5 𖼳𖽳𖾐 𖼳𖽡𖽻𖾐 𖼷𖽻𖾐 𖼀𖽑𖽨 𖼺𖽺𖾑 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖽃𖽙𖾑 𖼄𖽺 𖼮𖽑𖽡𖽺 𖼍𖽙𖾑，𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐𖼞𖽳𖾐 𖽃𖽔𖾑 𖼊𖽪 𖼮𖽑𖽨𖾑 𖼄𖽳𖾐 𖼠𖽕𖾑 𖼍𖽪𖾐 𖼖𖽻𖾐 𖼖𖽡𖾐． 6 𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼂𖽺𖾐 𖼖𖽚𖾐 𖼂𖽚𖾐 𖼍𖽡𖾐 𖼷𖽻𖾐 𖼀𖽑𖽨 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖽃𖽔𖾑 𖼊𖽪 𖼮𖽑𖽡𖽺 𖼍𖽙𖾑 𖼖𖽡𖾐． 7 𖼊𖽪 𖼖𖽻 𖼀𖽑𖽨 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼐𖽺𖾐 𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼂𖽺𖾐 𖼖𖽚𖾐 𖼂𖽚𖾐 𖼍𖽡𖾐 𖼷𖽻𖾐 𖼠𖽻𖾐 𖼊𖽑𖽺 𖼍𖽙𖾑，𖼖𖽻 𖼞𖽑𖽶𖾐 𖽃𖽔𖾐 𖼮𖽡𖽦𖾐 𖼰𖽡𖽺𖾐 𖼖𖽡𖾐． 8 𖼹𖽦𖾑 𖼮𖽡𖽺 𖼞𖽪 𖼦𖽜 𖼦𖽜 𖼷𖽜𖾐 𖼷𖽜𖾐 𖼞𖽳𖾐 𖼮𖽑𖽨𖾑 𖼮𖽑𖽙𖾐 𖼍𖽚 𖼍𖽪𖾐，𖼠𖽳𖾑 𖼄𖽡𖾐 𖼊𖽪 𖼞𖽳𖾐 𖼮𖽑𖽨𖾑 𖼄𖽳𖾐 𖼖𖽺𖾑 𖼠𖽕𖾑 𖼍𖽪𖾐 𖼖𖽻𖾐 𖼖𖽡𖾐．

9 𖼐𖽑𖽡𖾐 𖼳𖽡𖽻𖾐 𖼷𖽑𖽳𖾐 𖼈𖽺𖾐 𖼂𖽻𖾐 𖼖𖽻𖾐，𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼐𖽺𖾐 𖼞𖽑𖽙𖾐 𖼣𖽻𖾐 𖼳𖽶 𖼄𖽡𖽻 𖼐𖽑𖽡 𖼊𖽑𖽺 𖼄𖽺𖾑，𖼦𖽑𖽺𖾑 𖼹𖽻𖾐 𖼞𖽜 𖼺𖽡 𖼮𖽡𖾐 𖼺𖽺𖾑，𖼷𖽑𖽜𖾑 𖼷𖽑𖽜𖾐 𖼺𖽡 𖼮𖽡𖾐 𖼦𖽑𖽻𖾐 𖼊𖽻𖾐． 10 𖼦𖽑𖽔𖾐 𖼖𖽺𖾑 𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼂𖽺𖾐 𖼖𖽚𖾐 𖼂𖽚𖾐 𖼍𖽡𖾐 𖼷𖽻𖾐 𖼐𖽺𖾐 𖼍𖽡𖾐 𖼷𖽻𖾐 𖼞𖽳𖾐 𖼄𖽡𖽻 𖼐𖽑𖽡 𖼞𖽑𖽙𖾐 𖼣𖽻𖾐 𖼞𖽜 𖼺𖽡 𖼮𖽡𖾐 𖼺𖽺𖾑，𖼍𖽡𖾐 𖼷𖽻𖾐 𖼷𖽑𖽜𖾑 𖼷𖽑𖽜𖾐 𖼺𖽡 𖼮𖽡𖾐 𖼷𖽑𖽚 𖼊𖽻𖾐． 11 𖼊𖽪 𖼖𖽻 𖼐𖽺𖾐 𖼊𖽪 𖼖𖽻 𖼍𖽡𖾐 𖼊𖽪𖾐 𖼊𖽑𖽺 𖼄𖽺𖾑 𖼺𖽺𖾑 ，𖼊𖽪 𖼖𖽻 𖼞𖽜 𖼺𖽡 𖼮𖽡𖾐 𖼖𖽡𖾐．

