4
Sitaan bign Yiesu
1 Yiesu bo gbie yen *Foŋanm, g nyiɛ Suurdɛn bɔngbann, g Foŋanm gad yen’o *tinkuonŋ n ninŋ, 2 k u tien daa piinna g *Sitaan bign’o. U bo g di siɛl l dana n ninŋ. L puol po g kom suol’o. 3 G Sitaan maad’o : " A gii tie Yendu Bija, ŋan te g tann ne ń kpand jied. " 4 G Yiesu ŋmiɛn’o : " Yendu Kadaaɔg maad g jied kua kaa bu te g nil ń gii mɔg miɛl. " 5 G Sitaan tug’o g duo yen’o naan nba kped po, g ŋɔn’o ŋanduna doi kul pilb yenm kua g maad’o : 6 " N bu te’a doi ne kul diem yen l ŋalman, k l maa l kul ne b tie min i, k n mɔ tien min bua yua nba. 7 Lann, a gii gbaan n nunŋ n ninŋ g pug’n, l kul baa tie a yal i. " 8 G Yiesu ŋmiɛn g maad’o : " L diɛn Yendu Kadaaɔg n ninŋ g maad : “ A baa pug Yonmdaan a Yendu kua i, g biɛ dond wano kukua. ” " 9 G Sitaan tug’o g gad yen’o Serusalɛm, g daan don’o *jaanddeciɛɔnŋ yul po, g maad’o : " A gii tie Yendu Bija, ŋan yug g jiid tinŋ n, 10 k l maa Yendu Kadaaɔg maad g Yendu bu te u *malɛg-nba ń guul’a 11 g biɛ tebn g gabl’a b nui n ninŋ, g daa ŋaa baa a titala ń tuud tann. " 12 G Yiesu ŋmiɛn g maad’o : " L kadaaɔg n biɛ maad k a kan bign Yonmdaan, a Yendu. " 13 Sitaan n yaan bign’o bignbuolu kul g gbenn, k u yaad g ŋaa’ɔg, g ji guu youg nba k u bu guan g bign’o.
Nasarɛt yab yie Yiesu
14 Yiesu bo gbie yen *Foŋanm paalu i, g guan Galile doug n, k u sann duo l fuann n ninŋ kul. 15 K u tund niib Yendu maam Suif-nba *tintaann died n ninŋ, k b kul ji pag’o.
16 K u gad Nasarɛt doug n ninŋ, naan nba k u bo pugd, g *Saaba daal k u kua tintaann dieog n ninŋ, nyan wan bo tu tie nand nyan. G tan fiil k wan lii Yendu Kadaaɔg. 17 K b tie’og Yendu *sogni Esaayi n bo diɛn yal, k u pɔbd, g la diɛni ne : 18 " Yonmdaan *Fuom be n ninŋ, k l maa u lugd’n k n muand tali *Laabamann. U sun’n k n maad yonmi k b bu nya yonmd n, g juanm mɔ bu guan g nyuand, g yab nba be mabl n bu yal b kua. 19 K n biɛ kpaand g dinne, Yonmdaan bu fiel’ti. "
20 G Yiesu pɔbn kadaaɔg, g ŋmiɛn jua nba bo suun tintaann dieog n, g ji kal. G niib kul fid ninbina u po. 21 K u ji cil g maad’b : " Yin gbad lanbona nba ne, dinne l ji tien yen mɔni. " 22 Lanbonmana nba k u bo maad nyan bo yaa g lid’b g baal yen pinpagd, k b ji tua k wano kaa tie Sosɛf bija ii ? 23 K u maad’b : " N ban k i bu yin’n jɔug nba ne : “ Dogda, teb a kua ” g biɛ maad’n : “ T gbad yal nba kul k a tien Kafarnawunm, biɛ tien l bona a doug n ninŋ ne mɔ ! ” " 24 K u biɛ maad : " L tie mɔni i, b g ban g gaal Yendu sogni u doug n ninŋ. 25 Yen mɔni n maad’i, g pekɔa bo yab Israyɛl doug n ninŋ *Eli youg, youg nba g taag bo luon bina ntaa yen ŋmaali yinluob, g kom baa l doug n kul. 26 Yendu yen bo g sun Eli k wan gad sua buol, l gii g tie pekual nne buol i kaa, k u kua Sarɛpta, Sidɔn doug n ninŋ. 27 Yendu sogni Elise youg mɔ, *gbaada bo be bonciɛnn Israyɛl doug n ninŋ, ama k b ninŋ sua bo g paag, l gii g tie Siiri jua Naaman i kaa. "
28 Yab nba bo be tintaann dieog n n gbad nnyan, k b pala bie g pend. 29 L sua k b doug be jual po i. K b fiil g nyan’o b doug n ninŋ, g gad yen’o l jual n kped naan g daan bu tud g lu’ug yidug n. 30 K u yen nyiɛ b siign ninŋ g paan g saa u sɔnu.
Yiesu gad Kafarnawunm g paag jua nba g sanpola bo ŋua’ɔg
31 Yiesu bo jiid Kafarnawunm, Galile doug n ninŋ, g tund niib Yendu maam *Saaba daal. 32 K u tundl yaa g lid’b, k l maa u bo maad yen yikod i. 33 L sua g jua nne be Suif-nba *tintaann dieog n g *sanpola ŋua’ɔg, k u tand yen paalu g maad : 34 " Hei i ! Nasarɛt Yiesu, tinm yen fin bɛ po i ? A baal k a biɛn’ti yaa aa ? N ban ŋan tie yua. Fin n tie niŋan nba g Yendu sun. " 35 G Yiesu gaal jad b po g maad : " Suon man l buol ! Yaad man g ŋaa jua ne. " G sanpola yugl l jua g gul’o niib siign ninŋ, g yaad g ŋaa’ɔg g g tien’o baa siɛl yaa bonbiil. 36 G jiwaani kua b kul, k b ji maad maad yen b lieb g tua : " Ne tie malanm po n ne i ? U mɔg yikod yen paalu g niind sanpola k b yaadl. " 37 K u sann duo l dingbankunkogi n ninŋ kul.
Yiesu paag Simɔn Piɛr ŋaapuo naa
38 Yiesu bo nyiɛ *tintaann dieog n ninŋ, g gad Simɔn ŋaag n, g sua g Simɔn ŋaapuo naa gbanu ton bug bug. K b miɛl’o k wan tien siɛl u po. 39 K u nagn g yin u po, g tand g maad k u gbannantounŋ ń gbenn, k l yand u po. L youg mɔno k u fiil g ji cand’b. 40 Yendu n yaan tan baa, k b baal yen u buol yab nba bo yiɛl yiɛlbuoli kul. K u maan nui sua kul po g paag’b. 41 G *sanpola mɔ yaad g ŋaan niib bonciɛnn g yign g tua : " A tie Yendu Bija i. " K u fu yen’m g g tuod k b maad nnyan, k l maa b bo ban k u tie *Kristo.
Yiesu nyiɛ Kafarnawunm doug n
42 Lan tan fann youg nba, g Yiesu nyiɛ g gad naan nba g sua g be, g niib kpaan’o g tan la’ɔg, g gɔgl’o g ji g bua k u kpiɛd’b. 43 Ama k u maad’b : " L tie k n muand Yendu *bal *Laabamann doi nba tenn ninŋ mɔ i, k l maa l yaa po i g Yendu sun’n. " 44 Nnyan i k u ji muand Laabamann Suudea Suif-nba *tintaann died n ninŋ.