2
1-2 Allahri undo imap so'oap nia mangkina sumbaogti, "Nia mangkina sumbitna," aro sae saek sum eneko sae koupto tektek ebog. 3 Tektek ebiagha, Allahri, "Ik saek sum eneko wali sirik sum nemban," aro mo wepto pibog. Allahri im so'o sumbaogne neneag palilamap.
 
Allahri nimi phende abeneko sumbahiogne (2:4-25)
4-5 Allah Nuni ponekori imap so'oap sumbaog li eneko sembe sarikto pibogne. Mag anam Allahri pelengelan komag pongoroba sa'a-sa'a nia mangkina orog wamogpa, nimi nhondi babe, Eden aneko yae uro awe wenne babe orog wamog. 6 Aghana mog so'o punag wamogneri iba yangkalamogti, mog so'o sukuplamog. 7 Sukuplamogpa, Allah Nuni ponekori so'o olog tobogti, nimi sumbaog. Nimi sumbaogti, ulom ina hain epna phoaro tobong kibogpa, nimi aneko lebe seog. 8 Lebe alamogpa, Allah Nuni ponekori heng walelingkirobag sip Eden nimi aingniro wamnebag awe so'o nembaogti, nimi sumbaogne neneko ambarog. 9 Allah Nuni ponekori, "Mog so'o aingniro wamnep so'o enekoag wana wali sao kal nhon sao nhon sao pongkale," sembaogpa, pongkaog. Eden so'o anekoag nusamag kal phende pongkarek. Kal nhon neneko kal wana nimiri teropba nimi ya'ag kamag urop kal, nhon neneko kal wana nimiri teropba, "Malinge nene walinge nene," aro el tangsirop kal wamog. 10 Eden aingniro wamnep so'oag aneko mog so'o sumbaogne sukupnange sembe, mag lu nhon neneko agha mag ele tombare abeneko phae saog uro mabek. 11-12 Mag nhon sina Pison nenekori Hawila so'oag kanero yabirop. Hawila so'oag aneko kamna kapna alikinag uro toroba, tingibom warebom aroba kirik kamongkai saonge emas, apna song wali kal, apna leng-leng arop kirik kamna kapna maiknoro torop kirik yogne pibog. 13 Mag si phendepne sina Gihon nenekori Kus so'o kanero yabirop. 14 Mag si wilindipne Tigris nenekori Asyur so'oag heng walelingkirobag sip yabirop. Mag si tomnena Efrat urop. 15 Allah Nuni ponekori nimi sumbaogne neneko, "Eden mog so'o yae wamleri, awe topleri, wamlul," aro ambarog. 16-17 Nimi sumbaogne nenekoag Allahri yubu lelamogti, "Kal mog so'o eneag wamlange tane telamlulam, aghana kal wana nimiri teropba, 'Walinge nene, malinge nene,' aro el tangsirop kal eneogna tululam kom. Temen sum tepna anag agha lag taleba, tebalulam," seog. 18 Wene seogti, Allah Nuni ponekori wanaag agha seneraghogti, "Nengaboog wamnaba sunsunum kom. El yeplamlulne nhon elap sunsunum uro sumbanun," sembaog. 19 Wene sembaogti, so'o agha nia mangkina lebe aroba mog so'oag uropneap, im toman yabiropneap sumbaogne taneko ni poa nimi sumbaog nimi enekoag, "Si engkahilea kembanun," aro pabiog. Pabiogpa, a'ero-a'ero si engkahiogpa, si engkahiogne taneko sunsunum uro amik babe engelamsiek. 20 Lebe aroba mog so'oag uropneap, im toman yabiropneap taneko ni si engkahiogpa, nimi aneko yepnange elap sunsunumne orog wamog. 21 Orog wamogpa, Allah Nuni ponekori, "Nimi aneko mangkhauk maple," sembaogpa, malamog abeneko Nuni Allah ponekori nimi aneko ka'asik nhon lagto tobogti, lagto toboghag aneko sop agha nimbirog. 22 Ka'asik lagto tobogne nenekoag kelabo sumbaogti, nengabo anekoag pabiog. 23 Pabiogpa, nengabo anekori yubu lelamogti, "El neneog nanap sunsunum, el wamlangena yo'o nari yo'o, sop nari sop agha yag nembal. Ane sembe kelaboa si engkanun," seog.
24 Wene undo uro yabiogne ane sembe nengabori sikini sikinin laplobiagha, ela'angeri elkel tolamlaag agha sin nong nhon sop nhon nenep tangtop. 25 Ela'angeap elkelap abeneko kabeog wamdek, aghana sin ali sembamdek kom.