Kɨvɨ kuaꞌán koyo ra nyityi xaan kua nyeꞌe ra nu kaku̱ ra Jesús
2
1 Kaku̱ ra Jesús ñuu Belén. Ta ñuu van nyaá tsi nu kuú Judea. Ta ra tsa kuú rey ñuu Judea van kuú ra Herodes. Yukuan ta tsaa̱ koyo djuꞌva ra nyityi xaan nya ñuu Jerusalén. Kitsi̱ ra tsitaꞌan ra ityi nu kaña ñanyii. Ta ra nyityi xaan kuú ra tsitaꞌan ra. 2 Ta ndaka̱ tuꞌun ra tsitaꞌan ra tsi ñayɨvɨ tyeꞌe kaa:
―¿Nya maa nyaá ra kuú rey kuenda ñayɨvɨ Israel? Vatyi ityi nu kañá ñanyii nyeꞌe̱ ndi tiñoo tsa tsaꞌá kuꞌva vatyi tsa kaku̱ ra ityi ya, ta vatsí ndi vatsí djakaꞌnu ndi tsi ra ―katyí ra tsitaꞌan ra.
3 Ta kɨvɨ tsa tsito̱ ra rey Herodes tuꞌun van, kundɨñɨ xaan iñi ra. Ta tyakuan ku tandɨꞌɨ ñayɨvɨ ñuu Jerusalén van. 4 Yukuan ta kana̱ ra Herodes tsi tandɨꞌɨ ra kuú nuu tsi djutu, ta tsi ra djakuaꞌá ley veꞌe ñuꞌun. Ta ndaka̱ tuꞌun ra tsi ra tsitaꞌan ra, nya maa taꞌán tsi kaku ra Cristo. 5 Ta nakaꞌa̱n ra tsitaꞌan ra, ta katyí ra tyeꞌe kaa:
―Nya ñuu Belén ityi Judea, yukuan taꞌán tsi kaku ra vatyi tyakuan kaa tyaa̱ ra kuu̱ ndudju yuꞌu Nyoo nu tutu ta tsanaꞌa ta katyí ra tyeꞌe kaa:
6 Ta yoꞌo ñuu Belén tsa nyaá ityi ñuꞌun ra Judá, vadjɨ ñuu lee ñi kuún tsa nuu ñuu naꞌnu ka tsa iyó ñuꞌun ra Judá,
djoko kaꞌnu ka kuú yoꞌo vatyi Belén ña, kua kaku noo ra tsa kua kunyakañaꞌan.
Ta kua djaꞌa kuenda ra tsi ñayɨvɨ ñuu Israel kuende.
Tyakuan kaa nyaa nu tutu Nyoo tsa katyi̱ ra kuú ndudju yuꞌu ra ―katyí ra tsitaꞌan ra tsi ra Herodes.
7 Yukuan ta kana̱ xeꞌe ra Herodes tsi ra nyityi xaan, ta ndaka̱ tuꞌun ra tsi ra tsitaꞌan ra, ñaa kɨvɨ, ta ñaa kuꞌva tsa vavaꞌa maa kaña̱ tiñoo van. 8 Yukuan ta djakuꞌu̱n ra tsi ra tsitaꞌan ra nya ñuu Belén, ta katyí ra tsi ra tsitaꞌan ra:
―Ku̱aꞌan ndo, ta nda̱ka tuꞌun vaꞌa ndo tuꞌun lee van. Ta tatu nañiꞌi ndo tsi kue, ta ki̱tsi katyí ndo tsii vatyi kuꞌun ku yuꞌu kudjakaꞌni tsi kue ―katyí ra Herodes tsi ra tsitaꞌan ra.
9 Tsa yaꞌa̱ tsiñi̱ ra nyityi xaan van tsa katyi̱ ra Herodes, nakiꞌin ityi ra ta kuaꞌán ra tsitaꞌan ra. Ta tiñoo tsa nyeꞌe̱ ra ityi nu kaña ñanyii van kuaꞌán tsi ityi nuu ra tsitaꞌan ra, ta tsikuɨñɨ̱ tsi maa maa djɨkɨ nu kaku̱ lee van. 10 Ta kuꞌva tsa nyeꞌe̱ ra nyityi xaan van tiñoo van, djɨɨ xaan kuñi̱ ra tsitaꞌan ra. 11 Ta kɨꞌvɨ ra tsitaꞌan ra tsitsi veꞌe nu katuú lee van. Ta nanyeꞌe̱ ra tsitaꞌan ra tsi kue tsiꞌin ña María djɨꞌɨ kue. Ta tsikuɨñɨ̱ tsɨtɨ ra tsitaꞌan ra vatyi djakaꞌnu ra tsi kue. Yukuan ta nuña̱ ra yuꞌu tsatun tsa ndaꞌa ra tsitaꞌan ra ta tava̱ ra tsa kua kuꞌva maa ra tsitaꞌan ra tsi kue, tsa kuú xuꞌun kuaan, kutu xiko, ndutya xiko tsa nañí mirra. Ta tsaꞌa̱ ra tsi kue. 12 Yaꞌa̱ van ta nyeꞌe̱ ra tsitaꞌan ra numaꞌna, ta kutuñi iñi ra tsitaꞌan ra, vatyi va kunanuꞌu ka ra ityi kitsi̱ ra nu nyaá ra Herodes. Yukuan kuenda djɨɨn ityi kuaꞌán ra tsitaꞌan ra.
