Yiesu banŋ u ŋuantieb jaandi
11
1 Diyenn Yiesu bo be siɛl buol g jaand.
Wan yaan jaand g gbenn,
k u *ŋuantieb n ninŋ,
yend bual’o :
" Yonmdaan,
ŋɔn’ti tin baa jaand nand,
nyan San *Nyunwultua n yaan ŋɔn u ŋuantieb nand nyan. "
2 K u maad’b :
" I tu gii jaand,
yin maad k nne :
T Baa,
a sann ń do,
a *diem ń pund.
3 Te’ti daal kul jied.
4 Di sugl t biid po,
k l maa t mɔ tu di sugl yab nba tu biil’ti nyan.
G biɛ daa ŋaa tin baa bignn n ninŋ. "
5 G Yiesu biɛ maad’b :
" I ninŋ ne,
nil gii mɔg dɔnn,
g gad yɔugsiiug g la’ɔg g maad’o :
“ N dɔnn,
kpend’n kpanu ŋantaa,
6 k l maa n dɔnn nne nyiɛ sɔnu g baal,
k n g mɔg siɛl g bu cand’o. ”
7 L gii tie k u dɔnn ŋann be dieog n o,
g nyaan ŋmiɛn’o :
“ Daa mabnd’n.
T kpal gann o.
Min yen n bid duan o.
N kan fid g fiil g te’a. ”
8 Min maad’i,
baa u gii g fiil g tie’og g dugn b dɔnnu po,
u yen bu gbal g fiil g te’og wan bua yal nba kul,
k l maa u nyanŋ u yam.
9 Min maad’i,
i miɛd man,
b bu te’i.
I kpaan man,
i bu la.
I kuog man gann,
b bu luod i po.
10 K l maa yua miɛd kul,
b bu te’og,
yua kpaan kul bu la,
yua nba kuo gann,
b bu luod wan kua.
11 I ninŋ ne,
bibaa lano po i k u big bu miɛl’o janŋ,
wan ŋaa lann o g te’og waaɔg u ?
12 Lann i kaa u gii miɛl jenn,
wan te’og nanŋ i ?
13 Lann,
yinm nba tie nibiid,
i gii ban k i te i bid bonŋana,
l bu tien nle i,
k i Baa nba be polu po ji kan te yab nba miɛd’o *Foŋanm i ? "
Yiesu mɔg paalu g cie Sitaan
14 Jua nne bo be g *sanpola ŋua’ɔg g te k u muu,
g Yiesu bel g yaan l sanpola,
k u ji fid g maad,
k l yaa g lid niwulug.
15 Ama k b ninŋ siɛb maad k u diɛ *Bɛlsebuul paalu i,
yua nba tie sanpola bad,
g biel sanpola.
16 G lieb mɔ kpaan k ban bign’o,
g bual’o,
k wan tien yaalidug bonn g ŋɔn k u paalu nya Yendu buol i.
17 G Yiesu bann b maalm g maad’b :
" Doug nba ninŋ g niib g taa mɔb b tu tan juod g yad i,
died ń gii baal g nyagd liel.
18 I maad k n diɛ Bɛlsebuul paalu i,
g biel sanpola.
*Sitaan gii guan g kɔn yen u kua,
l bu tien nle i k u diem ń gii tund g be i ?
19 I gii yed k min diɛ Bɛlsebuul paalu i g biel sanpola,
i *ŋuantieb mɔ biel’b ŋmaa paalu po i ?
Lann,
banm mɔno n bu ŋɔn k i mɔg biid.
20 Ama l gii tie k n diɛ Yendu paalu i g biel sanpola,
l ŋɔn g Yendu *bal pund i buol n nyan.
21 Gbanmandaan gii mɔg jakɔntiɛd g guu u ŋaag,
sua kan fid g jan u mɔgm.
22 Ama,
sua gii baal g paa g cie’og,
g paad’o,
u bu fiel jakɔntiɛd nba kul k u bo dug l po nyan,
g bɔgd lieb wan tug yal kul.
23 Yua nba g taa n po,
u tie n ninnand i.
Yua nba g tod’n k n taand mɔ,
u yad i.
24 Sanpol gii ŋua nil k b tan bel g yaan’o,
u tu gad gii waa *tinkuonŋ n ninŋ i,
g kpaan naan nba k u bu fuod.
U gii kpaan kpaan g luol,
wan maad k u bu lebd g ŋuan wan daan kpiɛ g ŋua nil nba i.
25 U gii guan l buol,
g sua g siɛl g be g bu pan’o,
26 wan guan g lebd g daan yiin u lieb banlile,
yab n biɛ g cie wano mɔno,
b kul ń guan g ŋanm gii ŋua l nil.
L youg,
nil ŋann binbem ji baa bi g cie lan daan kpiɛ g tie nand. "
Danm nba cenŋ Yendu maam pamann tie b yal i
27 Yiesu n daa bo maad nnyan,
g puo nne tand niib siign ninŋ,
g maad :
" Puo nba pil’a g biɛ ŋaan’a u biil,
pamann tie u yal i. "
28 Ama g Yiesu maad :
" Yab nba cenŋ Yendu maam g biɛ tug g sun yen tuonn,
banm n mand g be pamann n ninŋ. "
29 Niib bonciɛnn n yaan bo tigi nyan,
g Yiesu maad :
" Mɔlane niib ne tie nibiid i.
B kpaan k ban la yaalidug bonn i.
