1 Terang a valing averi.
Mia myotu ma ralang a lolin urun ovu ulobang mia,
ovu vali inak ma utuan mia.
Afa ovi myotu ra notu ma ralang a dawan.
Mia mnya'a urun ralang a,
ba msyi'ik ma lolin ma deka tamata isa vali tali mia nsuka ia na'a ni dardirin a na'a Duila'a.
Ta'an vai isa ma tkarya na'a Ubu Ni va'i ralan a
2 Urang i Euodia ovu Sintikhe,
era urun verin mia ma deka msyingarahi kikyai,
na'uk myotu ma ralabira isa watan na'a bira fikiran ra,
tevek afa yai inovan verin tamata ovi rorang Duila'a.
3 Era verin oa ta kida i mot-orang lalawatan afa ovi fwalak ra,
ma mlobang vata irua i rka'a ma rkarya ma dawan vali yai ma ra'an vai isa,
tevek irua rfarnuang wawa'uk vali ovu ya'a ma amfamalik Ubu Ni Ivar Lolin a.
Ira rkarya vali ovu Klemens ovu dida kida liak ovi amamunuk amkarya.
Ubu nfadoku munuk roak nararira ra na'a Ni buku i rfanara ia ne,
Buku Vava'at.*
4 Mia musti ralabira lolin urun,
tevek myorang roak Duila'a.
Ufalak ewal ne,
fara ralabira ra lolin urun!
5 Fara tamata ra munuk bisma rsi'ik bira rala lolin a.
Wean i rotu sian mia,
na deka myangal ira,
tevek wol mnanat,
na Duila'a veka nma ewal.
6 Ralabira deka kako'u na'a afaka watan.
Na'a afaka watan,
na miflurut verin Ubu ma fyamalik afa ovi inabira ma Ia notu verin mia,
ovu vali fyalak fara weninyai verin Ia,
tevek afa ovi notu roak verin mia.
7 Ba Ubu veka notu ma ralabira ra malinan watan,
velik ne wol bisma tfan-aran malinan yai.
Wean inyai,
bi Ubu nwanar ralabira ra ovu bira fikiran ra,
ma isa watan mia ovu Kristus Yesus,
tevek myorang Ia.
8 Terang a valing averi!
Mane ufakbosal ning surat ini,
na era ma fyadoku lalawatan afa ovi lolin ra na'a ralabira ra ovu bira fikiran ra.
Fyikir afa ovi kena ra,
ovu fyikir ma myalang afa lolin ovi tamata ra rotu a,
ovu vali afa ovi rmalola ra.
Fyikir na'a ralabira ra vali afa ovi inovan ma mryaning,
ovu fyikir afa ovi rmerat urun,
ovu fyikir vali afa ovi tamata ra rarenar,
na ralarira ra lolin.
Deka fyikir afa ovi ngra te salasilan ra.
Na'uk fyikir afa ovi mnga'un ra,
ma deka fyikir afa ovi sian ra.
9 Myotu lalawatan afa ovi myair roak tali ya'a,
ovu afa ovi ufaturu roak verin mia ma mtyorung ma myotu ra.
Wean i mryenar ning vaivatul ra ovu msyi'ik afa ovi otu ra ma myot-orang,
na Ubu veka nfatuang mia ovu notu ma ralabira ra malinan watan.
Paulus nfalak fara weninyai verin sidovung i nana'a Filipi, na'a afa ovi rala verin ia
10 Mnanat roak wol mingnanang ya'a ovu mia wol mkyirim akataka verin ya'a,
tevek wol bira amar ma fyaturu bira silobang a.
Na'uk fiang ini ralang a lolin urun ovu ufalak fara weninyai verin Duila'a,
tevek mkyirim ewal roak kubang verin ya'a.
11 Ya'a wol ufalak wean ini ma nfaturu ne,
wol ning akataka,
tevek usahak ma ralang a malinan watan na'a afaka watan.
12 Utuan afa rivun roak,
ba wean i wol ning akataka te ning vali,
ublafar te wol ublafar,
ya'a wol ukamlabir na'a afakataka,
tevek usahak roak ma ralang a malinan watan.
13 Kristus nala Ni ngrebat a verin ya'a ovu nlobang ya'a,
ma bis utahang nal ralang na'a afaka watan.
14 Na'uk mia mlyobang roak ya'a na'ut i utuan susa a.
Afa ovi myotu yai lolin buas.
15 Terang a valing ovi myorang Yesus na'a Filipi.
Mia mkya'a roak amar i uban-talik propinsi Makedonia.
Amar yai,
na beti ufamalik Ubu Ni Ivar Lolin a verin mia,
ma mtyorung ma mlyobang ya'a ovu kubang ma ti ufamalik Ni Ivar Lolin a.
Sidovung tamata inorang liak ra wol rlobang ya'a wean inyai,
ba mia a'uk sa'i myotu wean inyai.
16 Ba na'ut i una'a kota Tesalonika ma utuan susa a,
na mia mkyirim kubang farua roak verin ya'a.
17 Ya'a wol ufalak wean inyai,
tevek era ma mlyobang ya'a.
Na'uk era ma fara Duila'a ntafal Ni kalolin ra ma naflahar mia,
tevek mlyobang roak ya'a.
18 Ya'a ala roak afa rivun ovi myala roak verin ya'a,
ma nlia tali afa ovi udava,
tevek Epafroditus ntaha munuk roak afa ovi myala yai verin ya'a.
Kubang ovi myala yai naran roak ovu neluk korban i voan a lolin ma nfaloling Ubu ralan a.
19 Ubu i uraning a,
Ni munuk afakataka.
Ia nala afa avyai munuk,
wean lahir Ni kalolin i dawan lia munuk a nahu Kristus.
Ba Ia veka nfangora bira vava'at ra ovu afa ovi myala ala bya'at.
20 Fara tfadawang lalawatan Yamadida Ubila'a ma ti wol ni wahan.
Kena urun.
21 Ala salam verin mia munuk tamata ovi myorang Kristus Yesus.
Terad a valid ovi amamunuk amna'a ini,
rala salam vali verin mia.
22 Tamata ovi rorang Yesus na'a kota ini munuk rala salam vali verin mia.
Na'uk nlia tali inyai,
na tamata inorang ovi rkarya na'a Kaisar ni rahan dawan,
rala salam vali verin mia.*
23 Fara Duila'a Yesus Kristus nala Ni rala lolin a verin mia.
Salam ini ntali ami,
Paulus ovu Timotius.
Surat i ususan ini,
lawan watan ini.Ya'a Paulus,
ala salam verin mia