¹ Alloˈ ay chaˈju an khun mangpangpangulu ay ni iglesia hina, an ohaaˈ khu an mangpangpangulu hi namati, ja ohaaˈ an niˈtikhaw chin nunlikhatan Kristo, ja ohaaˈ khu an midchum an mipapfagto ay Kristo chin pangpatikhagwana ay ni kinapfagto na. Gwa han penhod u an itukhun ay chaˈju. ² Ep-ephod ju an halimunan hana namati hina gwachaan ju, ti mipadchung cha hi karneron Apo Jos an impulang na ay chaˈju. Mun-an-anla aju koma an mangat ay tay tamu ju ta achi aju agkhu mungngulungur an mangali hi unaˈ napirpilitan an munserbi. Pfu-un hini pfumaˈnangan ju chi khapo na hi pangatan ju ay tay an tamu ti napukhit. Tomolong aju koma khapo hi pamhod ju an mangat. ³ Achi la-ahnaon impapilit ju hini penhod ju hay hana tatakhu an impulang Apo Jos ay chaˈju. Mahapor an chaˈju chi mangteˈte-a an mangat hi maphod ta gway tuntunchon cha. ⁴ Nu aton ju hay hato hot maphod chi lagpfu ju. Ti chin pumpfangngachan Hesu Kristo, an hijay napfagpfagto an mangpangpangulu hi namati, ja mipapfagto aju hi ma-id chi pogpogna.

⁵ Chaˈju khuh an ungunga, mahapor an unuchon ju hana mangpangpangulu ay chaˈju an namati. An amin aju an namati, mahapor an mumpakumbaba aju ja muntitinnolong aju. Ti gwa han impatulaˈ Apo Jos hi nangarjana hi, “Pfuhulon Apo Jos hana mumpa-akhaja, ja ekhohkhohana hana mumpakumbaba.”^a

⁶ Hotti mumpakumbaba aju ay Apo Jos an otong chi apfalinana, ta ipapfagpfagto chaˈju ay nuy arkhaw an eneˈcha na hi ipapfagtuwan ju. ⁷ Ehchor ju an amin hana likhat ju ay Apo Jos ti hijay manalimun ay chaˈju. ⁸ Mahapor an khun ju onoˈnongon hay peˈ-at ju ja neˈhehemad ju. Ti hinuy pfuhur ta-o an hija hini Diablo wenno hi Satanas ja mipadchung hi khenger an khun mun-uliyod an lome-ole-od an maningit hi hay chupopona ta anuna. ⁹ Ehamad ju hini pammati ju ta gway aton ju an manchor hana aton Satanas an umallilaw. Ti anila ju an hay hato an likhat ju ja hija khu chi khun ma-at an amin hana i-ibpfa ta-o an namati hay hana numpfino-ob-on an pfuglay heto lota. ¹⁰ Achi mapfajag hitay punlikhatan ju, hot hi Apo Jos ja epaphod chaˈju ta ma-id pungkuchangan ju. Ipapfi-ah chaˈju ta mehemad hini pammati ju, ti hija hini magmagkhohkhoh an Jos an nangajakhan ay chaˈju ta midchum aju ay ni kinapfagto na an ma-id pogpogna khapo hi neˈ-oh-ohhaan ju ay Kristo. ¹¹ Madaydayaw hi Apo Jos an hijay mun-ap-apo hi ma-id chi pogpogna! Amen.

¹² Tayya an intulaˈ u hitay hoˈhoˈchod an tulaˈ ay chaˈju ja temmolong hi Silvanus, an ipfilang u hi mapagtarkan an ibpfa ta-o an namati. Nuntula-aˈ ta tukhunoˈ chaˈju ja ta tihtikhuwaˈ hini umannung an omaˈ-atan chi khohkhoh Apo Jos. Achi la-ahna ja chin-ug ju hini khohkhoh na.

¹³ Pakumustaan chaˈju anu hay hana i-ibpfa ju an namati ad Babilon an pinilin khu Apo Jos. Ja kumusta aju anu khu an allon Mark an impfilang u hi empfalay. ¹⁴ Ja manghenpfopfogkha aju khu hina an mangpatikhaw hi pumpepennohhochan ju.

An amin aju an nidchum ay Kristo ja pomhochadniˈ hini piˈtakhuwan ju.