4 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼺𖽜 𖼐𖽳 𖼖𖽻𖾐 𖼞𖽳𖾐 𖼐𖽦𖾐 𖼄𖽡𖽻𖾐，𖽃𖽔𖾐 𖼺𖽺𖾑 𖽃𖽔𖾑 𖼮𖽑𖽪 𖼷𖽑𖽪𖾐 𖼞𖽑𖽶𖾐 𖼮𖽑𖽻𖾐 𖼽𖽻 𖼊𖽑𖽺 𖽃𖽶𖾐，𖼀𖽦𖾐：“𖼄𖽚 𖼳𖽡𖾐 ，𖼄𖽚 𖼳𖽡𖾐．”

𖼽𖽻 𖼊𖽻 𖼞𖽑𖽚：“𖼣𖽙𖾐 𖼦𖽑𖽺𖾑 𖼠𖽻𖾐 𖼮𖽻𖾐 𖼍𖽳𖾐．”

5 𖼽𖽺𖾐 𖼦𖽴 𖼦𖽫 𖼀𖽦𖾐：“𖼦𖽑𖽺𖾑 𖼠𖽻𖾐 𖽂𖽙𖾐 𖼠𖽚 𖼖𖽻𖾐 𖼄𖽔 𖼊𖽙𖾐! 𖼐𖽑𖽡𖾐 𖼮𖽑𖽡𖾑 𖼀𖽑𖽦𖾐 𖼊𖽑𖽺 𖼮𖽑𖽡𖾑 𖼐𖽴𖾐 𖼖𖽧 𖼦𖽑𖽙𖾐 𖼖𖽡𖾐． 𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼞𖽑𖽙𖾐 𖼦𖽑𖽡𖽚 𖼞𖽳𖾐 𖼦𖽑𖽺𖾑 𖼺𖽡 𖼮𖽡𖾐 𖼄𖽡𖾑 𖼐𖽦𖾐 𖼣𖽻𖾐． ” 6 𖼽𖽺𖾐 𖼦𖽴 𖼦𖽫 𖼦𖽑𖽔𖾐 𖼖𖽺𖾑 𖼀𖽦𖾐：“𖼣𖽙𖾐 𖼐𖽑𖽡𖽻𖾐 𖼀𖽙 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐，𖼽𖽕𖾑 𖼂𖽚 𖼖𖽔𖾐 𖼦𖽔 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐，𖼽𖽡 𖼺𖽔 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐，𖼽𖽔 𖼠𖽴𖾑 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐． 𖼄𖽚 𖼳𖽡𖾐 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖼄𖽡𖽻𖾐 𖼠𖽸𖾑 𖼮𖽡𖽮𖾐 𖼺𖽺𖾑，𖼽𖽻 𖼄𖽳𖾑 𖼮𖽑𖽻 𖼄𖽦𖾐 𖼊𖽑𖽺 𖼀𖽜𖾐 𖼍𖽡．

7 𖼽𖽺𖾐 𖼦𖽴 𖼦𖽫 𖼀𖽦𖾐：“𖼣𖽙𖾐 𖼞𖽳𖾐 𖼷𖽑𖽻𖾐 𖼀𖽺 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽻𖾐 𖼞𖽑𖽙𖾐 𖼷𖽶𖾐 𖼄𖽳𖾐 𖼺𖽪𖾐 𖼠𖽻𖾐 𖼰𖽡𖽳𖾐，𖼣𖽙𖾐 𖼠𖽕𖾐 𖼰𖽶𖾐 𖼐𖽦𖾐 𖼄𖽡𖽻𖾐 𖼦𖽑𖽻𖾐． 𖼽𖽻 𖼈𖽳𖾐 𖽂𖽙 𖼠𖽕 𖼺𖽪𖾐 𖼖𖽦 𖽂𖽚 𖼞𖽑𖽶𖾐 𖼠𖽻𖾐 𖼰𖽡𖽳𖾐 𖼞𖽳𖾐 𖼷𖽳𖾑 𖼮𖽑𖽨，𖼣𖽙𖾐 𖼖𖽺𖾑 𖼊𖽻 𖼮𖽨 𖼦𖽑𖽻𖾐；𖼽𖽻 𖼈𖽳𖾐 𖼞𖽳𖾐 𖼳𖽚𖾑 𖼞𖽑𖽪 𖼊𖽑𖽺 𖼖𖽺𖾑 𖼣𖽙𖾐 𖼺𖽝𖾑 𖼍𖽳𖾐． 