1 TESALONIKA
Hini omaˈ-atan tay an libju
Hitay an Tesalonika ja oha an pfuglay ay ni provincian chi Macedonia. Hitay chi nangpfangunan Apostol Paul hi oha an iglesian chi namati ay Hesu Kristo chin narpugwana ad Filipos.
Unot ma-id mapfajag ja hachi Hudju ja munhohongnger cha khapo ay hija, ti omaamoh cha hachi cho-or an Hentil an namati an pfungan chin enat Paul an mangaskasaba. Ja khapo hato ja enakhakhan Paul an makak ja immuy hichi ad Berea ja ad Atenas. Chin gawwachaana hichi ja chengngor na an anong un hachi namati ad Tesalonika ja naparpalikhatan cha khu. Hotti hennag Paul hi Timoti an nun-ibpfa na ta hijay immuy ta ina papfi-ahon chicha ay ni pammati cha, ja immuy khu hi Paul ad Korinto.
Gawwah chi pay ad Korinto hi Paul ja immanamut cha Timoti ay Silas an narpu ad Tesalonika, ja inali cha an nahamad chin pammatin hachi eTesalonika anong un cha maparpalikhatan. Amat hichi ja nuntulaˈ hi Paul ta papfi-ahona hini nomnom cha ja pammati cha ay Apo Jos.
Ay tay tulaˈ na ja khun munyaman hi Paul ay Apo Jos khapo ay ni otong an pammati ja pamhod cha. Hay oha an impa-innilan Paul hay hana eTesalonika ja hini omaˈ-atan hana nun-atoy an namati ay Kristo, ja hana maˈma-at chin pumpfangngachana. Gwacha khu hana inali na ay tay tulaˈ na an mahapor an annilaon cha an omaˈ-atan chi piˈtakhuwan an omepachenor ay Apo Jos.