12 𖼐𖽑𖽡𖾐 𖼽𖽕𖾑 𖼖𖽪𖽦 𖼐𖽺𖾐 𖼽𖽻 𖼻𖽙 𖼞𖽑𖽶𖾑 𖼹𖽻𖾐 𖼊𖽑𖽺 𖼦𖽳 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖽃𖽔𖾑 𖼊𖽪 𖼮𖽑𖽡𖽺 𖼞𖽳𖾐 𖼖𖽻𖾐，𖽃𖽔𖾐 𖼮𖽡𖽦𖾐 𖼻𖽜 𖼽𖽻 𖼈𖽳𖾐 𖼊𖽑𖽺 𖼮𖽑𖽡𖾐 𖼈𖽶 𖼖𖽦 𖼈𖽶 𖼷𖽑𖽡 𖼖𖽡𖾐． 13 𖼐𖽑𖽡𖾐 𖼺𖽡 𖼮𖽡𖾐 𖼀𖽑𖽡𖽻𖾐 𖼈𖽺𖾐 𖼽𖽕𖾑 𖼖𖽪𖽦 𖼞𖽜 𖼈𖽦，𖼳𖽡𖽻𖾐 𖼷𖽑𖽳𖾐 𖼈𖽺𖾐 𖼽𖽻 𖼊𖽑𖽺 𖼄𖽺𖾑，𖼽𖽻 𖼞𖽜 𖼺𖽡 𖼮𖽡𖾐 𖼺𖽺𖾑，𖼣𖽙𖾐 𖼞𖽳𖾐 𖼍𖽡𖾐 𖼄𖽻 𖽂𖽙𖾐 𖼂𖽺𖾐 𖼊𖽙𖾐． 14 𖼐𖽑𖽡𖾐 𖼽𖽕𖾑 𖼖𖽪𖽦 𖼞𖽳𖾐 𖼻𖽙 𖼞𖽑𖽶𖾑 𖼹𖽻𖾐 𖼊𖽑𖽺 𖼦𖽳 𖼂𖽻𖾐 𖼖𖽻𖾐，𖼞𖽑𖽶𖾐 𖼮𖽻𖾐 𖼀𖽑𖽡𖽻𖾐 𖼮𖽻 𖼠𖽕𖾐 𖼈𖽺𖾐 𖼽𖽻 𖼈𖽳𖾐 𖼞𖽜 𖼈𖽦 𖼖𖽡𖾐． 15 𖼳𖽡𖽻𖾐 𖼷𖽑𖽳𖾐 𖼈𖽺𖾐 𖼽𖽕𖾑 𖼖𖽪𖽦 𖼊𖽑𖽺 𖼄𖽺𖾑 𖼖𖽙𖾐 𖼺𖽶𖾑，𖼽𖽻 𖼈𖽳𖾐 𖼊𖽑𖽺 𖼖𖽺𖾑 𖼳𖽡𖽻𖾐 𖼷𖽑𖽳𖾐 𖼈𖽺𖾐 𖼄𖽺𖾑，𖼍𖽡𖾐 𖼄𖽻 𖼂𖽺𖾐 𖼣𖽙𖾐 𖼊𖽑𖽺 𖽂𖽙𖾐 𖼠𖽙𖾐 𖼳𖽙𖾐 𖼊𖽙𖾐． 𖼽𖽻 𖼈𖽳𖾐 𖼊𖽑𖽺 𖼳𖽡𖽻𖾐 𖼷𖽑𖽳𖾐 𖼄𖽺𖾑 𖼦𖽑𖽙𖾐 𖼺𖽺𖾑，𖼹𖽦𖾐 𖼹𖽦𖾐 𖼀𖽻𖾐 𖼀𖽻𖾐 𖼍𖽡𖾐 𖼄𖽻 𖽂𖽙𖾐 𖼂𖽺𖾐 𖼊𖽻𖾐． ”

