Uu tsa kutuni xi io ichi kana chikanchii kíj s-tsa ki koto tsa Jesús
2
1 Kuenta káku Jesús Belén xuun Judea, Herodes kuu tsa rey nee Israel tiempu yukua. San kixi uu tsa kutuni xi kée ntsa ichi kana ora san kíj s-tsa ntsa Jerusalén, 2 san ndukutoꞌon tsa ndidaa tsa:
—Ami io j-rey ndidaa ñayii kuu ñuu Israel, nu káku kuan tan? Kuan xíni da en chodini kachi sa káku nu ntsa ichi kana ora san vaj d̶a chiñuꞌu ñaꞌan da jnu.
3 Kuenta tsaku xi rey Herodes toꞌon yaꞌa, san sáni-ini ntseꞌe tsa, san duꞌua ni ndidaa ñayii io Jerusalén. 4 San nakana tsa ndidaa dutu xiꞌin ndidaa tsa dadana ñaꞌan ley, san ndukutoꞌon tsa ami kuu sa kaku Cristu. 5 San ndidaa tsa yaꞌa sadaa tsa:
—Belén xuun Judea, kuan duꞌua chidotuni profeta:
6 Belén, xuun Judá,
Ma kani-ini yo sa ti xaꞌvi yo jnu ndidaa tsa tastuni io Judá;
kuan xan kee en tsa kunaꞌnu
san dadana ñaꞌan tsa ichi guaꞌaa xi ku kiun ntsu Israel.b
7 Danduu Herodes vii ni kána tsa ndidaa tsa kutuni xi, san ndukutoꞌon ndaa tsa na ora nanuu chodini. 8 San tsandaꞌa ñaꞌan tsa Belén san sadaa tsa:
—Kuaꞌan ku ndukutoꞌon kueni kueni ami io nu. San tu na naniꞌi yo nu ndidaa yo, san ki kachitoꞌon yo kuntsu, kuan nakiꞌin ntsu ku chiñuꞌu ñaꞌan ntsu jnu tuku. Sadaa tsa.
9 San tsa yaꞌa ndidaa tsa kuenta tuꞌu tsáku s-tsa sa sadaa rey san kuaꞌan tsa. San chodini xíni tsa ntsa ichi kana ora, ndodonuu jnu tsa ndidaa tsa kuaꞌan, san saa san kukuin d̶iki veꞌe sa io nuyiki. 10 San kuenta xíni ndidaa tsa kutuni xi sa kukuin chodini, san ku-iꞌni ntseꞌe tsa ndidaa tsa. 11 Kuenta kuyii tsa veꞌe, saa tsa jnu daꞌyiki xiꞌin María jnana nu, san sa kuinxiti tsa san chiñuꞌu ñaꞌan tsa jnu. Danduu nákan tsa ndidaa sa neꞌe tsa kuaꞌan san sañaꞌan tsa oro, dúsa xiꞌin aceite saꞌan tami nani mirra. 12 Doko kuenta xídi ndidaa tsa kutuni xi kuan, san sáni tsa sa káꞌan en tsa káꞌan s-tsa sa ma yaꞌia ka tsa sa io Herodes, san kunuꞌu tsa xuun tsa enka ichi.
Duꞌua kída sa xino kuaꞌan Egipto
13 Danduu kunuꞌu tsa yaꞌa ndidaa tsa, san en x-ángel Ndios nanuu en sani xi José san sadaa:
—Ndukoo; san teen daꞌyiki xan xiꞌin j-nana nu xan san kuaꞌan Egipto. San kendoo juan ntsa na kachitoꞌon ntsu xo san ndij xo, kuan Herodes kuan nanduku ñaꞌan tsa jnu sa kaꞌni ñaꞌan tsa jnu, duꞌua sadaa.
14 Danduu José ndúkoo tsa, san tén tsa daꞌyiki xiꞌin jnana nu, san kuaꞌan tsa Egipto, 15 san ío tsa juan ntsa kuenta xíꞌi Herodes, ndasa na xinotaꞌan sa káꞌan Ndios sa chidotuni x-profeta ia: Ntsa Egipto na kána ntsu ku Daꞌa ntsu.c
Herodes tsandaꞌa tsa sa na kaꞌni ñaꞌan xi ndidaa daꞌa yiki
16 Danduu Herodes xínituni tsa sa dandaa ñaꞌan ndidaa tsa kutuni xi kuan s-tsa, san nadiko ntseꞌe s-tsa, san tsandaꞌa tsa sa na kaꞌni ñaꞌan xi ndidaa nuyee yiki io Belén, xiꞌin ndidaa ñuu io yachi ndidaa juan, nuyee yiki dika kaku xiꞌin nu yiki io ubi kuia. Ntsa kuenta ndúkutoꞌon tsa xi ndidaa tsa kutuni xi, na ora xini tsa sa nanuu chodini. 17 San duꞌua xíno taꞌan sa chidotuni Jeremías x-profeta Ndios, kuenta kachi tsa:
18 Tsáku sa ndaꞌvi ntseꞌe saku en ñadeꞌe ñuu nani Ramá;
Raquel kuu ña, ndaꞌyu ña sa saꞌa d̶aꞌa ña,
san ti nchú kadakaꞌnu ña xanaa ña
kuan xíꞌi nu ndidaa nu.d
19 Kuenta xíꞌi Herodes, san x-ángel Ndios nanuu en sáni xi José ntsaa Egipto, san sadaa:
20 —“ Ndukoo, teen daꞌyiki xan xiꞌin j-nana nu xan, san kunuꞌu Israel, kuan sa xíꞌi ndidaa tsa nchu kaꞌni ñaꞌan jnu”.
21 San danduu ndúkoo tsa, san tén tsa daꞌyiki xiꞌin jnana nu, san kunuꞌu tsa Israel. 22 Doko kuenta níꞌi toꞌon tsa sa Arquelao kuu rey Judea x-kuenta s-tata tsa Herodes, san yúꞌu tsa sa kiꞌin tsa juan; san kuenta xídi tsa san sáni tsa sa sadaa Ndios sa na kiꞌin tsa, san kuaꞌan tsa en xuun distritu Galilea. 23 San kuenta saa tsa, san ío tsa en ñuu nani Nazaret.e San duꞌua xíno taꞌan sa káꞌan ndidaa x-profeta Ndios, sa kunani ia nazarenu.f