यीसु मसीह के खास चेलवन के ढेरे काम के बखान
यीसु के सरग जायेला
1
1-2 हे थियुफिलुस, यीसु आपन सेवा करे के सुरुवे से लेके आपन चुनलकन खास चेलवन के पबितर आत्मा देन से हुकुम देके सरग उठावल जाय के उ दिन तक जवन कुछ उ करलथीन आऊ सिखउलथीन, उ सब के बारे में हम हमर पहिला किताब में लिख चुकले हिवा । 3 उहे यीसु दुख सहे के बाद खुद ढेरे पक्का सबुत से आपन खास चेलवन के जीयत देखउलथीन, आऊ चालीस दिना तक उ खास चेलवन के दिखाइत रहलथीन, आऊ परमेस्वर के राज के बारे में बतावत रहलथीन । 4 आऊ जे घरी यीसु आपन चेलवन संगे हलथीन, त ओकिन के हुकुम देलथीन कि “यरूसलेम नगर के मत छोड़िहा, बाकि पिता के उहे वादा के पूरा होवे के आसरा देखत रहिहा, जेकर बारे में तोहिन हमरा से सुन चुकले हा । 5 काहेकि यूहन्ना त पनिया से बपतिस्मा देले हई, बाकि तोड़हे दिना के बाद तोहिन पबितर आत्मा से बपतिस्मा पइबा ।”6 उहे घरी खास चेलवन मिल के उनकरा से पूछलथीन, “हे परभु, का रउवा इहे घरी इस्राएल के पहिले जइसन राजपाट वापस दिलवा देबई ?” 7 “तखनी यीसु ओकिन से कहलथीन, ‘उ घरी चाहे काल के जानेला तोहिन के काम नखई, इ पिता परमेस्वर आपन अधिकार में रखले हथीन । 8 बाकि जखनी पबितर आत्मा तोहिन पर अतथीन तखनी तोहिन सक्ती पइबा; आऊ येरूसलेम सहर आऊ समुचे येहूदिया आऊ सामरिया इलाका में, आऊ धर्ती के छोर तक हमर गोवाह होतथीन ।” 9 इ कह के यीसु ओकिन के देखते-देखते ऊपरे उठा लेल गलई, आऊ बदरी उनकरा ओकिन के आंख से छिपा लेलई । 10 यीसु के जाय घरी जखनी खास चेलवन आसमान देन देखत हलथीन, त एकबइक दूगो चरक कपड़ा पहिन के डीड़ी होलथीन । 11 आऊ ओकिन से कहलथीन, “हे गलीली के आदमिनियन, तोहिन काहे डीड़ी होके आसमान देने देखत हही ? इहे यीसु जे तोहिन भीरा से सरग में उठा लेवल गइल हथीन, जवन तरी तोहिन उनकरा सरग जाते देखला उहे तरी उ फिर अतथीन ।”
यहूदा के जगह मत्तियाह चुनल जायला
12 तखनी खास चेलवन जइतून नाम के पहाड़ पर से उतर के यरूसलेम लउटलथीन, जे यरूसलेम से एक पबितर दिन के दूरीa पर हई । 13 ओकिन यरूसलेम सहर में पहूंचलथीन त उ ऊपुरेवोला कोठरी पर गलथीन, जहंई पतरस आऊ यूहन्ना आऊ याकूब आऊ अन्दरियास आऊ फिलिप्पूस आऊ थोमा आऊ बरतलोमई आऊ मत्ती आऊ हलफई के बेटा याकूब आऊ समोन जेलोतेस आऊ याकूब के बेटा यहूदा रहत हलथीन । 14 एकिन सब कइएक अउरतियन आऊ यीसु के माई मरियम आऊ उनकर भइवन के संगे एक मन होके पराथना में लगल रहलथीन ।
15 एक दिन पतसर लगभग एक-सौ बीस भइवन-बहिनियन के बीचे में डीड़ी होके कहे लगलई, 16 “हे भइवन-बहिनियन, ढेरे साल पहिले पबितर आत्मा के अगुवाई में दाऊद राजा यहूदा के बारे में जे कहले हलई उ पबितर किताब के लिखल बात पूरा होवेला जरुरी हलई । उहे यहूदा यीसु के पकड़ेवोलन के देखावेवोला हलई । 17 उ त हमिने में गिनल गलई आऊ इ सेवकाई में भगिदार होलई । 18 (तबो में उ बुरे काम के कमाई से एगो खेत दाम से लेलई, आऊ कपार के भरे गिरलई आऊ ओकर पेट फटलई आऊ सब अतड़िया निकल गलई । 19 इ बतया के यरूसलेम के सब रहेवोलन जान गलथीन, इहेसे उ खेत के नाम ओकिन के भाषा में ‘हकलदमा’ मतलब खून के खेत नाम पड़ गलई ।) 20 भजन के किताब में अइसन लिखल हई,
‘ओकर घर उजड़ जतई,
आऊ ओकर में कोनो नई रहतई’
आऊ ‘ओकर पद दूसर कोनो ले लेतई ।’ 21 इहेसे जेतना दिन तक परभु यीसु हमिन संगे आवत जात रहलथीन- मतलब यूहन्ना के बपतिस्मा से लेके उनकरा हमिन भीरा से सरग उठावत तक- जवन अदमिनियन हरदम हमिन संगे रहलथीन, 22 ओकिन में से एगो आदमीन हमिन संगे यीसु के जी उठला के गोवाह होवेला जरूरी हई । 23 तखनी ओकिन दूगो के डीड़ी करलथीन, एगो यूसुफ के जे बर-सबा कहावत हई, ओकर दुसर नाम यूसतुस हई आऊ दूसर मत्तियाह के, 24 आऊ अइसन पराथना करलथीन, “हे परभु, रउवा सब के मन के बात जाना हही, इ दूनो में से रउवा केकरा चुनले हही, उ हमिन के देखा देऊं, 25 ताकि उ इ सेवकाई आऊ खास चेला के पद लेवे, जेकरा छोड़ के यहूदा आपन जगह चल गलई ।” 26 तब ओकिन दूनो के नाम लिख के चिट्ठीया डालथीन, त चिट्ठीया में मत्तियाह के नाम निकललई । आऊ उ एगारहो खास चेलवन के संगे जिनल गलई ।