¹ Napfalin hitay ja inamung Paul hachi namati ja tinugtukhuna chicha ta pfumi-ah cha hi pammati. Napfalin ja pfimmokha ja empacheh na an umuy ad Macedonia. ² Ja an amin hachi apfuglapfuglay an enenggwana ja tinukhuna hachi namati ingkhana hi ne-atam ad Greece. ³ Ja nihihidchi hi toloh pfulan. Gwa an mun-ar-alimanman an munlukhan hi papor an umuy ad Syria ja chengngor na an nunhahapit hachi Hudju an i cha pfuta-an ta patajon cha hija. Amat hichi ja agkhuy entoloy Paul an umuy ja numpfangngad ta agwuna khu ad Macedonia. ⁴ Ja gwacha hana numpun-ibpfa na an cha Sopater an empfalay Pirus an eBerea, ja cha Aristarkus ay Secundus an eTesalonika, ja hi Gayus an eDerbe, ja hi Timoti, ja cha Tikikus ay Trofimus an e-Asia. ⁵ Impangulu cha an immuy ad Troas ta hichi chi papannochan cha ay chaˈmi ja hi Paul. Ja nuntaynan ami ay Paul ad Filipos. ⁶ Napfalin chin ngilin chi Hudju an khun cha anganan hi tenapay an ma-id pfinoˈpfoˈ na, ja nunlukhan ami hi papor an nangunud ad Troas. Immuy chi lemah arkhaw ja ne-atam ami ja chinakngan mi chin numpun-ibpfa mi an nangpangpangullu. Ja nihihidchi ami hi ohay markhachu.

⁷ Ja chin Hapfachu hi nadhom ja na-amung ami an namati an mangan ay ni panginomnoman chin natajan Kristo. Napfalin ja ente-an Paul an muntudtuchu ingkhana hi temmonga ti inali na hi epacheh mi chin mun-inggwiˈgwiit. ⁸ Ja cho-or chin hilaw ay chuy nangennaˈjab an kwarto ay chuy pfalay an na-amungan mi. ⁹ Ja gwa han ohan unga an lala-e an hi Eutikus an inu-umpfun chin tagwa. Ja khun muntumuntugtukhun hi Paul ja khun michumor hi Eutikus ja na-omtang ja naloˈ. Unagkhu aˈ-alina ja nakhah ja immuy hichi ahpfuna. Un cha agkhu i lenaˈ-oy ja nanattoy. ¹⁰ Amat hichi ja niˈpfutay hi Paul ta tikhana hi Eutikus ja nunjakotto ja hinaˈjuju na, ja inali na hi, “Achi aju kumila ti matakhu.” ¹¹ Ja henongkhop ami ay Paul ja nangan ami. Ja entoloy Paul an niˈhahapit hachi tatakhu ingkhana hi naˈ-arkhaw ja un ami makak. ¹² Ja in-anamut cha hi Eutikus an mamattakhu ja mun-an-anla an amin chin tatakhu.

¹³ Amat hichi ja nunlukhan ami^a hi papor ta ipangulu mi an umuy ad Asos, ti hichi chi inalin Paul hi punhoochan mi ay hija ta echallana an mangunud. ¹⁴ Ja chinakngan chaˈmi ad Asos ja niˈlukhan hi Paul ta umuy ami an amin hichi ad Mitilene. ¹⁵ Ja chin nun-inggwiˈgwiit ja enenggwa mi ad Kios. Entoloy mi an umuy ja emmatam ami ad Samos chin me-aggwah arkhaw ja emmatam ami ad Miletus chin me-atloh arkhaw. ¹⁶ Ti inlahiyan mi ad Efesus an agkhuy mi intaˈchug, khapo ta achi podhon Paul an mahalegwa ami. Ti umi-iyyahop hi pe-ataman mi ad Jerusalem ta ah-upan mi hini pfehtan chi Hudju an allon cha hi Pentekostes. ¹⁷ Hotti chin agawwachaan mi ad Miletus ja hennag Paul hana immuy ad Efesus an i mamokhaan hachi pangulun chi namati hichi ta umali cha an miˈchittum ay chaˈmi. ¹⁸ Immali cha ja inalin Paul ay chicha hi, “Anila ju an amin chi en-enat u an nete-a chin immaliyaˈ heto ad Asia, ¹⁹ an enat u an amin chi tamun Apo Jos an na-ugman hi luwa ja panagpakumbaba. Ja cho-or hachi likhat an henortap u khapo hachi Hudju an namarpalikhat ay ha-in. ²⁰ Anila ju khu an agkhuy u en-aamoh an nangtuchu ay ni hapit Apo Jos ti aphochan ju. Hotti intudtuchugwan chaˈju ay ni khun ju a-amungan ja anong un hichi pfarpfalay ju. ²¹ Ja anila ju khu an numpadchung chin intuchuˈ hachi Hudju ja hachi Hentil, an mahapor an chuˈkhon ta-o hana pfahor ta-o ay Apo Jos ta mamati ta-o ay Apo Hesu Kristo. ²² Ja tayya an umujaˈ ad Jerusalem ad ugwani, ti hijah tay chi inalin ni Espiritu Santo, ja agkhuy u anila nu ngay ma-at ay ha-in hichi. ²³ Muti anilaˈ an mipfaluchaˈ ja malikhatanaˈ, ti hitay chi inalin ni Espiritu Santo an amin hi immajaˈ. ²⁴ Muti achiˈ nonomnomon hitay piˈtakhuwaˈ, ti hini napfalor ay ha-in ja hini pangibpfohaˈ ay tay impatamun Apo Hesus ay ha-in an i manihtikhuwan ay ni Ebanghelyo an panginnilaan ay ni khohkhoh Apo Jos.

