1 Baba,

mrenar ma lolin afa ovi mane ufalak ini.

Na'ut i amar ra mane rlia roak,

na veka susa dawan ila'a.

2 Tevek tamata ra veka rfikir a'uk tenarira ra,

ovu rlobang rira kubang ra.

Ira veka rfakaratat tenarira ra ma rfamalik rira metan ra.

Ira veka inar ma rfalak sian tamata ra,

ovu rafena ma rorang renarir-yamarira ra.

Ira veka rafena ma rfalak fara weninyai verin tamata ovi rlobang ira,

ovu vali wol rorang Ubu.

3 Ira wol rka'a ma rsilobang,

rafena ma rabun afa sian ovi tamata ra rotu verin ira,

ovu inar ma rsiklabir ma rfalak sian tamata ra.

Ira veka wol rkamlabir ma rtahang ralarira ra,

ba rsivaval sian,

ovu rangal afa ovi lolin ra.

4 Ira inar ma rfedi rira kida ra verin tamata ovi wol inar lahir ira,

ovu rotu afa ovi sian ra tia ma watan,

ma wol rfikir aran afa ovi rotu ra.

Ira rfadawang a'uk tenarira ra ovu rotu a'uk afa ovi inarira,

na'uk wol rlobang lahir Ubu.

5 Ira iva'ur ma rti rira rahan falurut a,

ma rotu ma felarira ra wean tamata ovi rorang Ubu,

na'uk rira vava'at ra rfaturu ne,

wol rorang Ia.

Fwaroa tenam a tali tamata avyai.

6 Tevek tali tamata avyai,

na tamata boku rti fanfonak watan ira na'a tamata liak rira rahan ra,

ma rweang vata ovi rira fikiran ra katketa ma rorang a'uk afa ovi rfalak ra.

Vata ovi rira salasilan ra rivun,

ba rorang a'uk rira ininan sian ra.

7 Vata ovi inar ma tamata ra rair afa ngorva'an ra verin ira,

na'uk wol rfan-aran afa ovi kena ra.

8 Tamata siweang avyai wearira Yanes ovu Yambres.

Lan a,

ira rangal Musa.

Ba wean vali inyai verin tamata ovi rangal afa ovi kena ra.

Ira ulurira ralan ra rasmotak watan ovu rira inorang wol kena lahir,

ba afa ovi rotu ma Ubu nala'ing ira.^*

9 Na'uk wol uturira,

tevek tamata rivun veka rsi'ik ma rka'a lahir rira boda-badi ra,

wean lahir Yanes irua Yambres rira boda-badi ra.

10 Na'uk oa mka'a munuk roak afa ovi air ra,

ning vava'at a,

ning dardirin a ovu ning inorang na'a Yesus Kristus.

Oa mka'a vali ne utahang nal ralang ovu ning silobang a.

11 Oa msi'ik roak ne tamata ra rwi-rwa ya'a,

ovu ning susa ra.

Ira rotu afa ovi na'a kota Antiokhia,

kota Ikonium ovu kota Listra.

^* Tamata ra rotu sian urun ya'a,

na'uk Duila'a novun ya'a ma wol akataka.

12 Ba wean inyai,

na iki watan inan ma ni vava'at nmalola ovu Kristus Yesus,

na tamata ra veka rwi-rwa vali ia.

13 Na'uk tamata sian ra ovu tamata siweang ra rira sian veka ntafal ila'a.

Ira veka rsiklabir-sikual ira,

ovu tamata liak veka rlabir vali ira.

14 Na'uk oa ta baba,

morang a'uk afa ovi kena ra.

Morang lalawatan afa lolin ovi amair roak verin oa yai,

tevek oa mka'a ne ami amair roak oa,

ovu afa ovi amair ra kena.

15 Oa mungnanang vali ne tali mu kako'u,

na mka'a roak Surat Ralan ihin a.

Ubu Ni vaivatul ra rfaturu ne,

wean inba ma mu vava'at kakiwal,

tevek morang a'uk Kristus Yesus.

16 Vaivatul ovi rna'a Surat Ralan a,

munuk lahir rtali Ubu,

ovu kena,

ma tala vaivatul avyai ma tair ovu tatabu tamata ra ma rfakena rira sala ra.

Surat Ralan kena vali ma nair tamata ra,

boma rira vava'at ra rmalola.

17 Wean inyai,

na Surat Ralan nlobang Ubu Ni tamata ra munuk,

boma nfakesi ira ma rot-nala afa lolin ra munuk.