यूहन्ना बपतिस्मा दियेवला के सेवा
(मत्ती 3:1-12; मरकुस 1:1-8; यूहन्ना 1:19-28)
3
1 इ ऊ समइया के बाता हके, जखने महरजवा तिबिरियोस के राज करेक के पंदरमां बरस में हले, आर जखने पोंतियोस पिलातोस यहूदीया के राजपाल हले, आर हेरोदेस रजवा गलील इलकवा पर राज करेब करे हले, आर ओकर भेयवा फिलिप्पोस इतूरेया आर तरखोनीतिस इलकवेन में राज करेब करे हले, आर लिसानियास अबिलेने इलकवा में रजवा हले, 2 आर जखने हन्नास आर केफास महायजकवेन हले, तखने परमेसवर, सुनसपाटा में जकरयाह के बेटवा यूहन्ना जुगुर हाला पठिलके। 3 ऊ यरदनवा नदिया के दुनु पटी जतना गांवा-बस्तिया हले, जाएके परचारन करे लागले, “पापा से मना बदल, आर बपतिस्माa लिहीं, ता परमेसवर तोहनी के पापा माफ करतो।”। 4 जिरंग परमेसवर दने से बोलेवला यसय्याह के कहल बचनवा के कितबा में लिखल हो: b“सुनसपाटा जघावा में हंकावेवला के अवजिया होएब करे हो कि,‘परभु खतीर डहरा बना, उन्खर डहरा सोझ कर। 5 साभे गढ़ावेन भोंएथ दियल जीते, साभे पहड़ियेन आर टिल्हवेन बराबर करल जीते; आर जे टेढ़ डहरा हो, सोझ करल जीते, आर जे ऊँच -नीच हे ओकरा बराबर डहरा बनीते। 6 आर साभे अदमियेन परमेसवर के मुकती के दखते’।”c7 जे भीड़िया पर भीड़िया यूहन्ना से बपतिस्मा लिये खतीर याएब करे हले, यूहन्ना उसभीन से कहेब करे हले, "हे, करेतवा सांपा के बचवेन, तोहनी से के कहलको कि आवेवला परमेसवर के सजा से भाएग जो?d 8 आर तोहनी इरंग कामेन कर जे तों अपन पापा के छोएड़ के परमेसवर दने घुरेक के कामेन दखावे हे, आर मना में ई नाञ सोंचियों कि हमर छेर-बोवा अबराहम हकेe; काहेकि हाम तोहनी से कहे हियो कि परमेसवर ई पखलेन से अबराहम खतीर खन्दनवेन बनाए सके हो। 9 अभिये टंगिया गछेन के जारा तर धारल हो येहे खतीर कि जे जे गाछा में बेसका फाला नाञ फरते, ऊ गाछा काटल जीतो आर अगिया में जारल जीतो।”f 10 ताब अदमियेन यूहन्ना से पुछलके, “ता बता, हमनी की करिये ?” 11 ऊ उसभीन के जबबा दलके, “जकर जुगुर दुगो पिंधनवा हो ऊ ओकरा एगो दिहीं जकर जुगुर अकोगो नाञ हो आर जकर जुगुर खाएवला हो, वोहो इरंगे करियों। 12 मलगुजारी लियेवलोन बपतिस्मा लिये खतीर येले आर ओकर से पुछलके, “हे गुरु, हमनी की करिये ?”g 13 यूहन्ना उसभीन से कहलके, “जतना तोहनी खतीर बांधल गेल हो, ओतने लियों, ओकर से जादे नाञ लियों।” 14 सिपहियेन ओकर से पुछलके, “हमनी की करिये ?” यूहन्ने उसभीन से कहलके, “ककरो धमकाए-चमकाए के पेसवा नाञ लियों आर नाञ ककरो झूठ बोएल के फसइयों, आर जतना कमा हीं ओतने में सबुर करियों।”
