2
ज्योतिषी रा एणा
1 हेरोदेस राज़ै रै बौक्ता ना ज़ैबै यहूदिया ज़िल्लै रै बैतलैहमा ना यीशु रा जन्म हुआ ता हेरा, पूर्व दिशा ना कई ज्योतषी यरूशलेम ना एज़िया पुछ़दै लागै l 2 यहूदी रा राज़ा ज़ौसरा जन्म हुआ सा कौखै सा? किबैकि आसै पूर्व दिशा न तेइरा तारा हेरू सा होर आसै तेइबै नमस्कार केरदै आऐ सी l 3 ऐ शुणिया हेरोदेस राज़ा होर यरूशलेमै रै सारै लोका डौरै l 4 होर तेइयै यरूशलेमै रै सारै महापुजारी होर धर्मज्ञानी ना कट्ठे केरिया पुछू, मसीहा रा जन्म कौखै होणा चाहियै? 5 तिन्है तेइबै बोलू, यहूदिया ज़िल्लै रै बैतलैहमा न किबै कि भविष्यवक्तै ऐण्ढाऐ लिखू सा l 6 हे बैतलैहम, ज़े यहूदा देशा ना सा, तू कौसी बी रीतियै यहूदै रै अधिकारी ना होछ़ा नी ऑथी, किबैकि तो ना एक राजा निकळणा होर तेई मेरी प्रजा इस्राइलै री हेर शुण केरनी । 7 तैबै हेरोदेस राज़ै च़ुप केरदै ज्योतषी शाधिया तिन्हा ना पुछ़ू, कि तारा ढीक कुणी बौक्तै हेरूआ दा ती l 8 होर तेइयै ते ऐण्ढै बोलिया बैतलैहमा बै भेज़े कि ज़ाईया तेई बालकै रै बारै न ठीक-ठीक पता केरा होर ज़ैबै सौ मिलला ता मुँबै खबर देइत् ताकि हाँबी ज़ाइया तेइबै प्रणाम केरनू l 9 ते राज़ै री गल शुणिया नौठै होर हेरा, ज़े तारा तिन्है पूर्व दिशा ना हेरू ती सो तिन्हा आगै-आगै च़ैलू होर ज़ौखै सो शोहरू ती तेसा ज़ैग्हा आगै पुजिया रुकु l 10 तेई तारै बै हेरिया ते बोहु खुश हुऐ । 11 होर तेई घौरा ना पुजिया सो शोहरू तेइरी आमा मरियमा सैंघै हेरू होर टुँबड़ै पौड़िया तेईबै प्रणाम केरु होर आपणै-आपणै झोले खोलिया तेइबै सुना, लोबान होर गन्धरसै री भेंट च़ढ़ाई l 12 होर सुपनै ना ऐ च़िताउणी पाइया कि हेरोदेसा आगै बापस हेरीत् ज़ान्दै ते होरी बौतै आपणै-आपणै देशा बै नौठै ।
मिस्र देशा बै जाणा
13 तिन्हरै ज़ाणै ना बाद हेरा प्रभु रै एकी दूतै सुपनै ना युसुफा बै हेरूइया बोलू, उठ; तेई शोहरू होर तेइरी आमा बै लेइया मिस्र देशा बै ज़ा होर ज़ैबै तक हाँऊ तौभै नी बोलनू तू तौखै रौही किबैकि हेरोदेस एई शोहरू बै तोपणू आला सा कि एइबै मारिया खैत्म केरला । 14 सौ रातियै उठिया शोहरू होर तेइरी आमा लेइया मिस्र देशा बै नौठा l 15 होर हेरोदेस मौरनै ढौई तौखै रौहू कि सौ वचन ज़ो प्रभुऐ भविष्यवक्तै रै द्वारा बोलू ती कि मैं आपणा बेटा मिस्रा ना शाधू सौ पूरा होला । 16 ज़ैबै हेरोदेसै ऐ हेरू कि ज्योतषियै मूँ सैंघै धोखा केरू तैबै सौ झ़िका सैंघै भौरूआ होर लोका बै भेज़िया ज्योतषी ना पुछ़ूऐदै ठीक-ठीक बौक्तै रै मुताबिक बैतलैहम होर औरलै पौरलै सारै शोहरू ज़ो दूई बौर्षै रैती होर एथा ना होछ़ै ती मारनै द्याऐ । 17 तैबै ज़े वच़न यिर्मियाह भविष्यवक्तै बोलू ती सौ पूरा हुआ l 18 कि रामाह ना एक बड़ा विलाप होर रोणा शुणुआ, राहेल आपणै शोहरू री तेंइयै रोंदी लागी ती होर शान्त नी ती होणा चाँहदी किबैकि एबै ते नेई रौहे l
मिस्र देशा न वापस एणा
19 हेरोदेसै रै मौरनै ना बाद प्रभु रै दूतै मिस्रा ना युसुफा बै सुपने न हेरूइया बोलू, 20 कि उठ, शोहरू होर तेइरी आमा बै लेइया इस्राइलै रै देशा बै ज़ा किबैकि ज़ो शोहरू रै प्राण लेणा चाहा ती, ते मूँऐ l 21 सौ उठु शोहरू होर तेइरी आमा लेइया इस्राइलै रै देशा बै आऊ l 22 पर ऐ शुणिया की अरखिलाउस आपणै बापू हेरोदेसै री ज़ैग्हा ना राज़ केरदा लागा सा सौ तौखै ज़ाणै ना डौरू होर सुपनै ना च़िताउणी पाइया गलील देशा बै नौठा l 23 होर नासरत ग्राँ ना रौंहदा लागा ताकि सो वचन पूरा होला, ज़ो भविष्यवक्तै रै द्वारा बोलुआ ती, कि तेई नासरी कहलाइणा l