16 𖽃𖽔𖾐 𖼺𖽺𖾑，𖼄𖽚 𖼳𖽡𖾐 𖼽𖽺𖾐 𖼦𖽴 𖼦𖽫 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐 𖼂𖽺𖾐 𖼦𖽑𖽙𖾐． 17 𖼠𖽙𖾑 𖼍𖽻𖾐 𖼊𖽑𖽡 𖼞𖽑𖽚，𖼞𖽑𖽚 𖼳𖽸 𖼳𖽨𖾐 𖼊𖽦𖾐 𖼊𖽑𖽡，𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼍𖽚 𖼍𖽪𖾐 𖼖𖽻𖾐 𖼦𖽑𖽻𖾐． 18 𖼄𖽚 𖼳𖽡𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼍𖽚 𖼍𖽪𖾐： 𖼍𖽡𖾐 𖼮𖽚𖾐 𖼂𖽺𖾐 𖼍𖽙𖾑，𖼺𖽧𖾐 𖼀𖽑𖽡 𖼰𖽻 𖼍𖽪𖾐，𖼰𖽡𖽻𖾑 𖼖𖽜 𖼈𖽺𖾐 𖼰𖽡𖽻𖾑 𖼍𖽡，𖼠𖽻𖾐 𖼻𖽶𖾐 𖼰𖽻 𖼍𖽪𖾐 𖼖𖽻𖾐． 19 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼊𖽑𖽺 𖼀𖽜𖾐 𖼮𖽑𖽙𖾐 𖼈𖽺𖾐 𖼀𖽜𖾐，𖼹𖽦𖾑 𖼞𖽑𖽶𖾑 𖼊𖽑𖽺 𖼀𖽜𖾐 𖼊𖽪𖾐 𖼊𖽑𖽡 𖼍𖽴𖾐 𖼈𖽺𖾐 𖼀𖽜𖾐，𖼄𖽳𖾑 𖼄𖽳 𖼖𖽺𖾑 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼊𖽑𖽺 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐 𖼂𖽺𖾐．

20 𖼄𖽚 𖼳𖽡𖾐 𖼷𖽑𖽦𖾐 𖼮𖽡𖽺𖾐 𖼀𖽑𖽡 𖼈𖽺𖾐 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼞𖽑𖽶𖾐 𖼰𖽡𖽺𖾐，𖼈𖽦𖾑 𖼖𖽜 𖼺𖽳𖾐 𖼀𖽚𖾐 𖼮𖽡𖽺 𖼐𖽑𖽡 𖼀𖽳 𖼠𖽪𖾐 𖼖𖽪𖾐 𖼞𖽑𖽶𖾐 𖼰𖽡𖽺𖾐，𖼮𖽡 𖼽𖽡𖾑 𖼳𖽳𖾐 𖼮𖽡𖽺 𖼀𖽑𖽨 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼊𖽑𖽺 𖼍𖽦𖾐． 21 𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼈𖽦𖾑 𖼺𖽡 𖼮𖽡𖾐 𖼷𖽑𖽚 𖼊𖽺𖾐 𖼞𖽳𖾐 𖼊𖽡 𖼽𖽡𖾐，𖼄𖽳𖾐 𖼷𖽑𖽦𖾐 𖼀𖽚𖾐 𖼮𖽡𖽺 𖼊𖽑𖽺 𖼰𖽨𖾑 𖼍𖽻𖾑 𖼄𖽳𖾐 𖼈𖽺𖾐 𖼮𖽑𖽨𖾑 𖼍𖽡，𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼊𖽑𖽺 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐 𖼂𖽺𖾐 𖼳𖽶 𖼣𖽻𖾐．