8 𖽃𖽔𖾐 𖼺𖽺𖾑，𖼣𖽙𖾐 𖼹𖽺𖾐 𖼖𖽻𖾐，𖼽𖽻 𖼈𖽳𖾐 𖼊𖽑𖽺 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼖𖽦 𖼀𖽑𖽦𖾐 𖼞𖽑𖽶𖾐 𖼮𖽑𖽻𖾐 𖼰𖽨𖾑 𖼊𖽑𖽧 𖼖𖽻𖾐 𖼊𖽻𖾐，𖼽𖽻 𖼈𖽳𖾐 𖼊𖽑𖽺 𖼦𖽳 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼰𖽡𖾑 𖼦𖽑𖽙𖾐 𖼺𖽺𖾑，𖼊𖽺𖾐 𖼞𖽑𖽫𖾐 𖼹𖽳𖾐 𖼷𖽑𖽚，𖼀𖽕𖾑 𖼮𖽸 𖼈𖽡𖾐 𖼊𖽚𖾐、 𖼀𖽨 𖼈𖽡𖾐 𖼮𖽻𖾐 𖼄𖽡𖾐 𖼊𖽺𖾐 𖼽𖽡𖾐 𖼊𖽻𖾐，𖼞𖽑𖽶𖾑 𖼰𖽡𖽔𖾐 𖼐𖽕 𖼮𖽑𖽪𖾐 𖼳𖽶 𖼷𖽑𖽻𖾐，𖼦𖽴𖾑 𖼮𖽑𖽪𖾐 𖼳𖽶 𖼷𖽑𖽻𖾐，𖼽𖽕𖾑 𖼄𖽚 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐，𖼂𖽡 𖼖𖽡𖾑 𖼳𖽡 𖼮𖽑𖽪𖾐 𖼳𖽶 𖼷𖽑𖽻𖾐，𖼳𖽡𖾐 𖼈 𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼐𖽺𖾐 𖼽𖽺𖾐 𖼂𖽪𖾑 𖼺𖽶𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼣𖽻𖾐． 9 𖽃𖽔𖾑 𖼄𖽳𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼷𖽳𖾑 𖼮𖽑𖽡𖽪 𖼣𖽙𖾐 𖼊𖽻 𖼮𖽨 𖼦𖽑𖽻𖾐，𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼽𖽻 𖼈𖽳𖾐 𖼊𖽑𖽺 𖽃𖽔 𖼊𖽺𖾐 𖼮𖽑𖽡𖾐 𖼻𖽸 𖼖𖽺𖾑 𖼣𖽙𖾐 𖼐𖽦𖾐 𖼄𖽡𖽻𖾐 𖼦𖽑𖽻𖾐． 10 𖽃𖽔𖾐 𖼺𖽺𖾑 𖽃𖽔𖾑 𖼄𖽳𖾐 𖼐𖽑𖽡𖾐 𖼽𖽡𖾐 𖼖𖽡𖾐，𖼣𖽙𖾐 𖼐𖽑𖽡𖾐 𖼊𖽑𖽺 𖼹𖽡𖾐 𖼺𖽺𖾑 𖼇𖽕 𖼖𖽻 𖼞𖽳𖾐 𖼞𖽑𖽶𖾑 𖼠𖽻𖾐 𖼽𖽡𖾐 𖼊𖽻𖾐，𖼐𖽑𖽡𖾐 𖼣𖽙𖾐 𖼞𖽳𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼀𖽺 𖼊𖽑𖽺 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼦𖽡𖽳 𖼊𖽚𖾐 𖼖𖽻𖾐 𖼊𖽙𖾐．