15 जखने अदमियेन बपतिस्मा लिये खतीर असरा में लागल हले, आर साभे गोटेन अपन-अपन मना में यूहन्ना के बारे में बिचार करे हले कि येहे मसीह तो नाञ हको, 16 ता यूहन्ना साभे गोटेन से कहलके, “हाम तोहनीक पनिया से बपतिस्मा दे हियो, लकिन ऊ जे आवेवला हो से हमरो से जादे सकतीसाली हो ; हाम तो उन्खर जुतवा के जरबंधवो खोलेक लाएग नाञ हिये ; ऊ तोहनी के पवितर आतमा आर अगिया से बपतिस्मा दतो। 17 उन्खर सुपा, उन्खर हांथा में हो ; आर ऊ अपन खरीहना बेस तरी से साफ करतो; आर ऊ परनिया केरके गोहमा भुसिया से अलग करतो ; आर गोहमा अपन मोरीलवा में जमा केरके धारते ; लकिन भुसियेन के ऊ अगिया में दतो जे निंझीतो नाञ, जाएर दतो।”
18 आर यूहन्ने ढेरमनी बेस बिदिया दे देके अदमियेन के बेससमाचार सुनावे हले। 19 रजवा हेरोदेस अपने भेयवा के कनइया हेरोदियास के राखले हले, ई छोएड़ के आर पापा रजवें करले हले। यूहन्ने रजवा हेरोदेस के ई साभे गुन्हावा के चलतीस ओकरा धमकिलके। 20 येहे खतीर रजवा हेरोदेस यूहन्ना के जेलवा में डाएल दलके। ई ओकर आर एगो पापा हले।h
ईसु के बपतिस्मा
(मत्ती 3:13-17;मरकुस 1:9-11)
21 जखने साभे गोटेन बपतिस्मा ललके आर तखनियें ईसु बपतिस्मा ललके आर पराथना करे हले, तेसे सरगा खुइल गले, 22 आर पवितर आतमा देहा के रुपा में कबूतरा नियर उन्खर पर उतर ले, आर सरगा से ई अवजिया सुनीले कि : “तों हमर दुलरवा बेटवा हकि, हाम तोर से खुस हियो।”i
ईसु के वंसावली
(मत्ती 1:1-17)
23 जखने इसु सेवा करेल निकले, तखने करीबन तीस बरस के हले आर अदमीयेन जिरंग बुझे हले कि ऊ योसफ के बेटवा हले; आर ऊ हेली के, 24 आर ऊ मत्तात के, आर ऊ लेवी के, आर ऊ मलकी के, आर ऊ यन्ना के, आर ऊ योसफ के, 25 आर ऊ मतितयास के, आर ऊ आमोस के, आर ऊ नहूम के, आर ऊ असल्याह के, आर ऊ नगाई के, 26 आर ऊ मात के, आर ऊ मतितयाह के, आर ऊ सेमयी के, आर ऊ योसक के, आर ऊ योदाह के, 27 आर ऊ यूहन्ना के, आर ऊ रेसा के, आर ऊ जरुबाबेल के, आर ऊ सयलतियेल के, आर ऊ नेरी के, 28 आर ऊ मलकी के, आर ऊ अद्दी के, आर ऊ कोसाम के, आर ऊ एलमादम के, आर ऊ एर के, 29 आर ऊ योसु के, आर ऊ एलिएजर के, आर ऊ योरीम के, आर ऊ मत्तात के, आर ऊ लेवी के, 30 आर ऊ सीमोन के, आर ऊ यहूदा के, आर ऊ योसफ के, आर ऊ योनाम के, आर ऊ एलियाकीम के, 31 आर ऊ मलिया के, आर ऊ मेन्नाह के, आर ऊ मत्ताता के, आर ऊ नातान के, आर ऊ दाऊद के, 32 आर ऊ यिसे के, आर ऊ ओबेद के, आर ऊ बोवस के, आर ऊ सलमोन के, आर ऊ नहसोन के, 33 आर ऊ अमीनादाब के, आर ऊ अरनी के, आर ऊ हेजरोन के, आर ऊ पारस के, आर ऊ यहूदा के, 34 आर ऊ याकूब के, आर ऊ इसहाक के, आर ऊ अबराहम के, आर ऊ तेरह के, आर ऊ नाहोर के, 35 आर ऊ सेरूग के, आर ऊ रेऊ के, आर ऊ फलेग के, आर ऊ येबेर के, आर ऊ सेलह के, 36 आर ऊ केनान के, आर ऊ अरफसाद के, आर ऊ सेम के, आर ऊ नूह के, आर ऊ लामेख के, 37 आर ऊ मेथुसेलह के, आर ऊ इनोख के, आर ऊ यरेद के, आर ऊ महललेल के, आर ऊ केनान के, 38 आर ऊ एनोस के, आर ऊ सेत के, आर ऊ आदम के, आर ऊ परमेसवर के बेटवा हले।