22 𖼦𖽑𖽔𖾐 𖼖𖽺𖾑 𖼹𖽙𖾐 𖼹𖽶𖾐𖼀𖽑𖽨 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽑𖽶𖾐 𖼰𖽨𖾑 𖼍𖽻𖾑 𖼄𖽳𖾐 𖼞𖽳𖾐 𖼐𖽑𖽡𖾑 𖼮𖽻𖾐 𖼀𖽳 𖼳𖽶 𖼐𖽑𖽡𖽻𖾐 𖼄𖽡𖾐 𖼀𖽳 𖼍𖽙𖾑． 23 𖽃𖽔𖾑 𖼂𖽻𖾐 𖼀𖽑𖽨 𖼹𖽙𖾐 𖼹𖽶𖾐 𖼊𖽑𖽺 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼍𖽙𖾑，𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼊𖽑𖽺 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐 𖼂𖽺𖾐 𖼳𖽶 𖼣𖽻𖾐．

24 𖼄𖽚 𖼳𖽡𖾐 𖼀𖽙𖾐 𖼷𖽻𖾐 𖼀𖽑𖽨 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽑𖽶𖾐 𖼰𖽨𖾑 𖼍𖽻𖾑 𖼄𖽳𖾐 𖼞𖽳𖾐 𖼐𖽑𖽡𖾑 𖼮𖽻𖾐 𖼀𖽳 𖼠𖽳𖾐 𖼻𖽸 𖼄𖽡𖾐 𖼀𖽳 𖼍𖽙𖾑，𖼹𖽙𖾐 𖼹𖽶𖾐 𖼍𖽴 𖼍𖽪𖾐 𖼞𖽳𖾐 𖼮𖽻𖾐． 25 𖼽𖽺𖾐 𖼦𖽴 𖼦𖽫 𖽃𖽙𖾑 𖼄𖽺 𖼮𖽑𖽡𖽺 𖼀𖽙𖾐 𖼊𖽪𖾐 𖼍𖽚𖾑 𖼍𖽪𖾐，𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼊𖽑𖽺 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐 𖼂𖽺𖾐 𖼳𖽶 𖼣𖽻𖾐． 26 𖼳𖽳𖾐 𖼳𖽡𖽻𖾐 𖼷𖽻𖾐 𖼀𖽑𖽨 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽑𖽶𖾐，𖼰𖽨𖾑 𖼍𖽻𖾑 𖼄𖽳𖾐 𖽃𖽙𖾑 𖼄𖽺 𖼀𖽳 𖼍𖽙𖾑． 27 𖼳𖽳𖾐 𖼳𖽡𖽻𖾐 𖼷𖽻𖾐 𖼊𖽑𖽺 𖼳𖽡𖽻𖾑 𖼳𖽡𖽻𖾐 𖼮𖽻𖾐 𖼺𖽪𖾐 𖼳𖽡𖽻𖾐 𖼮𖽑𖽡𖽪𖾐，𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼊𖽑𖽺 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐 𖼂𖽺𖾐 𖼳𖽶 𖼣𖽻𖾐．

28 𖼦𖽑𖽔𖾐 𖼖𖽺𖾑 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽳𖾐 𖽃𖽔𖾑 𖼊𖽪 𖼮𖽑𖽨𖾑 𖼄𖽳𖾐 𖼠𖽕𖾑 𖼍𖽪𖾐． 29 𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼂𖽺𖾐 𖼖𖽚𖾐 𖼂𖽚𖾐 𖼍𖽡𖾐 𖼷𖽻𖾐 𖼀𖽑𖽨 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖽃𖽔𖾑 𖼊𖽪 𖼮𖽑𖽡𖽺 𖼍𖽙𖾑 𖼺𖽺𖾑，𖼞𖽑𖽶𖾑 𖼊𖽑𖽺 𖼮𖽑𖽡𖽪𖾐 𖼦𖽑𖽻𖾐 𖼍𖽡𖾐 𖼮𖽡𖽺𖾐 𖼐𖽺𖾐 𖼷𖽙𖾐 𖼺𖽳 𖼍𖽡𖾐 𖼮𖽡𖽺𖾐 𖼂𖽺𖾐． 𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼊𖽑𖽺 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐 𖼂𖽺𖾐 𖼳𖽶 𖼣𖽻𖾐．