11 𖼄𖽚 𖼳𖽡𖾐 𖽂𖽙 𖼺𖽙𖾐 𖼂𖽙𖾐 𖼖𖽙𖾐 𖼊𖽻 𖼞𖽑𖽚，𖼀𖽦𖾐：“𖼣𖽙𖾐 𖽃𖽔 𖼊𖽡𖾑 𖼳𖽶 𖼷𖽑𖽻𖾐 𖼣𖽻𖾐 𖼺𖽺𖾑，𖼇𖽕 𖼖𖽻 𖼞𖽳𖾐 𖼞𖽑𖽻𖾑 𖼽𖽡𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼊𖽑𖽺 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼦𖽡𖽳 𖼊𖽚𖾐 𖼖𖽻𖾐 𖼊𖽙𖾐 𖼐𖽺𖾑？”

12 𖽂𖽙 𖼺𖽙𖾐 𖼂𖽙𖾐 𖼊𖽻 𖼞𖽑𖽚：“𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼮𖽻𖾐 𖼊𖽻𖾐；𖼐𖽑𖽡𖾐 𖼷𖽑𖽻𖾐 𖼀𖽺 𖼊𖽑𖽺 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼦𖽳 𖼊𖽚𖾐 𖼖𖽻𖾐 𖼠𖽙𖾑 𖼍𖽻𖾐，𖼐𖽑𖽡𖾐 𖼈𖽳𖾐 𖽂𖽙 𖼰𖽡𖽺𖾐 𖼦𖽑𖽺𖾑 𖼠𖽻𖾐 𖼣𖽙𖾐 𖼊𖽑𖽺 𖼠𖽙𖾐 𖼳𖽙𖾐 𖼊𖽻𖾐． 𖼦𖽑𖽺𖾑 𖼣𖽙𖾐 𖼐𖽑𖽡𖾐 𖼊𖽑𖽺 𖼹𖽡𖾐 𖼂𖽡𖾐 𖼽𖽡𖾐 𖼞𖽳𖾐 𖼮𖽨 𖼄𖽡𖽻𖾐 𖼣𖽻𖾐．

13 𖼄𖽚 𖼳𖽡𖾐 𖽂𖽙 𖼺𖽙𖾐 𖼂𖽙𖾐 𖼖𖽙𖾐 𖼀𖽦𖾐：“𖼣𖽙𖾐 𖼽𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼮𖽑𖽡𖾐，𖼽𖽻 𖼈𖽳𖾐 𖼖𖽙𖾐 𖼀𖽦𖾐：‘ 𖼐𖽑𖽡𖾐 𖼈𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼞𖽳𖾐 𖽂𖽙 𖼺𖽙𖾐 𖼂𖽙𖾐，𖼣𖽙𖾐 𖼊𖽑𖽺 𖼹𖽡𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐．’ 𖼞𖽑𖽶𖾑 𖼮𖽶𖾐，𖼽𖽻 𖼈𖽳𖾐 𖼷𖽑𖽜𖾑 𖼷𖽑𖽜𖾐 𖼣𖽙𖾐 𖼊𖽑𖽺 𖼊𖽻 𖼐𖽙𖾐 𖼊𖽻𖾐：‘ 𖽂𖽙 𖼺𖽙𖾐 𖼂𖽙𖾐 𖼊𖽑𖽺 𖽃𖽔 𖼊𖽺𖾐 𖼄𖽡𖾐？’ 𖼣𖽙𖾐 𖼽𖽻 𖼈𖽳𖾐 𖼊𖽑𖽺 𖽃𖽔 𖼊𖽺𖾐 𖼊𖽻𖾐 𖼞𖽑𖽚 𖼐𖽺𖾑？”

14 𖽂𖽙 𖼺𖽙𖾐 𖼂𖽙𖾐 𖼄𖽚 𖼳𖽡𖾐 𖼖𖽙𖾐 𖼊𖽻 𖼞𖽑𖽚 𖼀𖽦𖾐：“𖼣𖽙𖾐 𖼽𖽻 𖼄𖽳𖾑 𖼷𖽺𖾐 𖼮𖽻𖾐，𖼻𖽳𖾐 𖼹𖽦𖾐 𖼮𖽻𖾐 𖼺𖽪𖾐 𖼣𖽻𖾐． ” 𖼦𖽑𖽔𖾐 𖼖𖽺𖾑 𖼀𖽦𖾐：“𖼐𖽑𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼮𖽑𖽻𖾐 𖼦𖽑𖽺𖾑 𖼻𖽻𖾐 𖼀𖽦𖾐 𖼖𖽡𖾐 ：‘ 𖼞𖽑𖽻𖾑 𖼽𖽻 𖼄𖽳𖾑 𖼷𖽺𖾐 𖼮𖽻𖾐，𖼻𖽳𖾐 𖼹𖽦𖾐 𖼮𖽻𖾐 𖼺𖽪𖾐 𖼞𖽑𖽶𖾑 𖼽𖽚𖾐 𖼣𖽙𖾐 𖼊𖽑𖽺 𖼹𖽡𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐．’” 