Snurak ovi rban-muri lalean
1 Ini wean fatelu roak uma ma ulola mia.
Surat Ralan nfalak roak ne,
“Wean i na'a sala afaka watan,
na tamata irua te itelu musti rfamalik sala yai,
beti tanovak ne,
sala yai kena te wahal.”*
2 Ya'a ufangnanang roak tamata boku tali mia.
Lan ana,
rotu roak salasilan ra na'ut i uti farua ma ulola mia.
Fiang ini tsifaroa ita,
ba ya'a ufalak fasa ewal ma ufangnanang mia ovu tamata liak ra munuk,
boma wean i uma ewal,
na wol urea roak ne,
myotu salasilan ra ma ukun mia.
3 Mia myera ma ufaturu lahir ne,
Kristus nangrihi nahu ya'a.
Kristus nangrihi verin mia,
na wol nangrihi ngalalahang,
na'uk veka nfaturu Ni ngrebat a na'a wahabira ralan ra.
4 Na'ut i rbaku Ia na'a aa walwalur,
na tenan a wol nangrebat ma nmata.
Na'uk fiang ini Ia nva'at roak,
nahu Ubu Ni ngrebat a.
Mami vava'at isa roak ovu Kristus,
ba tenamami ra wol rangrebat,
wean vali Ia.
Na'uk amva'at vali ovu Ia,
ba wean i amtuan mia,
na veka amangrebat vali wean Kristus,
tevek Ubu Ni ngrebat a.
5 Eka ka'i myorat tenabira ra ne,
bira vava'at wean lahir bira inorang verin Kristus,
te wahal?
Msyi'ik ma lolin tenabira ra!
Mia wol mkya'a ne,
Yesus Kristus nleal ralabira ra?
Tevek wean i wahal,
na bira inorang a veka wol ihin lahir.*
6 Era ma mlyabir teman ami ma msyi'ik lahir ne,
Kristus Ni roak ami ma amkarya verin Ia.
7 Ami amaflurut verin Ubu ma fara deka myotu afa ovi sian ra.
Amaflurut wean inyai,
tevek wol mane amfaturu ne,
amtahang nal ralamami na'a angangal ra.
Na'uk amotu wean inyai,
boma mia bisma myotu a'uk afa ovi lolin ra,
velik ne felan a wean i mlyabir teman ami ma amleka.
8 Amfalak wean inyai,
tevek ami wol bisma amotu afaka watan ma amangal afa ovi kena ra.
Ami amfabana watan afa ovi kena ra.
9 Inamami lolin urun wean i mia mingrebat,
velik ne felamami ra wean i wol amangrebat.
Ami amaflurut,
boma fyakena urun afa ovi myotu na'a bira vava'at ra na'a Ubu wahan ralan a.
10 Ba wean inyai bi utulis surat ini,
velik ne tsifaroa ita.
Utulis surat ini verin mia,
boma wean i uti ma utuan mia,
na wol ala ning ngrebat i Duila'a nala verin ya'a,
ma vaing dawan mia.
Duila'a nala ngrebat yai ma al usurak mia ma ufangrebat mia,
ovu wol mane ala ngrebat yai ma ot-visal bira inorang a.
Paulus nfakbosal ni surat
11 Ba terang a valing averi,
mane ufakbosal ning surat ini,
na ufalak verin mia ne,
fara ralabira lolin watan.
Era ma fyakena urun afa ovi myotu na'a bira vava'at ra,
ovu myala ning snurak ra munuk ma rleal ralabira ra.
Bira fikiran isa na'a afa ovi myotu ra.
Msyiotu lolin mia na'a bira vava'at ra ma malinan watan,
boma Ubu i Nia silobang ovu malinan a,
nfatuang mia.
12 Ba lokat mia ka'i myala salam vali verin terabir-valibira ra,
ovu msyivoan mia ovu Ubu Ni lolin a.
Tamata ovi rorang Yesus munuk rala vali salam verin mia.
13 Fara Duila'a Yesus Kristus nfaturu Ni rala lolin a,
ovu Ubu nfaturu Ni silobang a,
ovu vali Ubu Ni Roh nfatuang mia,
ovu notu ma bir tinemun ralabira isa ovu Ia.
Surat i ususan ini,
lawan watan ini.Ya'a Paulus,
ala salam verin mia