30 𖼦𖽑𖽔𖾐 𖼖𖽺𖾑 𖼊𖽪 𖼖𖽻 𖼀𖽑𖽨 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼐𖽺𖾐 𖼍𖽡𖾐 𖼷𖽻𖾐 𖼠𖽻𖾐 𖼊𖽑𖽺 𖼍𖽙𖾑，𖼊𖽪 𖼖𖽻 𖼞𖽑𖽶𖾐 𖽃𖽔𖾐 𖼮𖽡𖽦𖾐 𖼞𖽑𖽴 𖼰𖽡𖽺𖾐 𖼺𖽺𖾑，𖼮𖽑𖽡𖾐 𖼈𖽶 𖼖𖽦 𖼈𖽶 𖼷𖽑𖽡 𖼖𖽚𖾐 𖼂𖽚𖾐 𖼂𖽺𖾐． 31 𖼄𖽚 𖼳𖽡𖾐、 𖼽𖽕𖾑 𖼖𖽪𖽦 𖼐𖽺𖾐 𖼽𖽕𖾑 𖼖𖽪𖽦 𖼞𖽳𖾐 𖼻𖽙 𖼞𖽑𖽶𖾑 𖼹𖽻𖾐，𖼊𖽪 𖼖𖽻 𖼞𖽳𖾐 𖼞𖽶𖾐 𖼮𖽑𖽶 𖽂𖽙𖾐 𖼷𖽑𖽡 𖼊𖽙𖾐． 32 𖼽𖽻 𖼈𖽳𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽑𖽶𖾐 𖼊𖽡 𖼽𖽡𖾐 𖼣𖽻𖾐 𖼦𖽻，𖼍𖽡𖾐 𖼷𖽻𖾐 𖼞𖽳𖾐 𖼐𖽳 𖼽𖽡𖾐 𖼣𖽻𖾐 𖼦𖽻，𖽃𖽙𖾑 𖼄𖽺 𖼮𖽑𖽡𖾐 𖼈𖽶 𖼖𖽦 𖼈𖽶 𖼷𖽑𖽡 𖼖𖽡𖾐． 𖼦𖽑𖽺𖾑 𖼽𖽺𖾐 𖼦𖽴 𖼦𖽫 𖼄𖽚 𖼳𖽡𖾐 𖼊𖽑𖽺 𖼞𖽑𖽙𖾐 𖼄𖽪𖾑 𖼍𖽴𖾑 𖼖𖽙𖾐 𖼮𖽑𖽻𖾐 𖼂𖽺𖾐 𖼳𖽶 𖼣𖽻𖾐．

33 𖼄𖽚 𖼳𖽡𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐、 𖼍𖽡𖾐 𖼷𖽻𖾐 𖼐𖽺𖾐 𖼮𖽡𖽺 𖼞𖽪，𖼦𖽑𖽺𖾑 𖼹𖽻𖾐 𖼦𖽜 𖼦𖽜 𖼷𖽜𖾐 𖼷𖽜𖾐 𖼞𖽳𖾐 𖼮𖽑𖽨𖾑 𖼮𖽑𖽙𖾐 𖼰𖽻 𖼍𖽪𖾐 𖼖𖽻𖾐，𖼹𖽦𖾑 𖼮𖽡𖽺 𖼞𖽪 𖼞𖽳𖾐 𖽃𖽔𖾑 𖼊𖽪 𖼮𖽑𖽨𖾑 𖼄𖽳𖾐 𖼠𖽕𖾑 𖼍𖽪𖾐 𖼖𖽻𖾐． 𖽃𖽔𖾐 𖼺𖽺𖾑 𖼄𖽚 𖼳𖽡𖾐 𖼄𖽡𖽻 𖼄𖽳𖾑 𖼄𖽳 𖼂𖽺𖾐 𖼀𖽑𖽢 𖼦𖽑𖽻𖾐．

