1 Ya'a ini Paulus,

tamata ra ra'abu'i ya'a,

tevek orang Kristus Yesus.

Filemon,

amrua terad i Timotius amasusan surat ini verin oa.

Kida,

amala roak oa na'a ralamami ra,

ovu movu roak ami na'a mami karya a.

2 Surat ini vali verin tamata ovi rorang Yesus rira sidovung na'a mu rahan,

ovu urad i Apfia,

ovu vali Arkhipus i nkarya ma dawan ovu ami ma amamunuk amfabana Ubu Ni karya.

3 Amaflurut verin Yamadida Ubila'a ovu Duila'a Yesus Kristus,

ma fara nala Ni rala lolin verin mia,

ma bira vava'at ra malinan watan.

4 Kida,

lokat amar i uflurut verin oa,

na ufalak fara weninyai verin Ubu,

5 tevek urenar roak ne,

morang lalawatan Duila'a Yesus,

ovu mu silobang a dawan verin tamata ovi rorang Ia.

6 Baba,

ita totu kida roak ovu itmunuk raladida isa ovu Kristus,

bi uflurut verin oa,

boma mu inorang a ntafal ma dawan.

Uflurut ma fara mka'a munuk afa lolin ovi Ubu notu roak verin ita nahu Kristus.

7 Ya'a ralang a lolin urun,

tevek mlobang tamata ovi rorang Yesus.

Mu silobang yai notu ma ralang lolin urun ovu nfangrebat ralang a,

tevek motu ma tamata ovi rorang Yesus ralarira ra lolin vali.

8 Ba wean inyai,

na ya'a bis watan ma ala ngrebat i ntali Kristus ma ufareta oa ma motu afa ovi kena ra.

9 Na'uk era watan ma motu,

tevek uka'a roak ne,

mlobang tamata ovi rorang Yesus.

Ya'a Paulus,

tuvu roak ya'a ovu una'a bu'i ralan,

tevek orang Kristus Yesus.

10 Mane era verin oa ma mlobang tamata isa i wean yanak ia,

naran Onesimus.

Una'a bu'i ralan,

na nma nalola ya'a,

ma ulobang roak ia ma nka'a Ubu.

11 Lan ana,

ia wol fyawan lahir verin oa,

na'uk fiang ini fyawan urun.

Wol mane verin oa watan,

na'uk verin ya'a vali.

12 Ya'a ulobang ma dawan Onesimus,

na'uk ufalak ma newal ia ti ma nlolak oa.

13 Velik aba,

inak ma utahang ia na'a ini ma nkati oa,

ma nlobang ya'a na'a bu'i ralan.

Una'a ini,

tevek ufamalik Ubu Ni Ivar Lolin a.

14 Na'uk wean i wol mtorung,

na ya'a wol utahang vali ia,

ovu wol ukiwal oa,

boma oa ka'i fwadoku watan.

15 Snain Ubu nfadoku ma Onesimus nti talik oa,

na'uk wol mnanat,

boma mal-ewal ia ma mirua kakiwal.

16 Fiang ini Onesimus wol mane neluk tamata sansinir watan verin oa,

wean lan,

na'uk nlia tali inyai,

na ia norang roak Yesus,

ovu ulobang urun ia.

Ia fyawan urun verin ya'a,

na'uk verin oa,

na nlia tali inyai!

Tevek Duila'a Ni ia,

ovu vali oa mu ia.

17 Wean i munovak ne,

itrua kida tevek torang Ubu,

na mal-ewal ia wean watan i mala ya'a.

18 Wean i lan a nfaruki roak oa,

te ni utan na'a oa,

na ya'a ki uvara munuk afa avyai.

19 Ya'a Paulus ka'i ususan surat ini.

Wean i Onesimus ni utan na'a oa,

na veka ubahir munuk.

Na'uk deka mublufang vali ne,

oa mu utan na'a ya'a,

tevek ulobang roak oa ma morang Yesus.

20 Ba wean inyai ta kida,

na fara mlobang ya'a,

tevek itrua torang Duila'a.

Fwaloling ralang a,

tevek torang Kristus.

21 Ya'a ususan surat ini,

tevek uka'a roak ne,

iva'um ma motu afa i era verin oa.

Ya'a uka'a vali ne,

oa veka motu ma nlia tali afa i era yai.

22 Ba wean inyai,

na mlobang ma fwadoku wan isa na'a mu rahan a ma una'a teri,

tevek era lablobang verin Ubu ma nrenar bira falurut ra,

ma rfatalik ya'a tali bu'i ralan ma tsituan ewal ita.

23 Ning kida isa naran Epafras nala salam verin oa.

Amrua amna'a bu'i ralan,

tevek amorang Kristus Yesus.

24 Ning kida boku vali na'a Ubu Ni karya,

nararira Markus,

Aristarkhus,

Demas ovu Lukas,

rala vali salam verin oa.

25 Fara Duila'a Yesus Kristus nala Ni rala lolin a verin mia ma naflahar mia.

Ning surat i utulis ini,

lawan watan ini.Ya'a Paulus,

ala salam verin mia