15 𖽂𖽙 𖼺𖽙𖾐 𖼂𖽙𖾐 𖼹𖽦𖾑 𖼄𖽚 𖼳𖽡𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼖𖽙𖾐 𖼦𖽺𖾑 𖼻𖽻𖾐 𖼀𖽦𖾐 𖼖𖽡𖾐 ：‘ 𖼐𖽑𖽡𖾐 𖼈𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫，𖼣𖽙𖾐 𖼊𖽑𖽺 𖼹𖽡𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖼦𖽑𖽺𖾑 𖼠𖽻𖾐 𖼖𖽻𖾐． 𖼽𖽻 𖼞𖽑𖽶𖾑 𖼽𖽕𖾑 𖼂𖽚 𖼖𖽔𖾐 𖼦𖽕 𖼞𖽳𖾐 𖽂𖽙 𖼺𖽙𖾐 𖼂𖽙𖾐，𖼽𖽡 𖼺𖽔 𖼞𖽳𖾐 𖽂𖽙 𖼺𖽙𖾐 𖼂𖽙𖾐，𖼽𖽕 𖼠𖽴𖾑 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐，

16 𖼐𖽑𖽡𖾐 𖼽𖽡𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼮𖽳 𖼄𖽻 𖼊𖽑𖽺 𖽃𖽶𖾐 𖼻𖽶𖾑 𖼖𖽻𖾐，𖼽𖽻 𖼈𖽳𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖽃𖽔𖾐 𖼂𖽸𖾑 𖽃𖽔𖾑 𖼄𖽻 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫，𖼞𖽑𖽶𖾑 𖼽𖽕𖾑 𖼂𖽚 𖼖𖽔𖾐 𖼦𖽕 𖼞𖽳𖾐 𖽂𖽙 𖼺𖽙𖾐 𖼂𖽙𖾐，𖼽𖽡 𖼺𖽔 𖼞𖽳𖾐 𖽂𖽙 𖼺𖽙𖾐 𖼂𖽙𖾐，𖼽𖽕 𖼠𖽴𖾑 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼣𖽻𖾐，𖼽𖽻 𖼊𖽚𖾐 𖼊𖽑𖽧 𖼖𖽻𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐，𖼀𖽦𖾐：‘ 𖼣𖽙𖾐 𖼠𖽕𖾐 𖼰𖽶𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼐𖽦𖾐 𖼳𖽪𖾐，𖼐𖽑𖽡𖾐 𖼈𖽳𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽻𖾐 𖼞𖽑𖽙𖾐 𖼷𖽶𖾐 𖼄𖽳𖾐 𖼺𖽪𖾐 𖼄𖽡𖽻 𖼣𖽙𖾐 𖼺𖽝𖾑 𖼦𖽑𖽻𖾐．’ 