ལུ༌ཀའེ༌ བྲིའ༌ཛད༌ཁན༌ནི༌ གའ༌མོའེ༌ ནས༌ཚུལ༌།
ལུ༌ཀའེ༌ སྤེ༌ཆའེ༌ སྐོར༌།
འི༌ སྤེ༌ཆ༌ བྲི༌ཁན༌ ལུ༌ཀའེ༌ "མ༌ཤི༌ཀའེ༌ སྐུ༌ཚབས༌གུན༌ནི༌ ཆག༌ལས༌སི༌" སྤེ༌ཆའང༌ བྲིའ༌ ཛད༌ཏེ༌ ཨིན༌ནོག༌།
ཁོང༌ གྱལ༌ལ༌ སིལ༌ཁན༌ ཨམ༌ཆི༌ ཡང༌ན༌ དྲོག༌ཏྲར༌,
ཡ༌ཧུ༌དཱ༌པ༌ མན༌ཁན༌ ཏད༌པ༌ཅན༌ དང༌ སྐུ༌ཚབས༌ པ༌འུ༌ལུའི༌ ཕྲོ༌པ༌ཞིག༌ ཨིན༌པིན༌།
འི༌ སྤེ༌ཆ༌བོ༌ ཡེ༌ཤུ༌ གྲོངས༌ཏེ༌ སོན༌ཏེའ༌ ཞངས༌ཏེ༌ སྟིང༌ནེ༌ ལོ༌ ཉི༌ཤུ༌ ཙབ༌རྒྱད༌དི༌ ཉེ༌ཁོར༌ལ༌ བྲིའ༌ ཛད༌ཏེ༌ ཨིན༌ནོག༌།
ཁོང༌ངི༌ འི༌ སྤེ༌ཆ༌བོ༌ ཐེའུ༌ཕེ༌ལུས༌ ཟེར༌ཁན༌བོའ༌ བྲིའ༌ ཛདས༌།
འི༌ ནང༌ང༌ ལུ༌ཀའེ༌ བྲི༌ཁན༌གུན༌ གྱུད༌ཏེ༌ ཁོ༌ མ༌ ཁག༌ཅན༌ སྤོན༌བོ༌ དང༌ ཡེ༌ཤུ༌ མ༌ཤི༌ཀའེ༌ཀ༌ ཏད༌པ༌ ཅོ༌ཁན༌ཞིག༌ ཨིན༌ཁན༌བོ༌ ང༌དང༌ང༌ ཧ༌གོའ༌ནོག༌།
ལུ༌ཀའེ༌ འི༌ སྤེ༌ཆ༌ བྲིའ༌ཛད༌ཅེས༌སི༌ གྱུན༌ཚན༌གུན༌།
དང༌པོ༌ ཇིག༌རྟེན༌པ༌གུན༌ནི༌ ཕིའ༌ ཡེ༌ཤུ༌ མ༌ཤི༌ཀ༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ སྐྱབ༌གོན༌ ཨིན༌ཁན༌བོ༌ སལ༌པོ༌ ཅོས༌ཏེ༌ སྟན༌ཅེས༌།
ཉིས༌པ༌ ཡེ༌ཤུའི༌ མི༌ཚེའེ༌,
ཁོང༌ ལྟམས༌པ༌ནེ༌ གྲོངས༌ཤེས༌ མ༌ཚད༌ སོན༌ཏེའ༌ ཞང༌ང༌ ཛད༌ཁན༌ ཚག༌པ༌,
ཏུས༌ མང༌པོའེ༌ སྔུན༌ལ༌ དཀོན༌མཆོག༌གི༌ ལུང༌སྟོན༌པ༌གུན༌ནི༌ ལུང༌སྟན༌ སལ༌ཁན༌ ཚང༌མ༌ གྲུབ༌ ཅུག༌ག༌ ཛད༌ཁན༌བོ༌ ཤད༌ཅེས༌།
སུམ༌པ༌ ཡེ༌ཤུའི༌ མི༌ཚེ༌བོ༌ ཅི༌ཚང༌མའེ༌ ནང༌ང༌ སོ༌སོ༌,
མིག༌སལ༌,
ཅིག༌ཅིག༌ མ༌ནེ༌ མེད༌ཁན༌བོ༌ སྟན༌ཅེས༌།
ཞི༌པ༌ ཡེ༌ཤུའ༌ རྡུག༌ངལ༌ ཐོངས༌ཏེ༌ རྐྱང༌ཤིང༌ངི༌ཀ༌ ཤི༌གོས༌ནའང༌ ཡེ༌རུ༌ཤ༌ལེམ༌མ༌ སྐྱོད༌ཅེས༌སི༌ ཐག༌ཅད༌ མ༌སྟན༌པོ༌ ཡོད༌པིན༌ ཅིའ༌ཟེར༌ན༌ ཏེ༌གུན༌ ཡང༌ ཁོང༌ སོན༌ཏེའ༌ ཞངས༌ཤེས༌ གྱུད༌ཏེ༌ ཇིག༌རྟེན༌པ༌གུན༌ནི༌ ཕིའ༌ ཁོང༌ སྐྱབ༌གོན༌ གྱུར༌ཅེས༌སི༌ དཀོན༌མཆོག༌གི༌ ཐབས༌ལྡིངས༌པོ༌ དྲན༌དྲའ༌ གྲུབ༌ཅེས༌ ཐུག༌གྱུས༌ ཡོད༌པིན༌།།