Snurak verin ita tamata ovi torang Yesus, ma tala dida kubang ra ovu raladida urun verin tamata ovi rorang Yesus na'ut i rtuan susa
1 Terang a valing averi,
inamami vali ma mkya'a ne,
wean inba ma Ubu nala Ni rala lolin a verin tamata ovi rorang Yesus rira sidovung ra na'a propinsi Makedonia.
2 Na'ut i rtuan susa dawan urun a,
na ralarira ra rtafal ma lolin urun.
Velik ne rira kasian dawan urun,
na'uk ralarira urun i lahir ma rala kubang ma al rlobang tamata inorang liak ra.
3 Ya'a uka'a basil ne,
rira afa ovi rala roak avyai inovan ovu rira ngrebat ra.
Ira rotu roak wean inyai,
ovu rala vali ma nlia tali rira ngrebat ra.
Ralarira rfalak ma rotu wean inyai,
ba rot-orang watan.
4 Ira ralarira urun vali ma rera verin ami,
ma rovu vali ma rala rira kubang ma al rlobang tamata ovi rorang Yesus rira sidovung na'a propinsi Yudea.*
5 Ira rala ma nlia lahir tali i amnovak a.
Ira rala lan roak tenarira ra verin Duila'a ma rot-orang afa ovi ralan nfalak a.
Ira rot-orang vali afa ovi amfalak ra,
wean watan i Ubu ralan nfalak a.
6 Wean inyai bi amera urun ma Titus nti nalola mia,
boma nlobang mia,
wean lahir i notu lan roak a.
Amera ma nalola mia,
boma nlobang mia ma misdovu munuk bira kubang ovi mane myala al mlyobang tamata liak ovi rorang vali Yesus,
ma fyaturu bira rala lolin ra.
7 Ba fiang ini mkya'i roak na'a afaka watan.
Mingrebat na'a bira inorang a,
bira ngrihi ra,
bira kaka'a a,
ovu ralabira urun ma mlyobang tamata ra,
ovu vali bira silobang a verin ami.
Wean inyai bi inamami urun,
ma fyaturu bira lolin a na'a afa ovi myala verin tamata ra.
8 Ya'a ufalak afa avyai,
na'uk wol mane ufareta mia,
ma misdovu bira kubang wean inyai.
Na'uk mane ufaturu verin mia ne,
tamata ovi rorang Yesus na'a Makedonia ralarira urun ma rlobang tamata liak ovi rorang vali Yesus.
Otu wean inyai,
boma uka'a ne,
ralabira urun al mlyobang tamata ovi rorang Yesus te wahal.
9 Ufalak wean inyai,
tevek mia mkya'a roak dida Duila'a Yesus Kristus Ni rala lolin a verin ita.
Ia nka'i,
na'uk notu ma tenan a wean tamata kasian ra,
ma al nakvanak mia,
boma tali Ni kasian a,
na notu vali ma mkya'i na'a Ubu wahan ralan a.
10-11 Ba usurak mia wean ini ma na'a bira lolin:
Kena urun ma fiang ini myot-nala munuk karya ovi ralabira ra rfalak,
na'ut i beti fyabana na'a varat i nti a.
Mia bira karya yai,
ma myala kubang verin tamata liak ovi rorang vali Yesus.
Mia myotu ula lalean tali tamata liak* ovi rorang vali Yesus,
ovu vali fyikir lan lalean ma myotu wean inyai.
Afa yai nvua afa lolin verin mia,
ba myotu lahir ti naran i roak a,
wean i ralabira rfalak ma misdovu lan bira kubang lokat mia,
ma inovan ovu bira ngrebat ra.
12 Wean i ralabira urun na'a afa ovi myala verin tamata liak ra,
na Ubu veka ntorung vali bira afa ovi myala yai.
Ia wol nera afa ovi wol rna'a mia,
na'uk nera afa ovi rna'a roak mia.
13 Ya'a ala varvara verin mia,
wol mane ufamaraang tamata liak rira varvara a,
na'uk otu wean inyai,
boma bira varvara ra wearira isa.
14 Ba fiang ini afa ovi rna'a mia,
na myala ma al fyakena tamata ovi wol rira ra,
boma afa ovi wol rna'a mia,
ira veka rala vali ma al rfakena mia.
Wean inyai,
na bira varvara ra wearira isa.
15 Wean i rtulis roak na'a Surat Ralan ne,
“Tamata ovi rasdovu ma rivun,
na wol teran vali.
Tamata ovi rasdovu kedan watan,
na wol mamahin vali.”*
Paulus nsinir Titus ovu ni kida irua ma rti rala kubang ovi rasdovu roak na'a kota Korintus, ma rtaha rti verin tamata ovi rorang Yesus na'a propinsi Yudea
16 Ya'a ufalak fara weninyai verin Ubu,
tevek notu roak ma Titus nlobang mia,
wean lahir i ulobang mia.
17 Titus ti nalola mia ma not-orang afa ovi amfalak ra verin ia.
Na'uk nlia tali inyai,
na ia ralan urun ma nlobang mia,
ovu vali ralan a nfalak roak ma veka nti nalola mia.
18 Amsinir vali terad a valid isa,
boma nfatuang ia ma irua rti ralola mia.
Tamata ovi rorang Yesus rira sidovung ra munuk ralang ma dawan ia,
tevek ni karya a lolin ma nfamalik Ubu Ni Ivar Lolin a.
19 Nlia tali inyai,
na tamata ovi rorang Yesus rira sidovung ra rfili roak ia ma nfatuang ami na'a mami karya a,
ma amsiduk bira kubang ovi misdovu roak verin tamata kasian ovi rna'a Yudea.
Amotu karya ini,
boma rfadawang Duila'a,
ovu tamata ra rsi'ik vali ne,
ami ralamami urun ma amlobang terad a valid ra.
20 Amsi'ik wamami vali,
boma tamata ra deka rfasala ami na'a kubang ovi tamata ovi rorang Yesus rala roak ma amtaha yai.
Kubang ovi amtaha yai dawan urun.
21 Ralamami ra rfalak ma amasusan kubang avyai ovu ni malolan watan,
na'a Ubu wahan ralan a,
ovu vali na'a tamata waharira ralan ra.
22 Amsinir vali teradida isa ma ti ntafal Titus ovu ni kida yai,
ma ti rasdovuk bira kubang ra.
Amsi'ik roak teradida ini fafira roak na'a karya ovi amala verin ia.
Ia ralan urun ma nlobang ovu nkarya verin Duila'a.
Fiang ini inan urun ma nlobang mia,
tevek ralan a dawan ne,
veka misdovu bira kubang ra,
ma al mlyobang tamata ovi rorang Yesus na'a Yudea.
23 Titus yai,
ning kida i amamunuk amkarya ma amlobang mia.
Tamata ovi rorang Yesus rira sidovung ra rfili terad a valid irua yai.
Rira afa ovi rotu ra,
rotu ma tamata ra rfadawang Kristus.
24 Ba amera ma fara fyaturu bira silobang a verin ira,
ma tamata ovi rorang Yesus rira sidovung ra munuk rka'a ne,
mlyobang ira,
boma inovan ovu kena lahir ovu afa ovi amfalak roak ma amfadawang mia na'a waharira ralan ra.