B yen kan la siɛl yaa yaalidug bonn,
l gii g tie Yendu n bo tien yal u sogni *Sonas po i kaa.
30 Nyan Sonas n yaan bo te banm Niniif yab po nyan,
nnyan i g *Nifosaal Bija mɔ bu te banm,
mɔlane niib ne po.
31 Yendu n bu bu niib yaa daal,
yanbaɔnŋ puobada bu fiil g te yinm mɔlane niib ne i biid,
k l maa u bo nyiɛ hal banfagl i,
g baal k wan cenŋ *Salomɔn yanfomaam.
Yua nba yen be ne cie Salomɔn.
32 Yendu n bu bu niib yaa daal,
Niniif yab bu fiil g te yinm mɔlane niib ne i biid,
k l maa Sonas bo muand’b Yendu Laabaal,
k b lebd b binbem o.
Yua nba yen be ne cie Sonas.
33 Sua g sonŋ fidl g wuond,
lann i kaa g cibnd bobl n ninŋ.
B tu tuan’o naan buol nba,
g yab kua ŋaag n ninŋ bu fid g la yinyiem i.
34 Ninbinn n tie gbannand fidl.
L gii tie k a ninbinn ŋan,
a gbannand kul baa be yinyiem n ninŋ i.
A ninbinn gii g ŋan,
a gbannand kul baa be bunbɔnn n i.
35 Lann,
ŋanm g diid g liɛ yinyiem nba be a ninŋ g tie bunbɔnn ii ?
36 To !
L gii tie k a gbannand kul be yinyiem n,
g siɛl yaa bunbɔnn g ŋmad,
a baa be yinyiem n,
nyan fidl n tu fand’a yen u yinyiem nand nyan i. "
Yiesu jalg Yendu Kadaaɔg gbanbanda yen Farisiɛn-nba
37 Yiesu n yaan maad nnyan,
g *Farisiɛn nne yiin’o,
k wan di u ŋaapo.
K u gad g kua g kal g bu di.
38 Ama l Farisiɛn n yaan la k u di g g nidb nyan b danm bogda n bual nand nyan,
k l yaa g lid’o.
39 G Yonmdaan maad’o :
" Yinm Farisiɛn-nba yaann ii !
I tu ŋanm i jeditiɛd yen i nyunnyubona puol po k lan gii ŋan Yendu nunŋ n i,
ama k i pala n ninŋ yen gbie yen naayiug maalm yen tugmɔunŋ.
40 Yinm yanjalndanm ne !
Yua nba tien puol po,
wano kaa biɛ tien nuag n ii ?
41 Tug man yal nba be i jedibona n,
g te tali.
L youg,
l kul bu te ŋand i po.
42 Ama,
yinm Farisiɛn-nba,
fala bu gbad’i,
yinm nba tu bɔgd i bonkukuod n ninŋ kanmi yen guand yen kpinlied,
g bil kpega piig,
g tug kpegyenn g te Yendu paab,
g yen yi Yendu mɔnkund fam,
g biɛ g mɔg buam u po.
I daa bo bu cind g tien lann yo,
g fid g diid yal n tenn.
43 Yinm Farisiɛn-nba,
fala bu gbad’i,
yinm nba bua k i gii kaal liig kinkaani po *tintaann died n ninŋ,
g biɛ bua k i tu gii baal naan niib n ninŋ,
niib ń gii fuond’i.
44 Fala bu gbad’i,
i tie nyan kakula nba sal g niib g nyuan,
g ŋmaad l po g g ban nyan i. "
45 G Yendu Kadaaɔg *gbanband gaal maam g maad’o :
" Canbaa,
ŋan yaan maad nand ne,
a sugd t mɔ i. "
46 K u maad :
" Yinm Yendu Kadaaɔg gbanbanda,
fala bu gbad i mɔ,
k l maa i tunŋ niib tugkpiɛga nba k yinm mɔno kan tuo g biɛb baa yen nuubil.
47 Fala bu gbad’i,
k l maa i maa Yendu *sogni-nba kakula,
k i baa-nba n yen bo kpii’b.
48 Nnyan,
i ŋɔnŋ k yinm yen i baa-nba taa maalm yen bontitied n nyan.
Banm n kpii’b,
k yinm ji maa b kakula.
49 L yaa po n te g Yendu nba tie Yanfodaan mɔno maad :
“ N bu sun sogni-nba yen *sundi b buol.
B ninŋ,
b bu ŋɔn yenm-nba fala,
g kpi lieb-nba. ”
50-51 Lann, Yendu sogni-nba nba kul k b kpii’b hal ŋanduna cilyoug, lan cil Abɛlc saa yen Sakari, yua nba k b bo kpii’ug *jaanddeciɛɔnŋ gɔnn n, g kpiɛn *salg binbindl nyan, yinm mɔlane niib ne i, k n bu dad i tubl l po. N maad’i faa, yinm mɔlane niib ne i, k n bu dad i tubl. 52 Yinm Yendu Kadaaɔg gbanbanda,
fala bu gbad’i,
k l maa i luon dimɔb nba g niib bu fid g kua g banŋ Yendu maam.
Yinm mɔno g kua,
i biɛ g ŋaa yab nba mɔ bo bua ban kua,
k b kua. "
53 Yiesu n yaan nyiɛ l buol,
g Yendu Kadaaɔg gbanbanda yen Farisiɛn-nba pala ŋub u po.
Lann i k b ji bual’o buali bona kul po,
54 g kpaan k wan maad g kpiɛd k ban jalg’o.