Ita tamata inorang ra musti tsifangrebat ita, ma deka tfikir watan tenadida ra
1 Terang a valing averi,
ita tamata ovi dida inorang nangrebat roak,
musti tatahang nal raladida na'a tamata ovi rira inorang wol nangrebat obin.
Deka mane totu watan afa ovi rfaloling raladida ra.
2 Tali bir tinemun,
na lokat tamata musti notu afa ovi lolin ra verin teran a valin ra ma nfaloling ralarira ra,
boma rira inorang a ntafal ma nangrebat.
3 Tevek Kristus vali Ni afa ovi notu ra wol mane nfikir watan tenan a.
Na'uk rtulis roak na'a Surat Ralan ne,
“Afa ovi tamata ra rfalak na'ut i rfalak sian Oa,
fiang ini nkena roak Ya'a.”*
4 Ba afa ovi rtulis munuk roak na'a Surat Ralan,
rair ita ma tatahang nal raladida,
ovu dida inorang ntafal ma nangrebat,
boma tfaklo'i a'uk dida vava'at ra verin Ubu.
5 Ubu notu ma tatahang nal raladida ovu nfaloling raladida ra.
Ba uflurut verin Ia ma fara nlobang ita ma raladida isa watan,
ma torang Kristus Yesus Ni afa ovi notu ra.
6 Ubu notu wean inyai,
boma raladida isa ma tfadawang Ubu i dida Duila'a Yesus Kristus Yaman a.
Mtyorung ma myala munuk tamata inorang ra, velik ne tamata Yahudi te wol Yahudi, tevek Yesus nala roak ita munuk
7 Ba mtyorung ma msyimaklivur mia,
wean Kristus ntorung roak mia na'a ralan a.
Myotu wean inyai,
na tamata ra rfadawang Ubu.
8 Ufangnanang mia ne,
Kristus neluk roak tamata sansinir ma al nlobang tamata Yahudi ra,
boma nfaturu ne,
Ubu nfakena roak Ni tnorung ra.
Notu wean inyai,
ma nfakena afa ovi ntorung roak verin ubud-nusid ra.
9 Kristus nma vali lanit ivavan ini,
boma tamata ovi wol Yahudi ra bisma rfadawang Ubu,
tevek nfaturu Ni rala lolin verin ira.
Rtulis roak na'a Surat Ralan ne,
“Wean inyai,
bi na'ut i una'a ovu tamata ovi wol Yahudi ra,
na ufalak fara weninyai verin Oa,
ovu vali udedang ovu ning dadedang ra ma al ufadawang naram a.”*
10 Rtulis vali na'a Surat Ralan ne,
“Tamata ovi wol Yahudi ra myotu inabira lolin ovu Ubu Ni tamata ovi nfili roak ira.”*
11 Rtulis vali na'a Surat Ralan ne,
“Bangsa ra munuk fyadawang Ubu,
ovu vali tamata ra munuk mryaning Ia.”*
12 Nabi Yesaya nfalak vali ne,
“Tamata isa tali Isai ubun-nusin ra veka nma,
ovu Ia veka nfareta bangsa ra munuk,
ovu veka rfaklo'i a'uk rira vava'at ra verin Ia.”*
13 Ubu sa'i notu ma ita tnaban afa lolin ovi Ia veka nala verin ita.
Ba uflurut verin Ia ma fara notu ma ralabira lolin.
Fara Ia notu vali ma bira vava'at ra malinan,
tevek myorang Duila'a Yesus.
Notu wean inyai,
boma Ni Roh nfangrebat ralabira ra ovu Ni ngrebat a,
ma mtyafal ma fyaklo'i a'uk bira vava'at ra verin Ia.
Paulus nfalyawang afa ovi ntulis na'a ni surat a
14 Terang a valing averi.
Ya'a orang urun ne,
bira lolin dawan dalang,
ovu mkya'a ma lolin afa ovi Ubu nfalak ma myotu ra,
ovu vali bisma msyisurak nala mia.
15 Na'uk na'a surat ini,
na wol uma'it ma usurak mia ma ufalyawang lahir afa isa te irua,
boma mingnanang ewal afa avyai.
Ufalak wean inyai,
tevek Ubu Ni rala lolin bi nala karya ini verin ya'a.
16 Ya'a eluk tamata sansinir verin Kristus Yesus ma ulobang tamata ovi wol Yahudi ra,
ovu vali ukarya verin Ubu wean mela falurut,
tevek ufamalik Ni Ivar Lolin na'a Yesus.
