¹ Jet nontan na inkay-anak nen Jesus shi Bitlihim, ja sakop ni Jodia, maramen si Hirodis i ari. Idi nontan, waray mimotok shi Jerusalem ja toon nankedaing ni bisto ni talaw ja edapod bedalan. ² Jet sha inbaga ey, “Towa sota nga-ngen nay-anak ja ari ali ni Hodiyos? Inon-an miy inbo-day nonta talaw shi bedalan et si-katoy engamta-an mi so ey nay-anak. Dimaw kami di say kami manshedjaw so nontan na nay-anak ka ari.”

³ Idi inamta-an nen Ari Hirodis iyay ya kowan sha, ngaaw i dekna to, jet angken pay sota ira emin na tood Jerusalem. ⁴ Jet si Ari Hirodis, sina-nop ton emin sota ira apo ni papashi tan sota emantosho ni dinteg ni Hodiyos et insho-petan to ira ja kowan to ey, “Towa kariy koston kay-enakan nonta naypadto nonta bayag da ey mengitoshay son si-katejo, ja ibetkag kono ali nen Apo Shiyos?”

⁵ Jet inkowan sha son si-kato ey, “Shi Bitlihim ja sakop ni Jodia i koston kay-enakan to, ta si-kato met i naysolat ja kowan nonta para padto nonta bayag da, ja esel met laeng nen Apo Shiyos, ⁶ ja kowan to ey, ‘Say Bitlihim, shima dogad ja sinekopan ni poli nen Joda, ootik nga agpayson siyodad no may-inges shima emin na kait ton siyodad nodtan met laeng nga dogad. Nem maybidang ey epateg ta si-kato aliy kedepo-an nonta mengitoshay ni took ja i-Israel.’ ”

⁷ Jet nontan ma si Ari Hirodis, inpa-odop to ira ngo sota nankedaing nga too ja edapod bedalan. Jet insho-petan to iren pasiya nonta a-abos sha no pigan i inbo-day nonta talaw wa inon-an sha. ⁸ Jet inbetkag to ira shi Bitlihim ja kowan to ey, “Eti, daw kayo ngarod, singpet joy anap nonta nga-nga, jet no sepolen jo, ipa-amtayo ali son si-kak. Say ondawak ngo ja en manshedjaw son si-kato.”

⁹ Idi itenengan ira niya toon nankedaing iya kowan nen Ari Hirodis, dima-jat iren ondaw shi Bitlihim. Jet sota talaw wa inon-an sha alid bedalan ja edapo-an sha, epangdo ey si-kara shima dogad ja dawan sha, jet nan-akad ira ingkatod simalsheng sota talaw. Jet pintek ton kosto sota kawad-an nonta nga-nga. ¹⁰ Idi inon-an shen simalsheng sota talaw, ebadeg i imdeng sha. ¹¹ Simekep ira nodta baley et inon-an sha sota san-ina. Jet sota ira toon nankedaing ja edapod bedalan, nantalimokod ira ja nanshayaw son si-kato. Jet inbo-day sha sota inta-jon sha ja nankebanol ja i-akan sha so nonta nga-nga, ja balitok, tan sota emanseng-ew wa kowan sha ey insinso, tan mira.

¹² Idi imakad ma ira, apil i shindan sha tep waray inpa-amta nen Apo Shiyos son si-kara shi kokokip sha ey eg ira kari manshedan shi baley nen Ari Hirodis.

¹³ Idi naksheng den dimaw ira jay ya too, sota anghil nen Apo Shiyos, nanparang so nen Jose shi kokokip to ja kowan to ey, “Bangon ka et ibtik mo ita nga-nga tan si ineto shi Egypt. Jet pan-iyan kayo nin shiman ingkatod ekak ikowan ey on-etan kayo mowan. Ta si Hirodis piyan ton pa-enap ali iya nga-nga ja kowan to ey bono-en to.”

¹⁴ Jet si Jose, idi bimangon, inda to sota nga-nga tan si Maria nontan na dabi met laeng et inbakwit to ired Egypt. ¹⁵ Jet nan-iyan ired man ingkatod etey si Hirodis. Wara si Jesus shi Egypt nin say metongpal sota kowan ni padto nonta bayag da, ja esel nen Apo Shiyos met laeng, ja kowan to ey, “Shi Egypt aliy edapo-an ni anak ko, ja inedjaban ko so di.”

¹⁶ Idi inamta-an nen Hirodis ey nandibas ira sota nankedaing nga too, kowan tod nemnem to ey, “Endedamsis sha gayam sota inbilin ko nontan!” Jet ebadeg ga pasiya ma i bonget to. Inbetkag to ira sota solsharo to ja memono ni emin na nga-ngen daleki shi Bitlihim ja mantaw-en ni showa ono ekolang, ingkato nodta dogad ja nandi-mot shi Bitlihim. Ta say kowan nonta nankedaing nga too, inon-an sha sota talaw nonta showen tawen den edabas. ¹⁷ Sajay i kaytoshongan nonta padto nen Jeremias nonta bayag da ja kowan to ey, ¹⁸ “Waray naytenengan ja makedsang i ngogngog to shi Rama. Si-kato si Rakil, ja toka ira nengnengisi sota annak to. Eg to koston ma-adok tep na-enshi ira da sota annak to.”

¹⁹ Jet idi etey si Ari Hirodis, nanparang mowan sota anghil nen Apo Shiyos so nen Jose shi kokokip to nonta wara ired Egypt, ja kowan to ey, ²⁰ “Bangon ka et alam ita nga-nga, tan si ineto, jet akad kayo ma shi Israel. Pesed ma niman tep sota kowan to ey memono so nita nga-nga, etey da.”

²¹ Jet si Jose bimangon et inda to sota nga-nga, tan si Maria et nay-oli ira ma shi Israel. ²² Nem idi inamta-an to ey si Arkilao ja anak nen Hirodis i naysa-dat so nen ameto ja man-eshi shi Jodia, timakot si Jose ja ondaw shiman. Binanshaanan mowan ni anghil shi kokokip to ey angken eg metodoy shiman no diket ondaw et shi ili ni Galilia. ²³ Jet siya, dimaw ired man et nan-iyan ired ma siyodad ja kowan sha ey Nasarit. Sajay i edaga say metongpal sota naypadto nonta bayag da ja kowan to ey, “Si-kato, mayngadnan ey i-Nasarit.”