17 𖼣𖽙𖾐 𖼀𖽦𖾐 𖼠𖽚，𖼣𖽙𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼞𖽳𖾐 𖼠𖽻𖾐 𖼰𖽡𖽳𖾐 𖼞𖽑𖽶𖾐 𖼮𖽑𖽻𖾐 𖼦𖽳 𖼊𖽑𖽧 𖼖𖽻𖾐 𖼺𖽺𖾑，𖼽𖽡𖾐 𖼰𖽡𖽔𖾐 𖼐𖽕 𖼮𖽑𖽪𖾐 𖼳𖽶 𖼷𖽑𖽻𖾐，𖼦𖽴𖾑 𖼮𖽑𖽪𖾐 𖼳𖽶 𖼷𖽑𖽻𖾐，𖼽𖽕𖾑 𖼄𖽚 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐，𖼂𖽡 𖼖𖽡𖾑 𖼳𖽡 𖼳𖽶 𖼮𖽑𖽪𖾐 𖼷𖽑𖽻𖾐，𖼳𖽡𖾐 𖼈𖽪𖽺𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼐𖽺𖾐 𖼽𖽺𖾐 𖼂𖽪𖾑 𖼺𖽶𖾐 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼄𖽡𖾐 𖼊𖽺𖾐 𖼮𖽻𖾐 𖼽𖽡𖾐，𖼞𖽑𖽶𖾑 𖼀𖽕𖾑 𖼮𖽸 𖼈𖽡𖾐 𖼊𖽚𖾐、 𖼀𖽨 𖼈𖽡𖾐 𖼮𖽻𖾐 \fr 3．17 \ft “𖼀𖽕𖾑 𖼮𖽸 𖼈𖽡𖾐 𖼊𖽚𖾐、𖼀𖽨 𖼈𖽡𖾐 𖼮𖽻𖾐” 𖼦𖽑𖽺𖾑 𖼄𖽡𖾐 𖼷𖽑𖽪𖾐 𖼄𖽡𖾐 𖼹𖽳𖾐 𖼖𖽙𖾐 𖼀𖽦𖾐 𖼺𖽪𖾐 𖼣𖽻𖾐 𖼄𖽡𖾐 𖼊𖽺𖾐 𖼣𖽻𖾐．

18 𖼽𖽻 𖼈𖽳𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼊𖽻 𖼂𖽪𖾑 𖼊𖽑𖽺 𖼊𖽻 𖼐𖽙𖾐 𖼊𖽻𖾐：“𖼐𖽑𖽡𖾐 𖼐𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖼮𖽳 𖼄𖽻 𖼽𖽡𖾐 𖼺𖽺𖾑 𖽃𖽦𖾐 𖼰𖽧 𖼠𖽚 𖼇𖽕 𖼖𖽻 𖼞𖽳𖾐 𖼽𖽡𖾐，𖼽𖽻 𖼖𖽙𖾐 𖼮𖽑𖽻𖾐 𖼀𖽦𖾐： 𖼳𖽡𖾐 𖼂𖽚 𖼖𖽦 𖼺𖽪𖾐 𖼷𖽑𖽻𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼣𖽙𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼊𖽻 𖼊𖽑𖽜𖾐，𖽃𖽔𖾑 𖼄𖽳𖾐 𖼣𖽙𖾐 𖼈𖽳𖾐 𖼐𖽑𖽡𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼣𖽙𖾐 