34 𖼞𖽑𖽶𖾑 𖼮𖽶𖾐，𖼍𖽡𖾐 𖼮𖽑𖽙𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼊𖽑𖽺 𖼀𖽜𖾐 𖼍𖽡，𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽶 𖼳𖽳𖾐， 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼮𖽻𖾐 𖼊𖽺𖾐 𖼞𖽳𖾐 𖼀𖽡𖾐 𖼮𖽨𖾐 𖼦𖽑𖽻𖾐． 35 𖼄𖽚 𖼳𖽡𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼞𖽑𖽶𖾐 𖼊𖽡 𖼽𖽡𖾐 𖼀𖽑𖽢 𖼄𖽔 𖼊𖽙𖾐，𖼞𖽪𖾐 𖼮𖽡𖽺𖾐 𖼍𖽡𖾐 𖼮𖽑𖽙𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼊𖽑𖽺 𖼂𖽡𖾑 𖼍𖽡，𖼦𖽑𖽔𖾐 𖼖𖽺𖾑 𖼽𖽺𖾐 𖼦𖽴 𖼦𖽫 𖼞𖽳𖾐 𖼄𖽶 𖼳𖽳𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼮𖽻𖾐 𖼊𖽺𖾐 𖼞𖽳𖾐 𖼀𖽡𖾐 𖼮𖽨𖾐 𖼦𖽑𖽻𖾐．

36 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼞𖽑𖽙𖾐 𖼺𖽜 𖼞𖽳𖾐 𖼮𖽨𖾐 𖼄𖽙𖾐 𖼊𖽑𖽺 𖼷𖽶𖾐 𖼄𖽳𖾐 𖼺𖽪𖾐 𖼄𖽡𖽻 𖼦𖽑𖽺𖾑 𖼻𖽻𖾐 𖼣𖽻𖾐：“𖼍𖽡𖾐 𖼮𖽑𖽙𖾐 𖼞𖽑𖽙 𖼊𖽑𖽻𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐𖼞𖽳𖾐 𖼮𖽑𖽻𖾐 𖼀𖽑𖽚𖾐 𖼊𖽦𖾐 𖼽𖽡𖾐，𖼽𖽻 𖼈𖽳𖾐 𖼞𖽑𖽙 𖼊𖽑𖽻𖾐 𖼺𖽜 𖼍𖽪𖾐． 37 𖼍𖽡𖾐 𖼮𖽑𖽙𖾐 𖼄𖽔 𖼀𖽑𖽚𖾐 𖼊𖽦𖾐 𖼽𖽡𖾐 𖼊𖽑𖽡𖾑 𖼣𖽻𖾐，𖼽𖽻 𖼈𖽳𖾐 𖼄𖽔 𖼺𖽜 𖼽𖽡𖾐 𖼺𖽺𖾑，𖼍𖽡𖾐 𖼮𖽑𖽙𖾐 𖼀𖽑𖽚𖾐 𖼊𖽦𖾐 𖼽𖽡𖾐 𖼰𖽶𖾐 𖼮𖽑𖽡𖾐． 38 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽡𖾐 𖼳𖽡𖽻𖾐 𖼄𖽡𖾐 𖼊𖽺𖾐 𖼮𖽻𖾐 𖼞𖽑𖽶𖾑 𖼮𖽶𖾐，𖼞𖽑𖽙𖾐 𖼺𖽜 𖼞𖽳𖾐 𖼮𖽨𖾐 𖼄𖽙𖾐，𖽃𖽔𖾑 𖼐𖽑𖽡 𖼞𖽪𖾐 𖼽𖽺𖾐 𖼦𖽴 𖼦𖽫 𖼞𖽳𖾐 𖼍𖽡𖾐 𖼮𖽑𖽙𖾐 𖼺𖽡 𖼮𖽡𖾐 𖼄𖽳𖾐 𖼦𖽑𖽺𖾐 𖼊𖽑𖽺 𖼮𖽻𖾐，𖽃𖽔𖾑 𖼄𖽶 𖼮𖽑𖽧 𖼍𖽡𖾐 𖼮𖽑𖽙𖾐 𖼠𖽻𖾐 𖼞𖽑𖽶𖾐 𖽃𖽔𖾐 𖼍𖽚𖾑 𖼮𖽻𖾐，𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼄𖽳𖾑 𖼄𖽳 𖼐𖽦𖾐 𖼄𖽡𖽻𖾐． ”