Paulus ni surat i nban-muri verin Timotius
1-2 Ya'a,
Paulus,
ususan surat ini verin Timotius.
Ya'a ulobang oa wean yanak lalean.
Ubu ralan nfalak ma nfili ya'a ma eluk rasul verin Kristus Yesus,
boma ti ufamalik Ubu Ni tnorung a.
Tnorung ini nfalak ne,
iki norang Kristus Yesus,
na veka ni vava'at kakiwal.
Amaflurut verin Yamadida Ubila'a ovu Duila'a Kristus Yesus ma fara nala Ni rala lolin ovu nfaturu Ni silobang verin oa,
boma mu vava'at a malinan watan.
Fara tfabana ma lolin Ubu Ni karya
3 Ya'a ufalak fara weninyai verin Ubu,
tevek oa ta baba.
Ufadawang Ubu,
ovu Ia nka'a ralang ila'a ne,
wol otu sala ovu tamata liak.
Ubung-nusing ra raraning vali Ia.
Ovan-amar,
na ungnanang lalawatan oa na'a ning falurut ra verin Ubu.
4 Ya'a ungnanang na'ut i tsiama* ita,
na ralam lalau ma lum ra rditi.
Wean inyai bi,
inak ma ulola oa,
boma ralang a lolin.
5 Ya'a ungnanang ne,
morang urun Kristus,
wean lahir ubum vata i naran Lois ovu renam i naran Eunike rorang Ia.
Ira rorang lan Yesus,
beti oa.
Ya'a uka'a basil ne,
mu inorang a wean vali ira.
6 Wean inyai bi,
ufangnanang oa,
boma iva'um ma fwabana karya i Ubu nala verin oa,
wean i tamata ra ba'i rafraik yafu ma deka nmata.
Ia nala karya yai verin oa na'ut i ufadoku limang ra na'a oa.
7 Deka bwobar ma fwabana karya yai,
tevek Ubu nala Ni Roh verin ita,
ovu wol mane nfabobar ita.
Na'uk Ni Roh nfangrebat ovu nfangora lahir ita ovu Ni rala lolin a,
ovu notu ma tka'a ma tatahang nal raladida ra na'a afaka watan.
8 Ba deka mwa'it ma fwamalik dida Duila'a,
ovu vali deka mwa'it ya'a,
velik ne ra'abu'i ya'a tevek ufamalik Ia.
Mera verin Ubu ma nala ngrebat verin oa,
boma mtahang nala afa susa ra,
tevek tfamalik Ni Ivar Lolin.
9 Ubu nsikat ita tali dida salasilan ra,
ovu nera ita ma raladida ra rmerat urun.
Afa lolin ovi totu ra wol rala vava'at kakiwal verin ita.
Na'uk Ubu ka'i nala vava'at kakiwal verin ita,
tevek Ni rala lolin verin ita,
ovu norang lahir afa ovi ralan nfalak ra.
Ubu wol notu lanit ivavan obin,
na nfadoku roak ne,
veka nala Kristus Yesus ma al ntevut ita.
10 Fiang ini Ubu nfaturu roak Ni lolin a verin ita,
tevek Kristus Yesus nma roak ma neluk Raja i nsikat ita tali dida salasilan ra.
Yesus nvisal-nvasil matmatan roak,
ba velik ne tmata,
na'uk Ia nala vava'at kakiwal verin ita ma itmunuk Ubu tna'a wan isa.
Ia nfamalik roak vava'at kakiwal ini na'a Ni Ivar Lolin.
11 Ubu nfili ya'a ma eluk Ni rasul ma ufamalik ovu air Ni Ivar Lolin yai verin tamata ra.
12 Wean inyai bi utuan susa rivun,
ti naran i ra'abu'i ya'a,
na'uk wol uma'it,
tevek uka'a lahir Yesus,
ovu orang urun Ia.
Uka'a basil ne,
ti naran amar i veka nma ewal a,
na Ia veka nsi'ik ya'a ma lolin.
13 Timotius,
wean i mair tamata ra,
na morang ma lolin afa ovi air roak verin oa.
Mungnanang vali ma fwaklo'i a'uk mu vava'at verin Kristus Yesus,
ovu mlobang Ia ovu vali tamata ra.
14 Ubu nala varvara verin ita ma tair Ni vaivatul ra verin tamata ra.
Ia Ni Roh nleal ita ma nlobang ita,
ba msi'ik ma lolin Ivar Lolin yai.
15 Oa mka'a roak ne,
tamata ovi rorang Yesus na'a propinsi Asia* yai,
rivun ila'a rafla talik roak ya'a.
Figelus ovu Hermogenes rti talik vali ya'a.
16 Fara Duila'a nala Ni rala lolin verin Onesiforus ovu ni rahan teta,
tevek ia nma lalawatan ma nfaloling ralang a.
Ia wol nma'it ma nalola ya'a na'a bu'i ralan.
17 Na'ut i naran kota Roma,
na nkiwal ma ndav-nala lahir ya'a.
18 Oa mka'a vali ne,
ia nlobang ma dawan ya'a na'a kota Efesus.
Ba fara Duila'a nfaturu Ni silobang a verin Onesiforus na'ut i veka nma ma nukun tamata ra munuk na'a lanit ivavan a.