𖽃𖽦𖾐 𖼰𖽧 𖼊𖽚𖾐 𖼺𖽪𖾑
𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽻𖾐 𖼮𖽑𖽪𖾐 𖼮𖽑𖽻
1
1 𖼽𖽡 𖼺𖽴𖾑 𖼖𖽡𖽦𖾑 𖼞𖽳𖾐 𖼻𖽙 𖼞𖽑𖽶𖾑 𖼹𖽻𖾐,𖼽𖽻 𖼄𖽳𖾑 𖼈𖽴 𖼷𖽑𖽻𖾐 𖼊𖽑𖽺 𖼦𖽳 𖼺𖽺𖾑,𖼽𖽔 𖼠𖽴𖾑 𖼖𖽙𖾐 𖼮𖽑𖽻𖾐 𖼊𖽑𖽡 𖼊𖽑𖽜 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽡𖾐. 2 𖼽𖽻 𖼈𖽳𖾐 𖼞𖽑𖽶𖾑 𖼖𖽡𖽚 𖼂𖽡𖽦𖾑𖼳𖽡𖾐 𖼄𖽡𖽺𖼖𖽡𖾑 𖼈𖽪𖽺𖾑𖼽𖽚 𖼍𖽕𖾑 3 𖼽𖽡 𖼺𖽕𖾑 𖼰𖽡𖽔𖾐𖼳𖽡𖾐 𖼂𖽪𖾑 𖼖𖽪𖽦𖼂𖽡𖽦𖾑 𖼽𖽔 𖼄𖽡𖽺 4 𖼍𖽕𖾑𖼐𖽕 𖼇𖽮 𖼊𖽑𖽔𖾐 𖼖𖽡𖾑𖼰𖽡𖽔𖾐 𖼍𖽴 𖼐𖽺𖾐 𖼽𖽕𖾑 𖼳𖽴𖾑 𖼣𖽻𖾐. 5 𖼽𖽻 𖼈𖽳𖾐 𖼄𖽳𖾑 𖼄𖽳 𖼽𖽔 𖼠𖽴𖾑 𖼞𖽳𖾐 𖼻𖽙 𖼣𖽻𖾐. 𖼽𖽔 𖼠𖽴𖾑 𖼈𖽴 𖼷𖽑𖽻𖾐 𖼄𖽳𖾑 𖼄𖽳 𖼳𖽶 𖼷𖽑𖽡𖾐 𖼽𖽚𖾐 𖼮𖽻𖾐. 𖼞𖽑𖽶𖾑 𖼮𖽶𖾐 𖼽𖽱𖾐 𖼺𖽴𖾑 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽻𖾐 𖼍𖽳𖾐 𖼦𖽑𖽻𖾐.
6 𖼠𖽙𖾑 𖼍𖽻𖾐,𖼽𖽱𖾐 𖼺𖽴𖾑、 𖼽𖽻 𖼈𖽧 𖼄𖽻 𖼐𖽑𖽳𖾐 𖼄𖽻 𖼐𖽺𖾐 𖼞𖽑𖽶𖾑 𖼹𖽦𖾐 𖼞𖽳𖾐 𖼷𖽑𖽻𖾐 𖼄𖽳𖾑 𖼄𖽳 𖼳𖽶𖾐 𖼦𖽑𖽙𖾐 𖼦𖽑𖽻𖾐. 7 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼻𖽙 𖼦𖽑𖽨𖾐 𖼐𖽜𖾐 𖼖𖽡𖾑 𖼀𖽑𖽙 𖼄𖽨 𖼍𖽪𖾐 𖼖𖽻𖾐,𖼷𖽑𖽻𖾐 𖽂𖽙𖾐 𖼮𖽻𖾐 𖽂𖽙𖾐 𖼄𖽨,𖼦𖽑𖽔𖾐 𖼮𖽶𖾐 𖽂𖽙 𖼊𖽙𖾐,𖼞𖽑𖽶𖾑 𖼄𖽡𖾐 𖼊𖽺𖾐 𖼮𖽻𖾐 𖼀𖽡𖾐 𖼦𖽑𖽻𖾐.
