LUKE
Hini omaˈ-atan tay an libju
Hini nangtulaˈ ay tay an libju ja hi Luke an oha an choktor an namati ay Hesu Kristo. Hijay choˈchoˈ-or chi intulaˈ na an enat Hesus ja hana intudtuchu na. Nete-a chin nipadtu an pituˈkhungan John Bautista ja hi Hesu Kristo ingkhana chin nummahuwana ja chin temmalakhujana ad langit. Hi Luke khu chi nangtulaˈ ay ni toloy tay an libju an Aramid, mipanggip hachi enat chin apostol Hesu Kristo, ja hay enat hachi cho-or an namati chin napfalin hi numpfangngachana ad langit. Hay nangtulungana ay tay chugwa an libju ja hi Teofilus an allon hana uchumna an oha an natakhay an takhu ad Rome. Ma-id anila ta-o hi uchumna hi atatakhu na.
Hitay an libju an intulaˈ Luke ja ipa-innila na an hi Hesus ja hija hini Hennag Apo Jos an Mamahhod, wenno Mesias, an hijay ingkarin Apo Jos an manakhu hana Hudju ja hana uchumna an tatakhu an mamati ay hija. Intulaˈ na an hi Apo Jos ja pinili na hi Hesus ta ekasaba na hitay Ebanghelyo hana napubli (4:18). Hotti ay tay an libju ja cho-or hana mapfaha an omaˈ-atan Hesus, ja hana tatakhu an numpfino-ob-on chi mahapor cha, om-omod hachi numpunchokhoh ja hachi nun-ahuˈlungan hi napukhit an ispiritu, ja hachi tatakhu an khun cha pahigwon.
Cho-or hana istorya an ay tay Luke chi pachakngana ja angkhay an hija hay hato. Chin kantan hachi angher, ja hachi khun mumpahtor an ay nannig ay Hesus chin nituˈkhungana, ja chin nataynan Hesus hichi templo, ja chin inistoryan Hesus an achangjan an takhu ja hi Lazarus, ja chin istoryan chin maphod an takhu an Samaritan ja chin unga an nakak hi pfalay cha ama na.
Hana uchumna an intulaˈ Luke ay tay an libju ja hini omaˈ-atan chi kalalag, ja hini Espiritu Santo ja hini an-anla, ja hachi pfinapfai an khun tomolong ay chuy tamun Hesus, ja hini pammakawan Apo Jos hi pfahor, ja hini panaghakhanan chi namati ay ni pumpfangngachan Hesu Kristo.