1 Varat vutu rahin ifa'at nelak roak,

beti uva'al ewal uti Yerusalem ovu Barnabas,

ovu vali Titus.

2 Ya'a uti Yerusalem,

tevek Ubu nfaturu roak verin ya'a ma musti uti.

Uti ma usdov-aling tamata ovi rban-ulu na'a tamata inorang rira sidovung a,

ma ufalyawang Ivar Lolin i ufamalik verin tamata ovi wol Yahudi ra.

Otu wean inyai,

boma afa ovi otu roak na'a amar ovi rti roak veli,

ovu vali afa ovi veka otu na'a amar ovi veka rma ini,

deka rleka ma lolan watan,

beta ne tamata ra ranovak ne,

air afa ovi sala ra.

3 Ira wol rkiwal ma rsunat Titus i ovun vali ia,

velik ne tamata Yunani ia.^*

4 Terad a valid boku rfalak ne,

rorang Yesus,

na'uk rsiklabir watan.

Ira rma fanfonak watan ira na'a dida sidovung a ma rkananeak ita,

tevek dida inorang verin Kristus notu ma Yahudi rira adat ovu inukun ra wol rkeak roak ita.

Tamata avyai inar ma adat ovu inukun avyai rkeak ewal ita.

5 Na'uk ami wol amtorung lahir ma amorang afa siklabir ovi rfalak ra,

boma myorang a'uk Ivar Lolin mnga'un a.

6 Tamata ovi tamata ra rfalak ne,

dawan ira,

wol rtafal akataka na'a afa ovi air ra.

-- Wean i tamata ni van dawan,

te ni van ko'u watan,

na wol ukamlabir afa avyai,

tevek Ubu wol nfili tamata tali rira van ra. --

7 Ira rsi'ik roak ne,

Ubu nala varvara verin ya'a ma ufamalik Ni Ivar Lolin verin tamata ovi wol Yahudi ra,

wean lahir Ia nala vali varvara verin Petrus ma nfamalik Ni Ivar Lolin verin tamata Yahudi ra.

8 Ubu nala ngrebat verin Petrus ma neluk Ni rasul verin tamata Yahudi ra.

Ia nala vali ngrebat verin ya'a ma eluk Ni rasul verin tamata ovi wol Yahudi ra.

9 Tamata ra rka'a roak ne,

Yakobus,

Petrus ovu Yohanes dawan ira na'a rira sidovung a.

Ira rtaha limang a ovu rtaha vali Barnabas liman a,

ma neluk faneak ne,

rtorung afa ovi amair verin tamata ra.

Ira rka'a roak ne,

Ubu nala Ni karya verin ya'a.

Ira rtorung ne,

ami ti amfamalik Ubu Ni Ivar Lolin verin tamata ovi wol Yahudi ra,

na ira ti rfamalik Ubu Ni Ivar Lolin verin Yahudi ra.^*

10 Ira rera afa isa watan,

ma amlobang tamata ovi rira kasian a dawan.

Ya'a ralang urun vali ma otu wean inyai.^*

11 Na'ut i Petrus nma kota Antiokhia,

na utabu ia na'a wahan ralan a,

tevek notu afa ovi wol kena ra.

12 Ia nafna'an lan ovu tamata ovi wol Yahudi ira na'uk rorang Yesus.

Na'uk ti ma Yakobus ni kida boku rtali Yerusalem rma,

na ia nfaroa tenan a tali tamata ovi wol Yahudi ira na'uk rorang roak Yesus,

tevek nbobar tamata Yahudi ovi rkiwal mane rsunat tamata inorang ra,

betane rfasala ia.

13 Tamata Yahudi liak ovi rorang roak Yesus,

ira rorang Petrus ma rotu afa ovi wol kena ra,

velik ne rka'a afa ovi kena ra.

Barnabas norang vali ira ma nafena ma nafna'an ovu tamata ovi wol Yahudi ra.

14 Usi'ik,

na rira afa ovi rotu ra wol inovan roak ovu Ubu Ni Ivar Lolin i mnga'un a,

ba ufalak verin Petrus na'a waharira ralan ra ne,

“Velik ne oa tamata Yahudi oa,

na'uk mu vava'at a wean tamata ovi wol Yahudi ra.

Motu roak wean inyai,

na wean inba ma mkiwal tamata ovi wol Yahudi ira ma rot-orang tamata Yahudi rira adat ra?”^*

15 Ubumam-nusimami ra Yahudi ira,

ovu amanovak ne tamata ovi wol Yahudi ra,

tamata salasilan ira,

tevek wol rka'a mami adat ovu inukun ra.^*

16 Na'uk ami amka'a roak ne,

Ubu notu ma tamata rira vava'at ra rmalola ovu Ia,

tevek rorang Yesus Kristus.

Ubu wol notu ma tamata rira vava'at ra rmalola ovu Ia,

tevek rot-orang Musa ni inukun ra.

Ba wean inyai bi ami vali amorang Kristus Yesus,

boma Ubu na'i vatuk mami salasilan ra,

tevek mami inorang na'a Kristus.

Velik ne amorang Musa ni inukun ra,

na'uk inyai wol notu ma Ubu na'i vatuk mami salasilan ra.

Amka'a roak ne,

Ubu wol nfadoku verin tamata isa vali ne,

veka na'i vatuk ni salasilan ra tevek not-orang Musa ni inukun ra.^*

17 Ami amorang Yesus,

ma Ubu notu ma mami vava'at ra rmalola ovu Ia,

ba tamata Yahudi boku ranovak ne,

ami tamata salasilan ami,

tevek wol amorang roak rira inukun ra munuk.

Ba wean inyai,

na Kristus notu ma ami amotu salasilan,

tevek wol amorang Yahudi rira inukun ra munuk?

Wahal lahir!

18 Wean i unovak ne,

ning vava'at bisma kena ovu Ubu,

tevek ot-orang ewal Musa ni inukun ra,

na inyai wean watan i ufava'at ewal afa ovi angal roak ra.

Ba wean inyai,

na lyawan roak ne,

ya'a wol orang inukun avyai.

19 Lan ana orang Musa ni inukun ra,

na'uk inukun avyai wol rotu ma ning vava'at a malinan ewal ovu Ubu.

Ba wol orang Musa ni inukun ra,

tevek inyai wean i umata roak na'a inukun avyai,

boma uva'at verin Ubu ma ot-orang afa ovi ralan nfalak ra.

Fiang ini ya'a wean i umata ovu Yesus Kristus na'a aa walwalur.

20 Ba wol uva'at watan wean lan a,

na'uk Kristus nva'at na'a ralang a.

Na'a ning vava'at a,

na uva'at ovu ning inorang na'a Ubu Yanan a.

Ia nlobang ya'a,

ba nmata verin ya'a.

21 Ubu notu ma dida vava'at ra rmalola,

tevek nala Ni rala lolin a verin ita.

Sian urun wean i ula'ing Ni rala lolin yai.

Wean i bisma dida vava'at ra rmalola,

tevek tot-orang Musa ni inukun ra,

na Kristus Ni matmatan a wol ihin akataka lahir.