²⁵ Ja ad ugwani ja anilaˈ an chaˈju an engkasabaaˈ ay ni omaˈ-atan ni pun-ap-apugwan Apo Jos, ja angkhaynana an achiyaˈ khu tigtikhan. ²⁶ Hotti chonglon ju hitay alloˈ. Nu gway achi mamati ay chaˈju an ma-utaw chi piˈtakhuwana ja ma-id pfahor u. ²⁷ Ti ma-id oh-ohha hi agkhuy u intuchu ay chaˈju ay ni tukhun Apo Jos. ²⁸ Hotti peˈpa-ennongan ju hini pammati ju. Ja halimunan ju khu hana uchumna an namati an impulang ni Espiritu Santo ay chaˈju. Enchokhan ju chicha an omaˈ-at ay ni khun mumpahtor hi karnero, ti hi Apo Jos ja numpfalinon chita-o hi tatakhu na khapo chin chalan Kristo an nun-ajuh chin natajana. ²⁹ Ti taynaˈ chaˈju ja anilaˈ an gwa hana uchumna an takhu an umali an mamaˈ-i ay ni pammati ju, an amat hana atattata-ot an khenger an khun omman hi karnero.

³⁰ Ja anong un hana ninidchum ay chaˈju an namati, ja gwachay muntudtuchu hi umallilaw, ja makhujud mangkay hana namati ja niˈ-unud cha ay chicha. ³¹ Hotti pa-ennongan ju ta achi aju ma-allilaw. Ja nomnomon ju chin nihihinnaaˈ ay chaˈju hi toloh tagwon an khun muntudtuchu. Lapfi ja arkhagwan ja intugtukhaˈ an nanukhun ay chaˈju an na-ugman hi luwaˈ.

³² Hotti ad ugwani ja ehchor u chaˈju ay Apo Jos ja ay ni ingkari na an khohkhoh na ay chaˈju. Hijay gway apfalinana an mangpapfi-ah ay ni pammati ju ja ichat na hana bindisyon an epfanoh na hana numpfalinona hi tatakhu na. ³³ Ma-id enamnagwaˈ hi pihu ja pfalitoˈ ja lopfong ju. ³⁴ Ti anila ju an khun u pfoˈlaon hana mahapor mi hana numpun-ibpfaˈ. ³⁵ An amin hana enat u ja impatikhaw u an mahapor an mahlo ta-o an muntamu ta gway itolong ta-o hana ma-id mapfalina. Achi ta-o alichuwan chin inalin Apo Hesus hi nangarjana hi, ‘Akhaˈkhaja hay hana mangchat mu hay hana chumagwat.’”

³⁶ Napfalin chin inalin Paul ja numpunheppe cha ja nungkalalag cha an amin. ³⁷ Ja nun-agwar cha hi Paul ja khun cha kumila. ³⁸ Ti ahighikha chin inalin Paul an achi cha mahpay tigtikhan hija. Amat hichi ja intulud cha hichi pingngit chi baybay ja nunlukhan han papor.