𖽃𖽦𖾐 𖼰𖽧 𖼠𖽚 𖼇𖽕 𖼖𖽻 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼮𖽑𖽡𖾐 𖼻𖽸
8 𖼞𖽑𖽶𖾑 𖼮𖽶𖾐,𖼽𖽱𖾐 𖼺𖽴𖾑 𖼊𖽑𖽺 𖼄𖽔 𖼺𖽝𖾑 𖼺𖽪𖾐 𖼈𖽪𖾐 𖼍𖽦 𖼳𖽸 𖼊𖽑𖽡 𖼽𖽚𖾐 𖼍𖽪𖾐 𖼖𖽻𖾐 𖽃𖽦𖾐 𖼰𖽧 𖼠𖽚 𖼊𖽑𖽺 𖼠𖽕, 9 𖼽𖽻 𖼷𖽑𖽻𖾐 𖼀𖽺 𖼖𖽙𖾐 𖼀𖽦𖾐:“𖼐𖽦𖾐 𖼄𖽺! 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖽃𖽔 𖼐𖽺𖾑 𖼦𖽶𖾑 𖼄𖽔 𖼷𖽑𖽶𖾐 𖽂𖽙 𖼊𖽙𖾐 𖼮𖽑𖽪𖾐 𖼮𖽑𖽻. 10 𖼖𖽻𖾐 ! 𖽃𖽔 𖼐𖽺𖾑 𖼄𖽪𖾐 𖼊𖽪𖾐 𖼻𖽜 𖼽𖽻 𖼈𖽳𖾐 𖼊𖽑𖽺 𖼀𖽨 𖼮𖽳 𖼺𖽺𖾑,𖼽𖽻 𖼈𖽳𖾐 𖼞𖽜 𖼮𖽑𖽪𖾐 𖼮𖽑𖽻 𖼄𖽔 𖼠𖽸𖾑 𖼖𖽡𖾐. 𖼄𖽻 𖼣𖽻𖾐 𖼊𖽑𖽡𖾑 𖼣𖽻𖾐,𖼰𖽕𖾑 𖼊𖽝 𖼞𖽑𖽶𖾑 𖼮𖽶𖾐,𖼽𖽻 𖼈𖽳𖾐 𖽃𖽔 𖼐𖽺𖾑 𖼮𖽡𖾐 𖼂𖽦𖾐 𖼖𖽙𖾐 𖼮𖽑𖽻𖾐 𖼺𖽺𖾑,𖽃𖽔 𖼐𖽺𖾑 𖼊𖽑𖽺 𖼊𖽝 𖼊𖽦,𖼦𖽑𖽺𖾑 𖼄𖽡𖾐 𖼊𖽺𖾐 𖼮𖽑𖽻𖾐 𖼮𖽡𖽪 𖼀𖽑𖽻𖾐 𖼊𖽚𖾐 𖼽𖽡𖾐 𖼊𖽻𖾐.”
