Paulus ni surat i nban-muri verin tamata ovi rorang Yesus rira sidovung na'a kota Tesalonika
Snurak verin tamata ovi rorang Yesus na'a kota Tesalonika
1 Ya'a Paulus,
ususan surat ini,
ma amtelu Silas* ovu Timotius amala verin mia,
sidovung tamata inorang ovi mnya'a Tesalonika.
Mia myorang Yamadida Ubila'a ovu Duila'a Yesus Kristus.
2 Amera ma fara Yamadida Ubila'a ovu Duila'a Yesus Kristus nala Ni rala lolin a verin mia,
ovu notu ma bira vava'at ra malinan watan.
Ubu veka nukun tamata ra na'ut i Kristus newal Ia
3 Teramam-valimami averi na'a Yesus Kristus,
amfalak fara weninyai lalawatan verin Ubu,
tevek bira inorang a ntafal ma dawan.
Bira silobang a verin iki watan ntafal vali.
4 Wean inyai bi,
wean i ti ma amtuan tamata ovi rorang Yesus rira sidovung ra,
na amfamalik mia lalawatan.
Amfamalik ne,
bira inorang a verin Yesus Kristus nangrebat,
velik ne mtyuan susa dawan ovu tamata ra rwi-rwa mia.
Mia mtyahang nal ralabira na'a susa avyai.
5 Amar ra veka rma ma tamata ra rsi'ik ne,
Ubu veka nfaleka inukun ovu Ni malolan ma inovan ovu afa ovi rotu ra.
Mia mtyuan susa rivun roak tevek myorang Yesus,
na'uk mtyahang nal ralabira,
ba inovan ma nfadoku mia na'a Ni Fareta a.
6 Ubu notu lalawatan afa ovi rmalola ra,
ba Ia veka nukun tamata ovi rotu sian mia,
ma rtuan sian wean inyai vali.
7 Ia veka notu ma tamata ra wol rwi-rwa roak mia,
ovu ami vali.
Ubu veka notu wean inyai na'ut i Duila'a Yesus nsuta tali lanit ratan,
ma nfavotuk tenan na'a lanit ivavan na'a yafongan ralan ovu Ni sansinir ngrebat ra tali lanit ratan.
8 Ia veka nsuta ma nukun tamata ovi rafena ma rorang Ubu,
ovu rafena ma rorang Ni Ivar Lolin a na'a Duila'a Yesus.
9 Duila'a Yesus veka nukun tamata avyai ma rira matmatan wol ni wahan,
ovu Ia veka nvatuk ira munuk ma wol rna'a wahan ralan a.
Ira wol rsi'ik vali Ni ngrebat i nfitik nyadat a.
10 Na'ut amar i Yesus veka nma,
na Ia veka notu lahir afa avyai.
Na'ut inyai,
na Ni tamata ovi rorang Ia munuk veka rfadawang Ia ovu ralang Ia.
Tamata ovi rorang Ia munuk veka rtalkaka lahir.
Mia veka myovu vali Ni tamata ra,
tevek myorang roak afa ovi amfamalik verin mia.
11 Wean inyai bi,
amaflurut lalawatan verin mia.
Amera verin Ubu ma fara notu ma bira vava'at ra inovan ovu afa ovi ralan nfalak a,
wean i nera ovu nfili roak mia.
Amera vali verin Ia ma nlobang mia ovu Ni ngrebat a,
boma myot-nala afa ovi lolin ra,
tevek myorang Yesus Kristus.
12 Amaflurut wean inyai,
boma tamata ra raraning dida Duila'a Yesus naran a,
tevek bira inorang verin Ia,
ovu rfadawang vali mia.
Ia veka notu munuk afa avyai,
tevek Ubu i traning a ovu Duila'a Yesus Kristus Ni rala lolin verin tamata ra.