Kɨvɨ tsino̱ xeꞌe ra José tsiꞌin ña María tsiꞌin lee van nya ñuꞌun Egipto
13 Tsa yaꞌa̱ kuaꞌan koyo ra nyityi xaan van tsitaꞌan ra. Yukuan ta noo ángel Djutu Mañi yo kituu̱ nuu ra José tsitsi numaꞌna. Ta katyí ra tsi ra tyeꞌe kaa:
―Ndu̱kuita, ta ki̱ꞌin tsi lee ya, ta tsi djɨꞌɨ kue, ta ku̱aꞌan ndo nya Egipto. Ta yukuan ko̱o ndo nyakua nya djakote tsuun. Vatyi ra Herodes kua nanduku ra tsi lee ya vatyi kaꞌñi ra ―katyí ángel van.
14 Yukuan ta ndukuita̱ ra José tsakuaa van. Ta kiꞌi̱n ra tsi lee van, tsiꞌin djɨꞌɨ kue. Ta kuaꞌán ñun nya Egipto. 15 Ta yukuan tsikoo̱ ñun nyakua nya tsa tsiꞌi̱ ra Herodes. Ta tyeꞌe kaa kundaa̱ tuꞌun tsa kaꞌa̱n Nyoo tsa tyaa̱ ra kuu̱ ndudju yuꞌu ra ta tsanaꞌa. Tyeꞌe kaa katyi̱ ra: “Nyaa ñuu Egipto nakane̱ tsi Djeꞌi”, katyi̱ ra.
Kɨvɨ tava̱ tyiño ra Herodes ñá kaꞌñi ra tsitaꞌan ra tsi ra nyiꞌi
16 Tsa tuu̱ iñi ra Herodes vatyi ra nyityi xaan van djandavi̱ ñaꞌa ra tsitaꞌan ra tsi ra, xaa̱n vavaꞌa kuñi ra. Ta tava̱ ra tyiño ña kaꞌñi ra tsitaꞌan tandɨꞌɨ maa ra nyiꞌi tsa iyó ñuu Belén van ta tandɨꞌɨ ka ndaꞌa ñuu. Tandɨꞌɨ ra nyiꞌi tsa uu kuiya ta nyakua nya ra nyiꞌi tsa ni kaku̱. Tyakuan kaa djakuu̱ ra vatyi natyiꞌi̱ tuñi iñi ra, vatyi tyakuan taꞌan kuiya ra Jesús. Tañi kuꞌva katyí ra nyityi van tsitaꞌan ra tsi ra. 17 Tyakuan kaa kundaa̱ tuꞌun kaꞌa̱n Nyoo tsa tyaa̱ ra Jeremías ra tsa kuu̱ ndudju yuꞌu ra ta tsanaꞌa, ta katyi̱ ra tyeꞌe kaa:
18 Tyaku̱ noo ndudju ñuu Ramá, tsa tsakú tsaa ñayɨvɨ ta iyo taꞌan ñun.
Ta junvan ñun kuú tata ña Raquel, ñayɨvɨ Israel, tsakú tsaa ñun tsa kuenda djeꞌe ñun.
Djoko ña kuñí ñun yoo tsa nakiꞌin ndaꞌvi tsi ñun, tsa katyi tsa tsiꞌi̱ djeꞌe ñun, katyí tsi nu tutu Nyoo.
19 Djoko tsa yaꞌa̱ tsiꞌi̱ ra Herodes. Yukuan ta kituu̱ ku noo ángel tsa djakitsi̱ Nyoo nuu ra José nu kixi ra, nya ñuu Egipto. Ta katyí ra tsi ra:
20 ―Ndu̱kuita ta ki̱ꞌin tsi lee ña ta tsi djɨꞌɨ kue. Ta ku̱anuꞌu ndo nya ñuꞌun Israel, vatyi tsa tsiꞌi ra tsa kuñi̱ kaꞌñi tsi lee ña.
21 Yukuan ta ndukuita̱ ra José, ta kiꞌi̱n ra tsi lee van, tsiꞌin djɨꞌɨ kue. Ta kuanuꞌu̱ ñun nya Israel. 22 Djoko kɨvɨ tsa tsito̱ ra José vatyi ra Arquelao, djeꞌe ra Herodes, nanduu̱ ra rey tsa tyiño nuu djutu ra nya Judea, ta nayuꞌu̱ ra ta ña kuñí ra kuꞌun ra yukuan, vatyi djakoto̱ ángel Nyoo tsi ra tsitsi numaꞌna, yukuan kuenda kuaꞌan ñun nya Galilea. 23 Tsa tsaa̱ ñun yukuan, kuaꞌan ñun nya ñuu Nazaret, kua koo ñun. Ta yukuan tsikoo̱ ñun. Ta tyeꞌe kaa kuu̱, kuꞌva kundaa̱ tuꞌun tsa kaꞌa̱n Nyoo, tsa tyaa̱ ra kuu̱ ndudju yuꞌu ra ta tsanaꞌa. Vatyi katyi̱ ra vatyi ra Jesús ra ñuu Nazaret kua kunañi ra.