11 𖽃𖽔𖾐 𖼺𖽺𖾑,𖼽𖽻 𖼈𖽳𖾐 𖽂𖽙 𖼠𖽕 𖼺𖽪𖾐 𖼊𖽑𖽺 𖼹𖽡𖾐 𖼂𖽻𖾐 𖼖𖽻𖾐,𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼠𖽕,𖼽𖽻 𖼈𖽳𖾐 𖼞𖽜 𖼳𖽚𖾑 𖼞𖽑𖽪 𖼄𖽡𖽻 𖼖𖽡 𖼄𖽪𖾐,𖼽𖽻 𖼈𖽳𖾐 𖼊𖽑𖽺 𖼦𖽹𖾑 𖼀𖽑𖽧𖾐. 𖼽𖽻 𖼈𖽳𖾐 𖼇𖽕 𖼖𖽻 𖼖𖽙𖾐 𖼀𖽙𖾐 𖼄𖽡𖽻 𖼐𖽑𖽡 𖼍𖽙𖾑 𖼞𖽳𖾐 𖼖𖽪𖾐 𖼐𖽑𖽡 𖼊𖽝𖾐 𖼊𖽴𖾐,𖼞𖽑𖽶𖾑 𖼂𖽡 𖼍𖽙𖾐 𖼖𖽪𖾐 𖼐𖽺𖾐 𖼖𖽕 𖼺𖽦𖾐 𖼖𖽪𖾐 𖼣𖽻𖾐. 12 𖼦𖽑𖽻𖾐 𖼊𖽑𖽻𖾐,𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖽂𖽙𖾐 𖼽𖽻 𖼈𖽳𖾐 𖼊𖽑𖽺 𖼦𖽹𖾑 𖼀𖽑𖽧𖾐,𖼽𖽻 𖼈𖽳𖾐 𖽂𖽙𖾐 𖼠𖽳𖾐 𖼠𖽳𖾐 𖼀𖽑𖽙 𖼄𖽨,𖼀𖽜𖾐 𖼀𖽺 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽑𖽙𖾐 𖼮𖽑𖽡𖾐 𖼊𖽪 𖼮𖽻𖾐 𖼽𖽡𖾐 𖼺𖽺𖾑,𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼽𖽻 𖼈𖽳𖾐 𖼊𖽑𖽺 𖼮𖽡𖽮𖾐. 13 𖼦𖽑𖽺𖾑 𖼻𖽻𖾐 𖼣𖽻𖾐 𖼺𖽺𖾑,𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼠𖽳𖾐 𖼠𖽳𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖼮𖽑𖽡𖾐 𖼻𖽸,𖼽𖽻 𖼈𖽳𖾐 𖼞𖽜 𖼳𖽚𖾑 𖼞𖽑𖽪 𖼄𖽡𖽻 𖼖𖽡 𖼄𖽪𖾐. 14 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼽𖽻 𖼈𖽳𖾐 𖼞𖽜 𖼳𖽚𖾑 𖼞𖽑𖽪 𖼄𖽡𖽻 𖼖𖽡 𖼄𖽪𖾐 𖼺𖽺𖾑 ,𖼽𖽻 𖼈𖽳𖾐 𖼐𖽑𖽡𖾐 𖼦𖽑𖽦 𖼦𖽑𖽔𖾐 𖼮𖽶𖾐 𖼠𖽚 𖼳𖽚𖾑. 𖼽𖽻 𖼈𖽳𖾐 𖼐𖽑𖽡𖾑 𖼐𖽝𖾐 𖼂𖽺𖾐,𖼐𖽑𖽡𖾑 𖼰𖽡𖽺𖾐 𖼦𖽜𖾐,𖼦𖽑𖽔𖾐 𖼖𖽺𖾑 𖼄𖽡𖾐 𖼠𖽻𖾐 𖼞𖽑𖽙𖾐 𖼣𖽻𖾐 𖼳𖽶 𖼄𖽡𖽻 𖼄𖽪𖾐,𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼽𖽻 𖼈𖽳𖾐 𖼞𖽜 𖼞𖽑𖽙𖾐 𖼣𖽻𖾐 𖼳𖽶 𖼳𖽚𖾑 𖼞𖽑𖽪 𖼄𖽡𖽻 𖼄𖽪𖾐.
