མད༌ཐཱའེ༌ བྲིའ༌ཛད༌ཁན༌ནི༌ གའ༌མོའེ༌ ནས༌ཚུལ༌།
མད༌ཐཱའེ༌ སྤེ༌ཆའེ༌ སྐོར༌།
གོ༌མའེ༌ ཆོས༌ཚོགས༌སི༌ འུ༌སྐྱོང༌གུན༌ནི༌,
འི༌ སྤེ༌ཆ༌བོ༌ གཙོ༌བོ༌ ཡེ༌ཤུའི༌ སྐུ༌ཚབས༌ ཅུག༌ཉིས༌སི༌ ནང༌ནེ༌ ཅིག༌,
མད༌ཐཱའེ༌ བྲིས༌ཏེ༌ ཨིན༌ཁན༌བོའེ༌ སྤང༌པོ༌ ཏང༌ང༌ནོག༌།
མད༌ཐཱ༌ ཁྲལ༌ནེན༌ཁན༌ཞིག༌ ཨིན༌པིན༌,
ཡེ༌ཤུའི༌ ཏུས༌ལ༌ ཁོ༌ ཨིས༌ར༌ཨེལ༌ལི༌ ནང༌ང༌ ཡོད༌པིན༌,
ཀ༌བོའ༌ ཡེ༌ཤུའི༌ ངའེ༌ གྱབ༌ནེ༌ བྲངས༌ཏེ༌ ངའེ༌ སྐུ༌ཚབས༌གུན༌ནི༌ ནང༌ནེ༌ ཅིག༌ གྱུར༌ མོལས༌།
འི༌ སྤེ༌ཆ༌ ཡེ༌ཤུ༌ གྲོངས༌ཏེ༌ སོན༌ཏེའ༌ ཞངས༌ཏེ༌ སྟིང༌ནེ༌ ལོ༌ 17 ནི༌ ཉེ༌ཁོར༌ལ༌ བྲིའ༌ ཛད༌ཏེ༌ ཨིན༌ནོག༌།
འི༌ སྤེ༌ཆ༌བོ༌ མད༌ཐཱའེ༌ ཁག༌ཅན༌ ཅོས༌ཏེ༌ མང༌ཆེའ༌ ཡ༌ཧུ༌དཱ༌པ༌,
ཏེ༌ནེ༌ ཡ༌ཧུ༌དཱ༌པའེ༌ ཆོས༌ ཤེས༌ཁན༌ནི༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཕིའ༌ བྲིའ༌ ཛད༌ཏེ༌ ཨིན༌ཁན༌བོ༌ སལ༌པོ༌ ཧ༌གོའ༌ནོག༌།
མད༌ཐཱའེ༌ དོད༌པ༌ ནི༌,
སུང༌རབས༌ སྙིང༌པའེ༌ ནང༌ང༌ དཀོན༌མཆོག༌གི༌ མ༌ཤི༌ཀ༌,
སྐྱབ༌གོན༌ དང༌ གྱལ༌པོ༌ སྐྱོད༌ཅེས༌སི༌ ལུང༌སྟན༌ ཛད༌ཁན༌བོ༌,
ཡེ༌ཤུ༌ ཁོང༌རང༌ ཨིན༌ཁན༌ སིལ༌ཁན༌གུན༌ལ༌ ཧ༌གོ༌ཅུག༌ཅེས༌ ཨིན༌ནོག༌།
མད༌ཐཱའེ༌,
ཡེ༌ཤུའི༌ ཤི༌ཁན༌གུན༌ སོན༌ཏེའ༌ ལང༌ཅུག༌ཅེས༌,
ནད༌པ༌གུན༌ ཕན༌ཅུག༌ཅེས༌,
རྡུད༌ ཞུགས༌ཁན༌གུན༌ ཕིང༌ཅེས༌ དང༌,
ལུང༌ཚུབ༌ ཆད༌ཅུག༌ཅེས༌སི༌ ཆག༌ལས༌གུན༌ ཛད༌ཏེ༌ དཀོན༌མཆོག༌ ཙོགས༌སི༌ ཝང༌ཆ༌ དང༌ ཤེད༌ ཡོད༌ཁན༌བོ༌ ང༌དང༌གུན༌ལ༌ སྟན༌ན༌ནོག༌།
ཨིན༌ནའང༌ ཁོང༌ངི༌ ཆག༌ལས༌ ཀྲག༌ཤོག༌པོ༌ མི༌གུན༌ སྡིག༌པའེ༌ ཀ༌ནེ༌ ཐར༌ཅུག༌ཏེ༌ གྱལ༌ཁམས༌ཞིག༌ ཅོའ༌ ཛད༌ཅེས༌པོ༌ ཨིན༌,
ཀ༌གུན༌ དཀོན༌མཆོག༌ ཉམ༌པོ༌ ནམ༌ཁའེ༌ ནང༌ང༌ ཏུས༌གྱུན༌ དུག༌ཨིན༌།
འི༌ སྤེ༌ཆའེ༌ སྟིང༌ཇུག༌པོའེ༌ཀ༌ ཡེ༌ཤུའི༌ ཁོང༌རང༌ངི༌ ལོབ༌ཕྲུགས༌གུན༌ལ༌ ཇིག༌རྟེན༌ནི༌ ཁག༌ ཚང༌མ༌ སོང༌ཏེ༌ མི༌གུན༌ལ༌ ཁོང༌ངི༌ཀ༌ ཏད༌པ༌ ཅོས༌ཏེ༌ ཁོང༌ང༌ བྲང༌ཤེས༌ལ༌ ཆོས༌ ཤོད༌ ཟེར༌ཏེ༌ སྟིང༌ཇུག༌གི༌ བཀའ༌བོ༌ སལས༌།།