2
1 ꞌBụ̃ kí ụ̃nọ́kụ́ be ãzíla ãko pírí ala gá rĩ kí abe Ãdróŋá de kí ũꞌbã agá rá. 2 Ãdróŋá avị́ dó ụ́ꞌdụ́ ázị̂rị̃ rĩ sĩ, ãzị́ ĩꞌdi ꞌbã ngalé vâ delé ꞌbo rĩ ũngúkú gá.
3 Ãdróŋá wi sụ̃sụ́ ụ́ꞌdụ́ ázị̂rị̃ rĩ drị̃ gá ꞌbã ĩꞌdi ãlápítítí ru ãꞌdusĩku ụ́ꞌdụ́ ázị̂rị̃ ꞌdã ándrá Ãdróŋá ꞌbã sĩ avị́jó ãzị́ pírí ĩꞌdi ꞌbã ngalé ãko ũꞌbãjó rĩ vúlé gá rĩ ꞌi.
Ádãmũ ꞌbã kí adrujó Ị́vã be ámvụ́ Édẽnĩ gá rĩ
4 ꞌDĩ ãwí Ãdróŋá ꞌbã ꞌbụ̃ kí ꞌbãjó ụ̃nọ́kụ́ be rĩ. Ãdróŋá la dó mụ ụ̃nọ́kụ́ ꞌbãlé ꞌbụ̃ be ꞌbo, 5 ãko ãzí dụlépi ị̃rẹ́bị́ ru la ụ̃nọ́kụ́ drị̃ gá ꞌdáyụ ũri ãzí angálépi rá la ꞌdáyụ ãꞌdusĩku Ãdróŋá ꞌbã fẽjó la uzogóní ꞌdịjó ku rĩ sĩ ãzíla ꞌbá ámvụ́ sõlépi la ꞌbã adrujó yụ rĩ sĩ, 6 wó ị̃yị́ rĩ agbẹ́lé ꞌde dó ũfúru ị̃mvụ̃ dó ụ̃nọ́kụ́ pírí. 7 Úpí Ãdróŋá idé ꞌbá ũdrí ụ̃nọ́kụ́ gá rĩ sĩ, vu ãvẹ̃vị̃ adrujó ídri rĩ ũmvu la gâ sĩ. ꞌBá acá dó ãko ídri trũ larú.
8 Úpí Ãdróŋá ꞌbã ámvụ́ ị̃tụ́ ꞌbã ãfũ agâlé ru, ꞌbã dó ꞌbá ĩꞌdi ꞌbã idélé rĩ ala gá. 9 Úpí Ãdróŋá ꞌbã ife ũví ndú-ndú ãlápítí ífí kalépi ãjị́ ambamba la nalé nãnã, ámvụ́ ꞌbã ágágá ife ídri fẽlépi rĩ ãzíla ife ị́jọ́ ũnzí kí nị̃jó múké be rĩ ꞌi. 10 Ị̃yị́ dịlépi ámvụ́ Édẽnĩ ị̃mvụ̃lépi rĩ awa ru sụ. 11 Ị̃yị́ drị̃drị̃ rĩ ꞌbã rụ́ Písõnĩ ꞌi; dị ãngũ umvelé Hãvílã agâ sĩ ãngũ sĩ dãhábụ̃ ịsụ́jó rĩ gá. 12 Dãhábụ̃ ãngũ ꞌdã agá rĩ ãlá ru usaru ku ụ̃gbụ́lụ́kụ ãnụ́ áni ngụ̃lépi ndrị̃-ndrị̃ ãzíla írã ãjẹ̃ rú pãrã-pãrã la kí ꞌdãá cí. 13 Ị̃yị́ ị̃rị̃ rĩ ꞌbã rụ́ Gíhõnĩ ꞌi. Dị Kụ́sị̃ agâ sĩ. 14 Ị̃yị́ na rĩ ꞌbã rụ́ Tị̃gị̃rị́sị̃ ꞌi adị́lépi angájó Ãsụ́rị́ã gá wókõ ị̃tụ́ ꞌbã ãfũ agâlé ru rĩ ꞌi. Ị̃yị́ sụ rĩ ꞌbã rụ́ Ũfũrátĩ ꞌi. 15 Úpí Ãdróŋá ꞌbã ꞌbá ámvụ́ Édẽnĩ agá ãzị́ la ngajó vâ tã la mbajó. 16 Úpí Ãdróŋá azị ĩꞌdiní, “Mí icó ife ífí ámvụ́ agá ꞌdâ rĩ kí nalé pírí rá, 17 wó mí aꞌbe ife ífí ị́jọ́ múké rĩ kí nị̃jó ũnzí rĩ be rĩ cã. Ídrĩ na la rá, mi drã rá.”
18 Úpí Ãdróŋá jọ, “ꞌBá ꞌdĩní adrujó áꞌdụ̂sĩ rĩ adru múké ku, ma ĩꞌdiní ꞌbá ĩꞌdi ãzã kolépi rĩ ꞌbã rá.” 19 Ãdróŋá ũꞌbã ãko pírí ãnãkpá, ãriŋa kî trũ, ají kí iꞌdalé Ádãmũní kí rụ́ ꞌdajó. Rụ́ pírí ĩꞌdi ꞌbã ꞌdalé ãko ãlu-ãlu ídri trũ rĩ ꞌbanî rĩ ace dó ĩꞌbaní rụ́ru nĩ. 20 Ádãmũ ꞌda dó rụ́ ãnãkpá lị́cọ́ gá rĩ ꞌbanî, ãnãkpá ásé agá rĩ ꞌbanî ãzíla ãriŋa ꞌbụ̃ gá rĩ kî trũ, wó tí ịsụ́ ꞌbá ĩꞌdi ãzã kolépi icólépi rá la ku. 21 Ị́jọ́ ꞌdĩ sĩ, Úpí Ãdróŋá fẽ dó Ádãmũ ꞌbe dó ụ́ꞌdụ́ káyĩ rá. Anzé ĩfãkã ĩꞌdi lúmã gá rĩ ífí ãlu ụ̃pị̃ dó ãngũ la ꞌdã ĩzánáká sĩ cí.
22 Ãdróŋá anzé dó ĩfãkã lúmã la gá rĩ idélé ĩꞌdiní ũkúru, ají dó ĩꞌdi rụ́ ꞌdõlé. 23 Ádãmũ jọ dó, “ꞌDĩ ĩzá ãzíla ĩfã mâ rĩ ꞌi,” ꞌda dó rụ́ la ũkú ꞌi ála ĩꞌdi anzéjó ꞌbá ụrụꞌbá gá rĩ sĩ. 24 Ị́jọ́ ꞌdĩ sĩ, ꞌbá la átẹ́pị̃ kí aꞌbe ãndrẽ be, kí ru icí ũkú ĩꞌdidrị̂ be ãzíla kí ị̃rị̃trá acá ụrụꞌbá ãlu rú. 25 Ágọ́bị́ kí ándrá ũkû be ị̃rị̃ trá pílílí ru kí ándrá drị̃nzâ kóru.