𖼈𖽳𖾐 𖼞𖽜 𖼺𖽙𖾐 𖼐𖽑𖽡𖾐 𖼺𖽜 𖼖𖽡𖾐 𖼞𖽳𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼽𖽡𖾐 𖼺𖽺𖾑，𖼣𖽙𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽕 𖼊𖽑𖽺 𖽂𖽙𖾐 𖼍𖽡𖾐 𖼊𖽑𖽴 𖼽𖽡𖾐 𖼊𖽙𖾐．

19 𖼣𖽙𖾐 𖼦𖽑𖽔𖾐 𖼖𖽺𖾑 𖼺𖽝𖾑，𖼣𖽙𖾐 𖽂𖽙 𖼐𖽑𖽡𖾐 𖽂𖽙 𖼖𖽕𖾐 𖼄𖽔 𖼻𖽜 𖼊𖽑𖽡𖾑 𖼣𖽻𖾐，𖽃𖽦𖾐 𖼰𖽧 𖼠𖽚 𖼞𖽳𖾐 𖼇𖽕 𖼖𖽻 𖼐𖽑𖽡𖾐 𖼈𖽳𖾐 𖼊𖽑𖽺 𖼄𖽔 𖼀𖽑𖽨 𖼊𖽑𖽧 𖼽𖽡𖾐 𖼊𖽻𖾐． 20 𖽃𖽔𖾐 𖼺𖽺𖾑，𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼖𖽦 𖼀𖽑𖽦𖾐 𖼮𖽑𖽡𖽺𖾐 𖼊𖽑𖽧 𖼖𖽻𖾐，𖼞𖽑𖽙𖾐 𖼣𖽙𖾐 𖼳𖽶 𖼞𖽑𖽙 𖼣𖽝 𖼄𖽡𖽻 𖼻𖽜，𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼊𖽑𖽺 𖼊𖽝，𖼠𖽙𖾑 𖼍𖽻𖾐 𖼺𖽺𖾑 𖼽𖽻 𖼐𖽑𖽡𖾐 𖼈𖽳𖾐 𖼞𖽜 𖼺𖽜 𖼽𖽡𖾐 𖼊𖽻𖾐． 21 𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽡𖾐 𖼈𖽳𖾐 𖼞𖽜 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽡 𖼽𖽡𖾑 𖽂𖽙𖾐 𖼊𖽻𖾐，𖽃𖽔𖾐 𖼺𖽺𖾑 𖼐𖽑𖽡𖾐 𖼈𖽳𖾐 𖼺𖽜 𖼽𖽡𖾐 𖼞𖽑𖽶𖾑 𖼮𖽶𖾐，𖼖𖽦 𖼞𖽻 𖼄𖽙𖾐 𖼄𖽔 𖼊𖽚𖾐 𖼽𖽡𖾐 𖼊𖽻𖾐． 22 𖼐𖽑𖽡𖾐 𖼈𖽳𖾐 𖼞𖽳𖾐 𖼻𖽙 𖼄𖽳 𖼄𖽡𖾐 𖼐𖽜𖾐 𖼊𖽑𖽡 𖼽𖽚𖾑 𖼽𖽚𖾐，𖼽𖽻 𖼄𖽳𖾑 𖼮𖽑𖽡𖽦𖾐 𖼮𖽑𖽻 𖼞𖽳𖾐 𖼻𖽙 𖼄𖽳 𖼄𖽡𖾐 𖼐𖽜𖾐 𖼐𖽺𖾐 𖼽𖽻 𖽃𖽔𖾑 𖼞𖽑𖽶𖾐 𖼣𖽙𖾑 𖼮𖽻𖾐 𖼺𖽪𖾐 𖼻𖽙 𖼄𖽳 𖼄𖽡𖾐 𖼐𖽜𖾐 𖼞𖽳𖾐 𖼀𖽑𖽨𖾐 𖼳𖽳𖾐 𖼊𖽴 𖼞𖽪𖾐 𖼄𖽡𖽻 𖼐𖽑𖽡，𖼀𖽑𖽡𖽻𖾐 𖼷𖽑𖽶 𖼦𖽑𖽙𖾐 𖼐𖽑𖽡𖾐 𖼈𖽳𖾐 𖼞𖽳𖾐 𖼻𖽙 𖼄𖽡𖾐 𖼐𖽜𖾐 𖼞𖽜 𖼊𖽴 𖼈𖽦 𖼖𖽡𖾐；𖼦𖽑𖽺𖾑 𖼻𖽻𖾐 𖼂𖽺𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖽃𖽦𖾐 𖼰𖽧 𖼺𖽪𖾐 𖼷𖽑𖽻𖾐 𖼞𖽳𖾐 𖼄𖽡𖽻 𖼐𖽑𖽡 𖼐𖽻𖾑 𖽂𖽙𖾐 𖼊𖽙𖾐．