16
ईसु को पाछो जिन्दो होबो
(मत्ती 28.1–8; लूका 24.1–12; यूहन्ना 20.1–10)
1 आराम हाळो दन क पाछॅ मगदला नाऊँ का सहर मं रहबाळी मरियम अर याकूब की माँई मरियम अर सलोमी न सुगनी चीझां मोल ली।जस्यां यहूदी मनख्यां की रीत रीवाज मं होवॅ छ ऊस्यां व बी सारी सुगन्ध आबाळी चीझां न ईसु की लास प लगाबा काण लेगी। 2 सप्ताह को फॅलो दन दीतवार को दन तड्कॅ सूरज उगताँई व गुफा प गी ज्यां ईसु की लास धरी छी। 3 तो व अपण-आप खबा लागी,आपणकाण गुफा का बार्णा का भाटा न कुण हटादेगा?” क कस्यां ऊ भाटो घणो भारी छो। 4 पण वानॅ आँख्यां उठाई तो गुफा का बार्णा को भाटो व्हां सूँ हटयो देख्यो,क कस्यां ऊ भाटो घणो भारी छो 5 अर व बेगी सीक गुफा क मॅलाड़ी गी तो वानॅ एक धोळा लता फरयां एक मोट्यार मनख जींवां हाथ क आड़ी बठयो देख्यो अर व उनॅ देख'र डरपगी। 6 फेर ऊ मोट्यार मनख न व्ह लुगायां सूँ खी, थां डरपो मत” म्हूँ जाणु छूँ क थैं ईसु न हेर री छ , ज्ये नासरत को छ,ज्ये कुरुस प लटका'र मारगालयो छो।ऊ य्हाँ कोई न्ह छ!ऊ मरग्यो छो पण अबाणु जिन्दो होग्यो। अगर थांनॅ ई बात प बस्वास न्ह होवॅ तो देखल्यो ज्यां ऊंकी लास धरी गी छी । 7 अबाणु थैं य्हाँ सूँ जाओ अर ईसु का चेला सुं अर खास कर पतरस क तांई यो समचार सुणावो क ऊ था सूँ पहली गलील मं जाऊगो जस्यां उनॅ था सूँ पहली बताई छी।थें उनॅ ऊंठी देखॅगा।” 8 तो व्ह लुगायां घणी डरपगी अर सोच करती कांपती होई गुफा मं सूँ भाग'र खड़गी,अर वानॅ कोई क ताँई कांई बी न्ह बताया क कस्यां व डरप गी छी।
मरियम मगदलीनी न ईसु दिख्यो
(मत्ती 28.9,10; यूहन्ना 20.11–18)
9 [ सप्ताह को पहलो दन तड़कॅ जिन्दो होबा क बाद मं ईसु सब सूँ पहली मरियम मगदलीनी क सामॅ परकट होयो जिमं सूं व्हानॅ सातभूतां सूँ छुटकारा दियो छो। 10 उनॅ जा'र ईसु का साथ्यां सूँ खी ज्ये घणा कळेस मं छा अर रोरीया छा यो समचार सुणायो क ईसु जीवतो छ। 11 अर वानॅ ऊंकी या बात सुणी क “ऊ जिन्दो होग्यो छ अर मरियम मगदलीनी न दिख्यो छ” पण वानॅ ई बात को बस्वास कोई न्ह कर्यो।
दो चेला न ईसु दिख्यो
(लूका 24.13–35)
12 ईंक पाछॅ ईसु दूसरा रूप मं ऊंका चेला मं सूँ दो चेला न दिख्या जद व गाँव क आड़ी जार्या छां। 13 व्ह दोनी चेला न पाछॅ आ'र ओरां काण बी ई बात को समचार द्यो पण वांनॅ बी व्हांकी बात प बस्वास न्ह कर्यो।
ग्यारा चेला न ईसु दिख्या
(मत्ती 28.16–20; लूका 24.36–49; यूहन्ना20.19–23; प्ररती 1.6–8)
14 ई बात क पाछॅ ईसु ग्यारा चेला न बी दिख्या जद व रोटी खाबा बठ्या छा।तो ईसु व्हांको अबस्वास अर मन की करडाई देख'र ईसु न चेला दकाल्या। क कस्यां चेला ईसु क जीन्दो होबा को समचार देबाळा की बात प बस्वास कोई न्ह कर्या छा। 15 फेर पाछॅ ईसु न वांसूँ खी,थां पूरी दुनिया मं जा'र सारा मनख्यां काण म्हारा बारा मं छोखी खबर बतावो। 16 ज्ये मनख म्हारॅ ऊपर बस्वास करॅ छ अर बतिसमो ले ऊंकाण अपणा पाप क ताँई सजा पाबा सूँ बच जाऊगा।पण ज्ये कोई म्हारॅ ऊपर बस्वास न्ह करॅ तो व दोसी ठहरगा,क कस्यां व्हांका पाप अबारताँई व्हाँक गोड़यां छ। 17 ज्ये म्हारॅ ऊपर बस्वास करॅ छ व्ह अस्यांका काम करगा ;क व्ह म्हारा नाऊँ सूँ भूतां न खाड़ॅदेगा,अर व्ह नई-नई भासा बोलगा। 18 अगर व हाथ सूँ जेरिल्ला साँपां न बी उठा ल्येगा ,अगर व्ह कोई जेरिल्ली चीझां न बी पीवॅ जिसूं मनख मर जावॅ छ,व्हांकॅ ऊ चीझां सूँ कांई बी हानी न्ह होऊगी।अर व्ह अपणा हाथ न बीमार मनख्यां प धरेगा तो बीमार मनख छोखा होजाऊगा।”
ईसु को स्वर्ग मं जाबो
(लूका 24.50–53; प्ररती 1.9–11)
19 जद परभु ईसु अपणा चेला क लारां बातां करबा क पाछॅ स्वर्ग मं उठा ल्यो ग्यो अर परमेस्वर क जीँवां हाथ क आड़ी बठग्या ज्यां आधीकार होवॅ छ। 20 तो ईसु का चेला न सारी जगह जा'र मनख्यां क ताँई परमेस्वर की छोखी खबर प्रचार करी अर परभु व्हांक लारां बड़ा बड़ा अचम्बा काम करतो रियो क वांनॅ ज्ये ज्ये बातां खी छी परभु व्ह बातां न चमतकारी निसाणीयां सूँ बचना न साचो कर्यो छ।] आमीन॥