𖼇𖽕 𖼖𖽻 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽃𖽔𖾐 𖼞𖽶𖾑 𖼊𖽑𖽺 𖼺𖽦 𖼦𖽑𖽙𖾐
15 𖼳𖽡𖾐 𖼂𖽚 𖼖𖽦 𖼺𖽪𖾐 𖼷𖽑𖽻𖾐 𖼖𖽙𖾐 𖼀𖽙𖾐 𖽃𖽔𖾐 𖼞𖽶𖾑 𖼠𖽺𖾑 𖼺𖽪𖾐 𖼻𖽙 𖼄𖽳 𖼄𖽡𖾐 𖼐𖽜𖾐 𖼐𖽑𖽡 𖼽𖽚𖾐 𖼮𖽻𖾐,𖼊𖽑𖽡 𖼽𖽚𖾐 𖼳𖽶𖾐 𖼇𖽮 𖼖𖽔𖾐 𖼄𖽡𖾐,𖼊𖽑𖽡 𖼽𖽚𖾐 𖼀𖽑𖽪 𖽃𖽔𖾐 𖼄𖽡𖾐,𖽃𖽦𖾐 𖼰𖽧 𖼠𖽚 𖼈𖽪𖾐 𖼍𖽦 𖼽𖽻 𖼈𖽳𖾐 𖼊𖽑𖽺 𖼄𖽪𖾑 𖼍𖽴𖾑, 16 𖼀𖽦𖾐:“𖼐𖽑𖽡𖾐 𖼈𖽳𖾐 𖼳𖽡𖾐 𖼂𖽚 𖼖𖽦 𖼺𖽪𖾐 𖼻𖽙 𖼄𖽳 𖼖𖽙𖾐 𖼀𖽙𖾐 𖽃𖽔𖾐 𖼞𖽶𖾑 𖼠𖽺𖾑 𖼞𖽑𖽶𖾑 𖼮𖽶𖾐 𖼐𖽦𖾐 𖼍𖽳𖾐 ,𖼽𖽚𖾐 𖼹𖽺𖾐 𖼖𖽻𖾐 𖼺𖽪𖾐 𖼻𖽙 𖼐𖽜𖾐 𖼣𖽻𖾐 𖼊𖽑𖽡𖾑 𖼣𖽻𖾐,𖼐𖽑𖽡𖾐 𖼈𖽳𖾐 𖼽𖽻 𖼊𖽑𖽺 𖼺𖽦 𖼦𖽑𖽙𖾐 𖼖𖽡𖾐,𖼻𖽙 𖼄𖽳 𖼣𖽻𖾐 𖼊𖽑𖽡𖾑 𖼣𖽻𖾐,𖼽𖽻 𖼞𖽜 𖽂𖽙𖾐 𖼠𖽙𖾑 𖼊𖽙𖾐. 17 𖼦𖽑𖽻𖾐 𖼊𖽑𖽻𖾐,𖽃𖽔𖾐 𖼞𖽶𖾑 𖼠𖽺𖾑 𖼺𖽪𖾐 𖼻𖽙 𖼄𖽳 𖼄𖽡𖾐 𖼐𖽜𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼮𖽡𖽮𖾐 𖼺𖽺𖾑,𖽃𖽦𖾐 𖼰𖽧 𖼠𖽚 𖼞𖽳𖾐 𖼈𖽪𖾐 𖼍𖽦 𖼀𖽦𖾐 𖼄𖽪𖾑 𖼖𖽙𖾐 𖼄𖽔 𖼮𖽑𖽻𖾐,𖼽𖽚𖾐 𖼹𖽺𖾐 𖼖𖽻𖾐 𖼺𖽪𖾐 𖼻𖽙 𖼞𖽜 𖼖𖽺𖾑 𖽂𖽙𖾐 𖼠𖽙𖾑.
18 𖽃𖽔𖾐 𖼺𖽺𖾑,𖽃𖽦𖾐 𖼰𖽧 𖼠𖽚 𖼞𖽳𖾐 𖼈𖽪𖾐 𖼍𖽦 𖽃𖽔𖾐 𖼞𖽶𖾑 𖼠𖽺𖾑 𖼺𖽪𖾐 𖼻𖽙 𖼄𖽳 𖼄𖽡𖾐 𖼐𖽜𖾐 𖼊𖽑𖽺 𖽃𖽶𖾐 𖼂𖽻𖾐 𖼖𖽻𖾐,𖼽𖽻 𖼈𖽳𖾐 𖼖𖽙𖾐 𖼀𖽦𖾐:“𖼐𖽑𖽡𖾐 𖼈𖽳𖾐 𖽃𖽔𖾐 𖼹𖽻𖾐 𖼦𖽑𖽺𖾑 𖼳𖽶 𖼄𖽡𖽻 𖼂𖽺𖾐? 𖼻𖽙 𖼊𖽑𖽺 𖼈𖽪𖾑 𖼠𖽻𖾐 𖼹𖽺𖾐 𖼍𖽙𖾑 𖼐𖽺𖾑? ”
