21
21:1-4 Narilâ Dan
1 Jisu-oy Jihudiglâlâ mundirni* thaka bholate ghuriyâ-phiriyâ case aro Bhogobange teka-puisâ dan dewa bhandrani dhon-dokra thaka mânglâlâ buksis bhoreya jawara dikhile. 2 Aro ek jhon kunui nawa narilâ duidâ tama puisâ bhoreya dewaraw oy dikhile.
3 Jisu koy, “Hâcâykene moy tuglâge koy, hogolla câyâ ey narirây bakhar dise. 4 Alga mânglâto uglâge nalaga dhon-dokrara say dise, kintu ey narirâ, jidâ oge pin lagibân, udây oy bekun dise.”
21:5-8 Jihudiglâlâ Mundirrâge* Ses Kuribo ke Jisu-oy Agete Kuse
5 Tane koy jhon sissoglâ* gop koy, “Mundir banaba hilglâ ki âwâl aro beraglâw ki âwâlke sajase.” Te Jisu koy, 6 “Iglâ tuglâ dekhe, kintu sumây ahibo, je dinâ ekonda hilglâ jora lagiyâ nathakibo, bekun bhangeya phelabo.”
7 Pase uglâ oge pusi, “Guru, idâ kun bhola hubo aro iglâ hoba dhurise ke âmâglâ ki cin dikhibo?”
8 Oy koy, “Bhalake câyâ thakik, jate tuglâge kâyu coklaba napabo. Bakhar jhonne mola namni ahibo aro kubo, ‘Moy pini oy, sumâyrâ kasase!’ Kintu uglâlâ gari-gari naja.
Jisulâ Gari-gari Jawaglâge Kosto Dibo
(Mothi 24:3–14; Mark 13:3–13)
9 “Aro je bhola ban-san, mara-mari aro jaha-taha howaglâ tuglâ huni, tuglâ nadaraw. Iglâ age hobay lagibo, kintu ey basturâ logelogeke ses nahobo.” 10 Tane oy aro koy, “Ekra jatda arekra jat loge mara-mari kuribo. Aro desjaw arekra des loge mara-mari kuribo. 11 Aro nananta jagaglâni bhuisâl hubo, akal puribo aro nananta beram hubo. Aro nananta jinis hubo, jiglâ dikhiyâ mujun tamte darabo aro hâw khawa kamglâ din uphurniu dikhibo.
12 “Kintu iglâ bekun howa age, tuglâge dhuribo aro kosto dibo aro kirtun ghorglâni* anibo aro karagarni* thubo. Tuglâ mola sisso* hoy beden tuglâge raja aro rajyapalglâlâ agni bicâr kuribo. 13 Aro uglâge mola beden sakhi debage idây tuglâlâ bokra bhala tal hubo. 14 Te nijâglâge basabage ki kubo, udâ agete tuglâ monni nabhabik. 15 Tuglâ ki kubo, udâ moy tuglâge kotha aro bhala buddi dibo aro jidâ tuglâ kubo, udâ nahoy ke tuglâlâ sutruglâ koba napabo. 16 Tuglâlâ bap mawglâ, bhâyglâ, gustiglâ aro homasglâw tuglâge dhuriyâ dibo aro tuglâ koy jhonge uglâ mariyâ phelabo. 17 Tuglâ mola gari-gari beray beden tuglâgon hogole dikhibây napabo. 18 Kintu iglâ hulew, tuglâ kunui duk napabo. 19 Bhogobange datikke bissâs kuriyâ thakik, te tuglâ Bhogoban loge thakibâ pabage kunudinâw namora-jiurâ* pabo.
Jirusalemra* Ses Kuribo ke Jisu-oy Kuse
(Mothi 24:15–21; Mark 13:14–19)
20 “Jirusalem townlâ cari-digi diyâ sipâyglâlâ ghuriyâ-phiriyâ thakara je bhola tuglâ dekhe, ey towndâ donde ses hubo ke tuglâ janibo. 21 Tane jây Jihudiyâ oncolni thake, tuglâ paharglâ bhay dâwriyâ palaw aro jây townni thake, tuglâw towndâ thoya palaw aro jây Jirusalemla karate thaka desni ase, tuglâw townni nahamaw. 22 Ey sumâyglâni sasti dibo, jate Bhogobanla likhiyâ-thowaglâni* lekhara hoya ses hubo. 23 Ôy sumâyglâni gawbhari timâtglâ aro sawa dut diyâ thaka mawglâ bakharke kosto pabo! Ey jagala mânglâ birât kosto pabo aro ragte Bhogoban-oy ey mânglâge sasti dibo. 24 Uglâge toral diyâ maribo aro kageba dhuriyâ mujun gotay desglâ bhay niyâ jabo. Aro Jirusalem towndâge Jihudi nahowa jatla sason kora sumâyrâ japte ses nahoy, tapte uglâ towndâge dokhol kuriyâ thakibo.
Hogol Mân Jatla Dango Bhâyrâ* Ahibo
(Mothi 24:29–31; Mark 13:24–27)
25 “Rôd, can aro taraglâni hâw khawa cin dikhibo aro sagor aro dhiulâ jureke sobdo howaglâ huniyâ mujun bastulâ hogol mân jatglâ ulangpalang aro âljâl hubo. 26 Din uphurlâ jinisglâ luribo beden bastuni ki ahibâ lagise ke mânglâ dareya mujun jingijanga hoya jabo. 27 Tane uglâ Hogol Mân Jatla Dango Bhâylâ âwâl bol aro sukti diyâ ahara dikhibo aro ola cari-digi diyâ ap thakibo. 28 Je bhola iglâ bek hoba dhore, tuglâge kosto thiki basaba sumâyrâ kasase beden cahoske thakik.”
Dumni Gasla Kirsâ Thiki Hikiyâ New
(Mothi 24:32–35; Mark 13:28–31)
29 Tane Jisu-oy uglâge kirsâ koy, “Dumni gas aro alga gasglâge ca. 30 Je bhola gas pata bârây, tota din ahibâ lagise ke tuglâ jane. 31 Eke nekhay je bhola ey jinisglâ hoba dhurise ke tuglâ dekhe, Bhogobanla sasondaw* hong-hong huse ke tuglâ janibo. 32 Moy tuglâge koy, ey jinisglâ howa age elala mânglâ namuribo. 33 Sorgo* aro basturâ ses hubo, kintu mola kothaglâ kunudinâw ses nahubo.”
Jisulâ Phiriyâ Ahara Bhalake Câyâ Thak
34 “Tuglâ bhalake câyâ thakik, Khawa-dawa, nisâ-tisâ, pinâ kapur, rong-phurti aro jingkây pay ungkây basibâ bokra say monni bhabiyâ nathakik. Aro jate ôy dindâ askayke ahiyâ mujun tuglâge phan hena nalage. a 35 Ôy dindâ ey bastuni basiyâ thaka hogol mânglâlâ uphurni ahibo. 36 Udâ beden hogol bholay bhalake câyâ thakik aro Bhogoban thiki bor magiyâ thakik. Jate je bhola iglâ hoy, tuglâ bol pabo aro ey jinisglâ thiki basibo aro Hogol Mân Jatla Dango Bhâylâ* agni rong-phurtike khara hoba pabo.”