfili tamata ovi wol Yahudi ra, ma reluk yanan ra
25 Ubu nfalak vali roak verin nabi Hosea na'a kitab i ntulis ne,
“Wean i ungrihi verin tamata ovi wol rna'a Ning sidovung tamata inorang ra,
na veka ufalak ne,
‘Ning tamata inorang verin mia.’
Wean i ungrihi verin tamata ovi wol ufaturu Ning silobang a verin ira,
na veka ufalak ne,
‘Ulobang urun mia.’ ”*
26 Rtulis vali vaivatul ini ne,
“Lan a,
Ubu nfalak verin tamata ra ne,
‘Ya'a wol Ning tamata inorang verin mia.’
Na'uk na'a amar isa,
na veka nfalak verin ira ne,
‘Ya'a ini Ubu i ala vava'at a,
ovu yanak mia.’ ”*
27 Nabi Yesaya vain dawan ma nfalak na'a tamata Israel ra ne,
“Velik ne tamata Israel rivun ila'a ira ma wean ngur na'a tahat nelan a,
na'uk Ubu veka nsikat boku watan tali rira salasilan ra ma rira vava'at kakiwal.
28 Tevek Duila'a veka nfaleka lahir inukun i kena,
ovu veka nukun nala munuk lanit ivavan ini.”*
29 Nabi Yesaya nfalak vali roak ne,
“Wean i Ubu i Ni ngrebat a nlia munuk afakataka,
wol nfadoku ita tamata Yahudi boku ma totu duad-yanad,
na ita tamwear roak wean kota Sodom ovu Gomora.”*
Tamata Yahudi rafena ma rorang Yesus Kristus
30 Ba wean inyai,
na ita veka tfalak afaka na'a vaivatul ovi beti ufamalik yai?
Tamata ovi wol Yahudi ira wol rkiwal ma rdava roak ma rira vava'at ra rmalola,
na'uk boku tali ira rira roak vava'at yai.
Ubu notu ma rira vava'at ra rmalola,
tevek rorang Yesus Kristus.
31 Tamata Israel ra wol wearira inyai.
Ira rkiwal ma rdava lalawatan inukun i bis notu ma rira vava'at ra rmalola,
na'uk wol rdav-nala vava'at yai.
32 Notu afakinimi ira wol rdav-nala vava'at yai?
Ira wol rdav-nala,
tevek wol rorang Ubu.
Ira ka'i rdava watan ovu rira ngrebat ra ma rot-orang Musa ni inukun ra.
Ba rasvotun na'a Vatu i ba'i notu ma tamata ra rleka a.*
33 Rtulis roak Vatu yai na'a Surat Ralan ne,
“Ubu nfalak ma msyi'ik ma lolin afa ini:
‘Na'a Sion,
* ufadoku roak Vatu isa.
Vatu yai veka notu ma tamata rasvotun,
ovu veka notu ma tamata ra rleka.
Na'uk tamata ovi rorang Ia,
na Ia veka not-nala afa ovi nfadoku roak na'a Ni tnorung a ma nala verin ira,
ma ralarira ra wol lalau.’”*