19 𖽃𖽔𖾐 𖼞𖽶𖾑 𖼠𖽺𖾑 𖼺𖽪𖾐 𖼻𖽙 𖼄𖽳 𖼄𖽡𖾐 𖼐𖽜𖾐 𖼇𖽕 𖼖𖽻 𖼊𖽑𖽺 𖼊𖽻 𖼞𖽑𖽚:“𖼳𖽡𖾐 𖼂𖽚 𖼖𖽦 𖼻𖽙 𖼄𖽳 𖽃𖽦𖾐 𖼰𖽧 𖼻𖽙 𖼄𖽳 𖼖𖽙𖾐 𖼄𖽔 𖼺𖽶𖾑,𖼽𖽻 𖼈𖽳𖾐 𖼞𖽶𖾐 𖼮𖽑𖽶 𖼦𖽑𖽔𖾐 𖼮𖽶𖾐 𖼹𖽳𖾐,𖼣𖽙𖾐 𖼈𖽳𖾐 𖼞𖽑𖽻𖾑 𖼄𖽔 𖼮𖽑𖽡𖾐 𖼺𖽺 𖼹𖽦𖾐 𖼽𖽻 𖼈𖽳𖾐 𖽃𖽔𖾐 𖼞𖽶𖾑 𖼽𖽚𖾐 𖼦𖽑𖽙𖾐. 20 𖽂𖽙 𖼺𖽙𖾐 𖼂𖽙𖾐 𖼮𖽡 𖼽𖽡𖾑 𖼖𖽪 𖽃𖽔𖾐 𖼞𖽶𖾑 𖼠𖽺𖾑 𖼺𖽪𖾐 𖼻𖽙 𖼄𖽳 𖼄𖽡𖾐 𖼐𖽜𖾐 𖼦𖽑𖽺𖾑 𖼐𖽑𖽡 𖼽𖽚𖾐 𖼊𖽑𖽺 𖼞𖽜. 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼀𖽑𖽙 𖼄𖽨 𖼍𖽪𖾐 𖼖𖽻𖾐,𖼦𖽑𖽔𖾐 𖼮𖽶𖾐 𖽂𖽙 𖼊𖽙𖾐. 21 𖽃𖽔𖾐 𖼞𖽶𖾑 𖼠𖽺𖾑 𖼺𖽪𖾐 𖼻𖽙 𖼄𖽳 𖼄𖽡𖾐 𖼐𖽜𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼮𖽡𖽮𖾐 𖼮𖽻𖾑 𖼊𖽴 𖼺𖽺𖾑,𖽂𖽙 𖼺𖽙𖾐 𖼂𖽙𖾐 𖼽𖽻 𖼈𖽳𖾐 𖼞𖽜 𖼈𖽴 𖼊𖽴𖾐.
22 𖼇𖽕 𖼖𖽻 𖼽𖽻 𖼞𖽳𖾐 𖼷𖽑𖽻𖾐 𖼀𖽺 𖼊𖽑𖽺 𖼀𖽦𖾐 𖼄𖽪𖾑: 𖼳𖽡𖾐 𖼂𖽚 𖼖𖽦 𖼺𖽪𖾐 𖼷𖽑𖽻𖾐 𖼞𖽑𖽙𖾐 𖼽𖽚𖾐 𖼺𖽪𖾐 𖼻𖽙,𖼐𖽑𖽡𖾐 𖼈𖽳𖾐 𖼄𖽳𖾑 𖼄𖽳 𖼷𖽴𖾐 𖼖𖽻 𖼮𖽻 𖼞𖽑𖽶𖾐 𖼹𖽺𖾐 𖼖𖽡𖾐,𖼞𖽑𖽙𖾐 𖼽𖽚𖾐 𖼺𖽪𖾐 𖽃𖽔𖾐 𖼞𖽶𖾑 𖼞𖽑𖽶𖾑 𖼻𖽙 𖼄𖽳 𖼣𖽻𖾐 𖼺𖽺𖾑,𖼽𖽻 𖼞𖽜 𖽂𖽙𖾐 𖼠𖽙𖾑 𖼊𖽙𖾐.