Otu wean inyai,
boma tamata ovi wol Yahudi ra bisma wearira persembahan verin Ubu ma rfaloling ralan a,
tevek Ni Roh a nfamerat roak ira.
17 Ya'a ning vava'at isa roak ovu Kristus Yesus,
ba ralang dawan na'a ning karya verin Ubu.
18 Ya'a ubrahi watan ma ungrihi na'a afa ovi Kristus notu roak nahu ya'a,
ma ulobang tamata ovi wol Yahudi ra ma rot-orang afa ovi Ubu nfalak ra.
Rotu wean inyai tali ning vaivatul ra,
ovu vali afa ovi otu ra.
19 Ngrebat i ntali Ubu Ni Roh notu ma otu mujizat ra ovu faneak ovi tamata ra wol rot-nala.
Ufamalik munuk roak Ubu Ni Ivar Lolin a na'a Yesus na'a wan ovi uti roak a,
tali Yerusalem ti naran propinsi Ilirikum.
20 Inak urun ma ufamalik Ivar Lolin yai na'a wan ovi tamata ra wol rka'a Kristus obin,
boma deka rfalak ne,
ufabana watan karya ovi tamata ra rotu lan roak,
wean tamata i nfadiri rahan na'a tamata liak ni fanderen.
21 Ya'a inak ma otu afa ovi rtulis roak na'a Surat Ralan ne,
“Tamata ovi wol rarenar Ivar tali Ubu veka rsi'ik Ia,
ovu vali tamata ovi wol rarenar Ivar yai veka rfan-aran vali.”*
Paulus nanovak mane nti Roma
22 Ya'a ufamalik lalawatan Ubu Ni Ivar Lolin na'a wan ovi tamata ra wol rka'a Kristus obin,
bi ya'a wol bisma ti utuan mia obin,
velik ne inak lalawatan wean inyai.
23 Na'uk fiang ini otu munuk roak ning karya ra na'a wan ini.
Varat ifira nelak roak veli ma naran amar ini,
na inak ma ti ulola mia.
24 Ya'a unovak mane uti Spanyol.
Ba fara bisma ulola mia karedralan isa te irua na'a bira kota ma itmunuk totu inad lolin,
ovu bisma mlyobang ya'a na'a ning banbanan ma uti Spanyol.
25-26 Na'uk fiang ini una'a propinsi Akhaya mane uti Yerusalem veki,
ma utaha kubang tali tamata ovi rorang Yesus na'a propinsi Makedonia ovu Akhaya.
Ira rfadoku roak ma rasdovuk rira kubang ra ma al rlobang tamata kasian ovi rorang Yesus na'a Yerusalem.
27 Ira ralarira lolin ma ka'i rfadoku roak wean inyai.
Velik aba rira varvara vali ma rlobang tamata kasian ovi rorang Yesus na'a Yerusalem.
Tevek tali tamata Yahudi ra,
bi tamata ovi wol Yahudi ra rira vali kalolin ovi rtali Ubu.
Wean inyai,
ba tamata ovi wol Yahudi rira varvara ma rlobang Yahudi ra ovu afa ovi rala ma al rva'at lokat amar.
28 Wean i otu munuk roak ning karya yai,
ma ala roak kubang ovi rasdovuk roak verin tamata ovi rorang Yesus na'a Yerusalem,
beti uti Spanyol,
na'uk ulola mia veki na'a bira kota.
29 Ya'a uka'a roak ne,
amar i uti ma ulola mia,
na veka ala lahir Kristus Ni kalolin ovi dawan urun a verin mia.
30 Terang a valing averi!
Ita torang roak dida Duila'a Kristus,
ovu vali Ubu Ni Roh notu roak ma tsilobang ita,
ba era urun ma itmunuk taflurut verin Ubu ovu ralad urun,
ma nlobang ya'a na'a ning karya.
31 Mlyobang ma miflurut vali ma fara tamata ovi wol rorang Yesus Kristus na'a Yudea,
deka rotu sian ya'a.
Miflurut vali ma fara tamata ovi rorang Yesus na'a Yerusalem ralarira lolin ma rala kubang ovi utaha verin ira.
32 Ba wean i Ubu ralan nfalak,
na ya'a bisma ti ulola mia ovu ralang lolin.
Ya'a veka uyari ya'a ovu ralang a lolin urun,
tevek mane uti ma ulola mia.
33 Uflurut ma fara Ubu i nala Ni malinan verin tamata ra,
nfatuang munuk mia.
Kena urun.