3
यूहन्ना बपतिस्मा दिणै वाळा
(मरकुस 1:1-8; लूका 3:1-18; यूहन्ना 1:6-8, 15-34)
1 तिंआं धैड़ै यूहन्ना बपतिस्मा दिणै वाळा यहूदीया रै बियावान जगह मन्ज ईच्चीकरी यह प्रचार करना लगा: 2 “अपणै बुरै कमा थऊँ मना फेरा, क्ओकि स्वर्गा रा राज्य नेड़ैआ।” 3 एह सो ही हा जसेरै बारै मंज यशायाह भविष्यवक्ते बल्लुरा थू:
“बियावान जगह मंज कोई हक्का पऊ करदा कि,
प्रभु रा रस्ता तैयार अतै सिध्धा करा।”
4 तिनी ऊँटा री ऊना रै कपड़ै लाऊरै भूंदैं थियै, अतै ढाह्का मन्ज चमड़े रा पटका बनी रखदा थु। सो टिड्ड़ी अतै मखीर खान्दा थु। 5 ता यरूशलेम, यहूदीया अतै यरदन रै अखा-ब्रखा रै सब जगह रै मणु तैस बल्लै आऐ। 6 तिन्यै अपणै-अपणै पापा जो मनी करी यरदन नदी मन्ज यूहन्नै थऊँ बपतिस्मा लैऊ।
7 जैहणै तिनी मतै सारै फरीसी अतै सदूकि जो बपतिस्मा लैणैं ताऐं अप्पु बल्लै इन्दै हेरू, ता तिआंओ बल्लु, “हे किड़डै रै बच्चैओ, तुसिओ कुणी दस्सी दिता कि प्रमात्मैं रै ईणैं वाळै गुस्सै थऊँ नह्ही पेय्आ। 8 ठेरै तांये सबूत देय्आ कि तुहै अपणै मन पापा थऊँ फेरै। 9 पर अपणै-अपणै मना मंज एह सोची करी बेफिकरै मत भोआ कि अब्राहम तुंदा पिता हा; क्ओकि अऊँ तुसु सोगी सच बलदा, कि प्रमात्मा ईंआ नड्डा थऊँ अब्राहम तायें औलाद पैदा करी सकदा। 10 अतै अबै कुहाड़ी रुख्खा रै मोळा पुर थैऊरी हा, ठेरै तायें जैड़ा रूख्ख खरा फळ ना दीन्दा, तैस बड्डी करी अग्गी मन्ज फूकी दिंदैं।
11 अऊँ ता तुसिओ पाणी सितै मना फेरनै रा बपतिस्मा दिछु करदा, पर जैडा मेरै बाद ईणैबाळा सो मिन्जो थऊँ भी शक्तिशाली हा; अऊँ तसेरै जुटै रै तैसमै खोलणै रै भी काबल निय्आ, तैस तुसिओ पवित्र आत्मा अतै अग्गी रा बपतिस्मा दिणा। 12 तिनी अपणै हथ्थै कूड्डि पकडुरीआ, अतै तैस अपणी बगड़ी जो खरा करी साफ करना, अतै कणक ता तैस पेड़ू मन्ज कठेरनिय्आ पर भू तैस तैहा अग्गी मन्ज फूकणा जैड़ी कदी भी ना हिहणी।
यूहन्नै रै द्वारा यीशु रा बपतिस्मा
(मरकुस 1:9-11; लूका 3:21, 22; यूहन्ना 1:31-34)
13 तैस टैंमै यीशु गलील थऊँ यरदन नदी रै कनारै यूहन्ने थऊँ बपतिस्मा लैणां आ। 14 पर यूहन्ना एह बल्ली करी तैसियो रोकणा लगा, कि ‘हे गुरू मिन्जो ता तुन्दै हथ्थै बपतिस्मा लैणां चहिदां थू, अतै तूहै मिन्जो बलै आए ? 15 यीशुऐ एह जबाब दिता, कि “हबजुं ता ईंआ ही भूणा दे, क्ओकि असिओ ऐस तरीकै ही पवित्राताई जो पूरा करना ठीक हा”, ता यूहन्ने तसेरी गल्ल मनी लैई। 16 यीशु बपतिस्मा लैई करी पाणी थऊँ ऊपर आ, अतै हेरा, तैस तायें अम्वर खुली गो; अतै तिनी अप्पु पुर प्रमात्मैं री आत्मा कबूतरा रै रूपा मन्ज अपणै ऊपर इन्दी हेरी। 17 अतै हेरा, एह आकाशवाणी भुई, “कि एह मेरा प्यारा पुत्रआ, जैस थऊँ अऊँ बड़ा खुशआ”।