Laabamann nba g
MATIEOG
diɛn
1
Yiesu yaajanm sana
1 Yiesu Kristo yaajanm sana n ne : u tie *Dafiid yaabuonn i, g Dafiid mɔ tie *Abraham yaabuonn.
2 Abraham bo mal *Isaak, k Isaak mal *Sakɔb, g Sakɔb mal Suuda yen u ninjanm,
3 g Suuda mal Faarɛs yen Saara, k b naa tie Tamaar. G Faarɛs mal Ɛsrɔm, k Ɛsrɔm mal Aram,
4 k Aram mal Aminadab, k Aminadab mal Naasɔnn, g Naasɔnn mal Salmɔn,
5 g Salmɔn kuan Rahaab g mal Bos, g Bos kuan Rut g mal Obɛd, k Obɛd mal Sese,
6 g Sese mal bad Dafiid. G Dafiid tug Uri ŋaapuo g mal *Salomɔn.
7 G Salomɔn mal Robuam, g Robuam mal Abiya, k Abiya mal Asa,
8 k Asa mal Sosafat, g Sosafat mal Soram, g Soram mal Osias,
9 k Osias mal Yuatam, g Yuatam mal Ahas, k Ahas mal Esekias,
10 k Esekias mal Manase, g Manase mal Amɔn, k Amɔn mal Sosias,
11 g Sosias mal Sekonias yen u ninjanm.
L youg u, g *Babilɔnn yab baal g suol Suude yab g kun yen’m b doug n.
12 L puol po, g Sekonias mal Salatiɛl, g Salatiɛl mal Sorobabɛl,
13 g Sorobabɛl mal Abiyud, k Abiyud mal Eliakim, k Eliakim mal Asɔr,
14 k Asɔr mal Sadɔk, g Sadɔk mal Akim, k Akim mal Eliyud,
15 k Eliyud mal Eleyasaar, k Eleyasaar mal Matan, g Matan mal Sakɔb,
16 g Sakɔb mal Sosɛf, Mari sal. G Mari mal Yiesu yua k b yi’ug *Kristo.
17 Lann, lan cil Abraham saa yen Dafiid, b tie yaajanm piig yen banna i. Dafiid youg saa yen ban bo suol Suude yab yaa youg g gad yen’m Babilɔnn mɔ, b tie yaajanm piig yen banna i. Babilɔnn youg saa yen Kristo youg mɔ, yaajanm piig yen banna.
Yiesu malu
18 Ban mal Yiesu Kristo nand n ne : u naa Mari bo tie Sosɛf sikpenŋ i. B daa bo g kuan lieb mɔno g Mari yen suol puol *Foŋanm paalu po. 19 Sosɛf bo tie *nimɔn i, lan te k u bo g bua k u fiɛg Mari niib n, g ji mali k wan wuon g yie’og. 20 Wan bo mali nnyan g Yonmdaan *malɛg baal danŋd n ninŋ g maad’o : " *Dafiid yaabuonn Sosɛf ! Big nba g Mari pil’o ne tie Foŋanm paalu po i. Daa jie yen ŋan gaal Mari k wan te a ŋaapuo kaa. 21 U bu mal bijabg, ŋan pul’o Yiesu, wano n tan bu nyan u buolu niib b biid n ninŋ. " 22 L yaa bona kul ne bo tien g Yendu *sogni n bo maad yal siɛnyoug ń fid g tien yen mɔni. 23 U bo maad g sipaan nba g ban jua tan bu suol puol g mal bijabg ban gii yi’ug Emanuwɛl. (L sann niimn n tie g Yendu be yen’ti.) 24 Sosɛf n guan g find, k u tien nyan Yonmdaan malɛg n bo maad’o nand nyan, g gaal u ŋaapuo Mari k b taan g be. 25 B yen g bann lieb saa yen daal nba k u mal bijabg. G Sosɛf pul’o Yiesu.