1 Terang a valing averi!
Amkarya verin Ubu,
ba amsurak mia,
boma deka myotu ma Ni rala lolin i nala roak verin mia yai,
wol ihin lahir na'a bira vava'at ra.
2 Tevek Ubu nfalak roak na'a Surat Ralan ne:
“Na'ut amar i ralang a nfalak a,
na Ya'a urenar mu falurut a,
ovu na'ut amar i usikat tamata ra tali rira salasilan ra,
ma rira vava'at kakiwal,
na Ya'a ulobang vali oa.”
Mingnanang ma lolin,
tevek amar ini,
amar i Ubu ralan a nfalak.
Amar ini vali amar i Ubu notu linga'an ma nsikat tamata ra tali rira salasilan ra,
ma rira vava'at kakiwal.*
Paulus ntuan angangal na'a Ubu Ni karya ralan a
3 Na'a afaka watan,
na amsahak urun ma amfabana ma lolin mami vava'at ra,
boma tamata ra deka rfasala ami na'a mami karya ra.
4 Na'uk amfaturu ne,
ameluk tamata sansinir verin Ubu na'a afa ovi amotu ra munuk.
Amtahang nal ralamami ra na'a susa ovi tamata ra rotu verin ami,
ovu na'a susa afaka watan.
5 Amtahang ralamami ra na'ut amar ovi tamata ra rwi-rwa ami,
ovu rvaval ami,
ovu vali ra'abu'i ami.
Amkarya urun ia,
nata amakla watan,
ovu amar boku,
na wol amtuba ovu amtolat watan.
6 Amfaturu ne,
Ubu Ni tamata sansinir verin ami na'a afa ovi amotu ra,
ovu ralamami ra rmerat urun,
ovu vali amfaturu na'a mami kaka'a ra.
Amtahang nal ralamami ovu amarkai,
ovu Ubu Ni Roh a nkarya na'a ralamami ra,
ovu vali amlobang tamata liak ra ovu ralamami urun.
7 Amfamalik afa ovi kena ra,
ovu Ubu Ni ngrebat a nfangrebat ami na'a afa ovi amotu ra.
Afa ovi amotu ra munuk rmalola,
ba afa avyai reluk minak verin ami ma amlotar mami inorang a,
ovu vali amangal tamata ovi rangal ami.
8 Tamata boku ralang ami,
na'uk boku rfama'it vali ami.
Boku rfadawang ami,
na'uk boku rfalak sian vali ami.
Ami amfalak lalawatan afa ovi kena ra,
na'uk tamata boku rfalak ne,
amsiklabir.
9 Ira ranovak ne,
tamata ra wol rka'a ami,
na'uk velik aba,
tamata ovi rorang Yesus rka'a lahir ami.
Ira rfikir ne amamata roak,
na'uk amva'at obin.
Velik ne rwi-rwa ami,
na'uk wol amamata.
10 Velik ne rotu ma ralamami lalau,
na'uk ralamami lolin urun.
Ami tamata kasian ami,
na'uk amotu ma tamata rivun rka'i na'a rira inorang a.
Ira ranovak vali ne,
ami wol mami afakataka,
na'uk velik aba,
ami mami munuk afakataka.
11 Terang a valing ovi mnya'a kota Korintus.
Ami amfalak munuk roak ralamami ra,
ovu vali amlobang urun mia.
12 Amfaturu mami silobang verin mia,
na'uk mia wol fyaturu bira silobang verin ami.
13 Terang a valing averi,
deka fyonak ralabira ra verin ami,
wean ami vali wol amfonak ralamami ra verin mia,
tevek fiang ini ungrihi wean lahir i ungrihi verin yanak ra.
Deka isa mia ovu tamata ovi wol rorang Yesus
14 Terang a valing averi!
Deka isa mia ovu tamata ovi wol rorang Yesus,
tevek lafirba ma afa ovi lolin ra,
ovu afa ovi sian ra,
isa ira?
Te wean inba ma tamata ovi rbana na'a lyawan a,
ovu tamata ovi rbana na'a ngarmeran a,
isa ira?
15 Wol mane trea lahir ne,
Yesus irua nitdawan a ra'an vai isa!
Te tamata ovi rorang Yesus ovu tamata ovi wol rorang Yesus rira vava'at ra wear isa?
Wahal lahir!
16 Ubu Ni Rahan Dawan Falurut a ovu wan i ba'i rfadoku walut ra na'a wol wear isa.
Ita weadida lahir Ubu i nva'at Ni Rahan Dawan Falurut a.
Ia nfalak roak na'a Ni Surat Ralan ne:
“Ya'a veka uti una'a fruarira ra,
ma uva'at ovu ira.
Ya'a veka eluk Ubu verin ira,
ovu ira veka reluk Ning tamata ovi rorang Ya'a.*
17 Wean inyai,
bi fyaroa mia tali tamata ovi wol rka'a Ubu,
ovu mdyir-talik ira.
Deka mkyena lahir tamata avyai rira afa ovi ngra-ngrodi ra,
boma ala mia ma myeluk Ning tamata ovi rorang Ya'a.*
18 Ya'a veka eluk Yamabira,
ovu
mia veka myeluk yanak brana ra ovu yanak vata ra.
Vaivatul avyai rtali Duila'a i Ni ngrebat a nlia munuk.”*